❝ သော်တာဆွေ၏ ဘဝ ဝတ္ထုများ ❞
“ဘဝ၏အစမှာ အသက် ၄ဝ အရွယ်တွင်ဖြစ်သည်”
ဟု ဆိုစကားရှိ၏။ ထိုစကားသည် အခြားသူများထက် သော်တာဆွေ၏အဖို့ ပို၍မှန်ပေမည်။ သော်တာဆွေသည် နာမည် ရ ကလောင်သက်တမ်း ၆ နှစ်ကျော်၊ အသက်အားဖြင့် ၃၄ နှစ်တွင်မှ ရှေးဦးဆုံး ဘဝဝတ္ထုတစ်ပုဒ် စတင်ရေးခဲ့သောကြောင့် သော်တာဆွေအဖို့ ဘဝအစမှာ ၄ဝ နီးပါး တွင် ဖြစ်တော့သည်။
သော်တာဆွေ ကလောင်အမည်ကို ၁၉၄၇ ခု၊ သြဂုတ်လထုတ် ရှုမဝတွင် “ဘရန်ဒီ တစ်ပုလင်း” ဖြင့် စတင်ခဲ့၏။ ထိုဝတ္ထုမှာ ဟာသာနှောရော လူ့သဘာဝ ဝတ္ထုတစ်ပုဒ်ပင်ဖြစ်၏။ သို့သော် “ဟာသလိုင်းတွင် ရေးသူနည်းသည်၊ ကြိုးစားပါ” ဟု တိုက်တွန်းသော ဆရာကြီးရွှေဥဒေါင်း၏ ဆန္ဒကြောင့် ဟာသဝတ္ထုဆရာအဖြစ် ၆ နှစ်ကျော် စွဲစွဲမြဲမြဲ ရပ်တည်ခဲ့ရ၏။ ပရိသတ်ကလည်း ရှိသည်။
ဟာသစာရေးဆရာအဖြစ်မှ လူ့သဘာဝ၊ လူ့ဘဝ စာရေးဆရာအဖြစ်သို့ စတင် ပြောင်းလဲရန် မရွံ့မရဲ ကြိုးစားခဲ့ရသည်။ ထိုသို့လိုင်းပြောင်းသော ပထမဆုံး ဘဝဝတ္ထုကို ရေးသားရာတွင် အပယ်ခံရမည်လားဟု တထင့်ထင့်ဖြစ်ခဲ့ရသည်ဟု ၁၉၇၁ ခု၊ ဒီဇင်ဘာလထုတ် ရှုမဝ “ကျွန်တော်နှင့် စာပေဗိမာန်ဆု”တွင် ပြန်လည်ဖော်ပြခဲ့၏။ ထိုဘဝဝတ္ထု၏ အစမှာ ၁၉၅၃ ခု၊ ဇွန်လထုတ် ရှုမဝမဂ္ဂဇင်းပါ ကြုံခဲ့ရသည်”ဝတ္ထု ဖြစ်သည်။
ကြုံခဲ့ရသည်” စွံသောအခါ ဘဝဝတ္ထုများ ဆက်တိုက်ရေးလာခဲ့လေသည်။ စာဖတ်ရင့်ကျက်သူများကလည်း အားပေးခဲ့သဖြင့် ဟာသစာရေးဆရာသည် ဘဝ စာရေးဆရာ ဖြစ်လာခဲ့လေပြီ။ ထို့ကြောင့်လည်း အသက် ၃၄ နှစ်တွင်မူ သော်တာဆွေ သည် ဘဝကိုစခဲ့သည်ဟု ဆိုခဲ့ခြင်းပေတည်း။
ယနေ့အထိ သော်တာဆွေသည် ဘဝဝတ္ထုများကို မဂ္ဂဇင်းများတွင် မပြတ်ရေးခဲ့ သလို ထိုဝတ္ထုတိုများကို ပြန်လည်၍ ဝတ္ထုတိုပေါင်းချုပ် ၄ အုပ် ထုတ်ဝေခဲ့ပြီး ဖြစ်လေ သည်။ ၎င်းတို့မှာ...
• ဘ၀ထိုထို
(၁၉၆၁၊ စာပေဗိမာန် ဝတ္ထုတိုပေါင်းချုပ် ဆုရ)၊
• ပြည်မြန်မာ၏ ပြယုဂ်များ
• သတ္တဝါတို့၏ သံသရာ
(၁၉၆၄၊ ဝတ္ထုတိုပေါင်းချုပ် ဒုတိယဆု)၊
•ဤလောကမြေမဟီဝယ် (၁၉၇ဝ၊
အမျိုးသားစာပေဆုရ ဝတ္ထုတိုပေါင်းချုပ်)
- - စာသုသီ - -
