ပိတ်ကားပေါ်မှာ ပျောက်ဆုံးခြင်း
အရင်းနှီးဆုံး သူစိမ်းနှစ်ယောက်က ပိတ်ကားထက်ကနေပြီးတော့ သူတို့ရဲ့ ခံစားချက်တွေကို ကိုယ်စီ ဖွင့်ဟခဲ့တဲ့ ထူးထူးခြားခြား ရုပ်ရှင်နှစ်ကား ရှိတယ်။
ဘယ်လိုလဲဆိုတော့ အရမ်းချစ်ခဲ့ပေမဲ့ သဘောထား မတိုက်ဆိုင်လို့ လမ်းခွဲခဲ့ရတဲ့ နှစ်ယောက်က ရုပ်ရှင်တစ်ကားစီ ရိုက်ပြီးတော့ ကိုယ့်ရဲ့ ခံစားချက်တွေကို ဝန်ခံဖြောင့်ချက် ပေးခဲ့တာမျိုးပါ။
Lost In Translation (2003) နဲ့ Her (2013) ရုပ်ရှင်နှစ်ကားကို ပရိသတ်တွေ ကောင်းကောင်း သိကြမှာပါ။ ဒီရုပ်ရှင်တွေနဲ့ ပတ်သက်ပြီး လူသိနည်းတာက ဒီနှစ်ကားလုံးကို အသီးသီး ရိုက်ကူးခဲ့တဲ့ ဒါရိုက်တာ နှစ်ယောက်ဖြစ်တဲ့ Sofia Coppola နဲ့ Spike Jonze တို့က အကြင်လင်မယား ဖြစ်ခဲ့တယ် ဆိုတာပါပဲ။
ဒီနှစ်ယောက်က ၁၉၉၉ ခုနှစ်မှာ လက်မထပ်ခင်ကတည်းက သူငယ်ချင်းတွေအဖြစ် နှစ်ပေါင်းများစွာ ရင်းနှီးခဲ့ကြသူတွေပါ။ ဒါပေမဲ့ နှစ်ယောက်ကြား သဘောထား မတိုက်ဆိုင်မှုတွေက ညှိနှိုင်းလို့ မရတော့ ၂၀၀၃ ခုနှစ်မှာ ကွာရှင်းခဲ့တယ်လို့ သိရတယ်။
Sofia Coppola က ၂၀၀၃ ခုနှစ်မှာ 'Lost In Translation' ဆိုတဲ့ ရုပ်ရှင်ကို ရိုက်ကူးပြီး သူမရဲ့ ခံစားချက်တွေကို ဒီဇာတ်ကားထဲမှာ ပုံအောသွင်းလိုက်တယ်။ တစ်နည်းပြောရရင် အဆုံးသတ်သွားပြီဖြစ်တဲ့ သူမရဲ့ အိမ်ထောင်ရေးမှာ ဘယ်လို ပြဿနာတွေ ရှိခဲ့သလဲဆိုတာကို ရုပ်ရှင်အတတ်ပညာနဲ့ ပိတ်ကားပေါ်ကနေ ဖွင့်ဟ လိုက်တာ ဖြစ်ပါတယ်။
ဒီနောက် ၁၀ နှစ် အကြာ ၂၀၁၃ ခုနှစ်မှာ Spike Jonze ကနေ 'Her' ရုပ်ရှင်ကို ရိုက်ကူးပြီးတော့ သူ့ရဲ့ ခံစားချက်တွေကို တစ်ဖန် ပြန်ဖြောင့်ချက် ပေးခဲ့ပါတယ်။ အိမ်ထောင်ရေး ပြိုကွဲပြီးတဲ့နောက်မှာ ဘယ်လောက်ထိ အထိနာသွားလဲဆိုတာကို သူက ပိတ်ကားထက်ကနေတစ်ဆင့် ပြန်လည် တုန့်ပြန်ခဲ့တာ ဖြစ်ပါတယ်။
ထူးခြားချက်တစ်ခုက Lost In Translation က Charlotte ပြီးတော့ Her က Samantha တို့နေရာမှာ သရုပ်ဆောင်ခဲ့သူက Scarlett Johansson ဖြစ်နေတယ် ဆိုတာပါပဲ။ ပြောရရင် ဒီနှစ်ယောက်က Scarlett Johansson ကို ကြားခံထားပြီးတော့ သူတို့ရဲ့ ခံစားချက်တွေကို ဝန်ခံ ဖြောင့်ချက်ပေးခဲ့တယ် ဆိုတာပါပဲ။
ဘယ်လို ဆက်ဆံရေးမျိုးမှာပဲ ဖြစ်စေ ချစ်ခြင်းမေတ္တာအပြင် နာကျည်းမှုတွေ၊ ခါးသီးမှုတွေ ပြီးတော့ အထီးကျန်ရမှုတွေ ရှိတတ်တာက သဘာဝပါ။ ဒါပေမဲ့ များသောအားဖြင့် ဒီခံစားချက်တွေကို နှုတ်ကနေ ဖွင့်ဟ ပြောဖို့ရာ မဖြစ်နိုင်သလောက်ပါပဲ။ ပြောပြန်ရင်လည်း တစ်ဖက်လူက နားထောင်ပေးနိုင်စွမ်း ရှိဦးမှ ဖြစ်ပါတယ်။ နားထောင်ပေးနိုင်ရင်တောင် နားလည်ခံစားနိုင်စွမ်းက လိုအပ်ပြန်ပါသေးတယ်။
Sofia Coppola နဲ့ Spike Jonze နှစ်ဦးသားတို့ကတော့ သူတို့ရဲ့ ခံစားချက်တွေကို ရုပ်ရှင် အတတ်ပညာနဲ့ ဝန်ခံဖြောင့်ချက်ပေးပြီးတော့ အထီးကျန်မှု၊ ချစ်ခြင်းမေတ္တာ ငတ်မွတ်မှုတွေကို ဖော်ပြခဲ့ကြပါတယ်။ သိမ်သိမ်မွေ့မွေ့လေးနဲ့ သူတို့တွေ ဘယ်လောက်ထိ အထီးကျန်နေရသလဲဆိုတာကို ပိတ်ကားကနေတစ်ဆင့် ပြောပြခဲ့တာ ဖြစ်ပါတယ်။
ဒါပေမဲ့ တွေးကြည့်ရင် ဝမ်းနည်းစရာ တစ်ခု ရှိနေပြန်ပါသေးတယ်။ ဒါကတော့ ဒီနှစ်ယောက်က သူတို့ရဲ့ ခံစားချက်တွေကို ရုပ်ရှင်ကားအဖြစ် ပြောင်းလဲဖော်ပြ နိုင်ခဲ့ကြပေမဲ့ တစ်ယောက်စကားကို တစ်ယောက်က နားထောင်ပေးနိုင်စွမ်း ရှိခဲ့ကြပုံ မရပါဘူး။ တစ်ယောက် ခံစားချက်ကို တစ်ယောက်က နားလည်းပေးနိုင််စွမ်း ရှိပုံ မရခဲ့ပါဘူး။
ဝမ်းနည်းကြေကွဲဖွယ်ရာပါပဲ။
အခုအချိန်မှာတော့ နှစ်ယောက်သားက သူငယ်ချင်းအဖြစ် ဆက်ရှိနေပြီး တစ်ယောက်အလုပ်ကို တစ်ယောက်က ဝန်းရံပေးနေပါတယ်။
