ရန်ကုန်မြို့ကို တွဲဖက်တာဝန်နဲ့ရောက်လာတဲ့ ပညာရေးဝန်ထမ်းစစ်ရှောင်အချို့ နေစရာအခက်အခဲဖြစ်နေ
ဇွန် ၁၆ - ၂ဝ၂၅
KKO(VOM)
ရန်ကုန်မြို့ကို တွဲဖက်တာဝန်နဲ့ စစ်ဘေးရှောင်အဖြစ်ပြောင်းရွှေ့လာရတဲ့ ပညာရေးဝန်ထမ်းအချို့ ယခုကျောင်းဖွင့်ရာသီမှာ နေစရာအခက်အခဲတွေများစွာဖြစ်ပေါ်နေတယ်လို့ ပညာရေးအသိုင်းအဝိုင်းနဲ့ နီးစပ်သူတွေက VOM ကို ပြောပါတယ်။
လက်နက်ကိုင်ပဋိပက္ခတွေဖြစ်ပွားရာဒေသ အသီးသီးက ပညာရေးဝန်ထမ်းတွေဟာ ပြီးခဲ့တဲ့နှစ်ပိုင်းကာလတွေကစလို့ ရန်ကုန်တိုင်းဒေသကြီးအတွင်းက ဒဂုံမြို့သစ်(မြောက်ပိုင်း)မြို့နယ်၊ ဒဂုံမြို့သစ်(အရှေ့ပိုင်း)မြို့နယ် အစရှိတဲ့ မြို့နယ်အသီးသီးသို့ စစ်ဘေးရှောင်ပညာရေးမိသားစုတွေအဖြစ်ရောက်ရှိလာခဲ့ခြင်းဖြစ်ပြီး လက်ရှိမှာတော့နေထိုင်စရာအခက်အခဲတွေဖြစ်ပေါ်နေတာဖြစ်တယ်လို့ သိရပါတယ်။
"စစ်ဖြစ်တဲ့ဒေသအသီးသီးကနေလာကြတဲ့ပညာရေးဝန်ထမ်းတွေပေါ့။သူတို့ကိုရန်ကုန်မြို့ကသက်ဆိုင်ရာကျောင်းတွေမှာတွဲဖက် တာ၀န်ချထားခဲ့ပေမယ့်အချို့သောမြို့နယ်တွေမှာ စစ်ဘေးရှောင်ပညာရေး ၀န်ထမ်းတွေအတွက်နေထိုင်စရာအခက် အခဲတွေကအတော်လေးဖြစ်နေတယ်။သူတို့ရဲ့ဝန်ထမ်းလစာနဲ့ ဆိုတော့အိမ်ငှားရမ်းပြီးမနေနိုင်ကြဘူး။အခုမြို့နယ်တခုမှာဆိုရင်တွဲဖက်တာ၀န်ကျတဲ့ကျောင်းအတွင်းမှာပဲနေထိုင်ဖို့သက်ဆိုင်ရာကျောင်းအုပ်ကြီးတွေကိုမေတ္တာ ရပ်ခံပေမယ့်နေထိုင်စရာအဆင်မပြေမှုတွေကိုကြုံနေရတယ်လို့ ဆရာမတယောက်ကပြောပြလာတယ်။အဲဒီဆရာမဆိုရင်သူတို့က ရခိုင်ပြည်နယ်မြောက်ပိုင်း စစ်ဘေးဒဏ်ကြောင့်ရန်ကုန်ကိုပြောင်းရွှေ့လာရတဲ့ပညာရေးဝန်ထမ်းမိသားစုပါ။ရခိုင်မှာရှိတဲ့အိုးအိမ်တွေအားလုံးထားခဲ့ရတယ်"လို့ ပညာရေးအသိုင်း အဝိုင်းနဲ့ နီးစပ်သူတယောက်က ပြောပါတယ်။
အစိုးကလည်းစစ်ဘေးရှောင်ပညာရေးဝန်ထမ်းတွေအတွက် ထောက်ပံ့ကြေးတွေလစဥ်ပေးနေပေမယ့် ဒါကလည်းလောက်ငမှုမရှိဘူးလို့ ဆိုပါတယ်။
"အစိုးရကလစဉ်တယောက်ကိုနှစ်သောင်းထောက်ပံ့ကြေးပေးတယ်။အဲဒါလည်းမလုံလောက်ကြပါဘူး။ဆင်ပါးစပ်နှမ်းပက်သလိုဖြစ်နေတယ်။သူတို့ရတဲ့လစာနဲ့ချိန်ထိုးကြည့်လိုက်ရင်နေစရာ၊ထိုင်စရာဆိုတာကလည်းရန်ကုန်ဈေးနဲ့ဘယ်ငှားနေနိုင်ကြပါ့မလဲ၊အောက်ခြေမြေပြင်မှာဒီလိုတွေဖြစ်နေတယ်"လို့ သူက ဆက်ပြီး ပြောပြပါတယ်။
လက်ရှိ ရန်ကုန်မြို့ရဲ့ အိမ်ငှားရမ်းခဈေးနှုန်းတွေဟာ မြို့စွန်ဆင်ခြေဖုံးရပ်ကွက်တွေမှာတောင် ပေ ၂ဝ ပတ်လည်တိုက်ခန်းတခန်းကို တလကိုငှားရမ်းခနှုန်းထားက ကျပ် တသိန်းခွဲလောက်ရှိနေပြီး အခန်းအမျိုးအစားနဲ့ အလွှာ၊ရပ်ကွက်နဲ့ လမ်းအပေါ်မူတည်ပြီး တလကိုကျပ်နှစ်သိန်းခွဲကနေ ကျပ်သုံးသိန်းအထိအိမ်ငှားရမ်းကနှုန်းထားတွေကရှိနေတာဖြစ်တယ်လို့ သိရပါတယ်။
"အခုကာလမှာ အိမ်ငှားနေဖို့ဆိုတာကဝင်ငွေနည်းအခြေခံပြည်သူတွေအတွက်အတော်ကိုမလွယ်တဲ့ကိစ္စပါ။ဆင်ခြေဖုံးရပ်ကွက်တွေမှာတောင်အခုက အနည်းဆုံးအိမ်လခက အောက်ထိပ်နှစ်သိန်းပါပဲ၊ ဒါကအနည်းဆုံးဈေးပါ။နေရာ၊ရပ်ကွက်လမ်းအပေါ်မူတည်ပြီးအိမ်ငှားခတွေကအစားစားရှိပါတယ်။နောက်အိမ်ရှင်တွေကလည်းခြောက်လတခါ၊တနှစ်တခါအိမ်လခအမြဲတိုးတောင်းတယ်၊တက်တယ်။တိုးယူတယ်၊အဲဒီအခက်အခဲတွေကလည်းအိမ်ငှားတွေမှာအများကြီးရှိတယ်။နှစ်ပြည့်လို့အိမ်လခ ငါးသောင်း၊ တသိန်းအမြဲတက်တယ်။အိမ်ငှားတွေကလည်းတခါတခါ အိမ်စာချုပ်ချုပ်နိုင်ဖို့ အိမ်လခကိုအလျင်မီအောင်ရှာရတာပေးရတာအတော်မလွယ်တဲ့ကိစ္စပါ"လို့ ရန်ကုန်မြို့က အိမ်ခြံမြေအကျိုး ဆောင်လုပ်ငန်း လုပ်ကိုင်သူတယောက်က ပြောပါတယ်။
ပြီးခဲ့တဲ့ ၂ဝ၂၄ ခုနှစ်အတွင်းမှာတော့ မြန်မာနိုင်ငံတဝန်းမှာ စစ်ဘေးရှောင် ဒုက္ခသည် ၆ ဒဿမ ၆ သန်းအထိ ရှိလာပြီဖြစ်တယ်လို့ မြန်မာ့မဟာ ဗျူဟာနှင့် မူဝါဒရေးရာလေ့လာရေးအဖွဲ့ (Institute for strategy and policy Myanmar)က ထုတ်ပြန်ထားပါတယ်။
အဲဒီအစီရင်ခံစာအရ ပြည်တွင်းမှာ စစ်ဘေးရှောင် ၆ ဒဿမ ၆ သန်းအနက် ၄၂ ရာခိုင်နှုန်းဟာ စစ်ကိုင်းတိုင်းမှဖြစ်ပြီး ဒုတိယအများဆုံးက ကရင်ပြည်နယ်မှဖြစ်ကာ စစ်ဘေးဒုက္ခသည် (၈)သိန်းအထိရှိနေသလို တတိယအများဆုံးက ရခိုင်ပြည်နယ်ဖြစ်ပြီး စစ်ဘေးရှောင် အရေအတွက်(၆) သိန်းကျော်အထိရှိနေတယ်လို့ ဆိုပါတယ်။
ဒါအပြင် မကွေးတိုင်းနှင့် ရှမ်းပြည်နယ်တို့မှာစစ်ဘေးဒုက္ခသည် စုစုပေါင်း(၄)သိန်းကျော်အထိရှိနေတာဖြစ်တယ်လို့ ISP Myanmar က ဆိုပါတယ်။