#ပြည်တွင်းသတင်း
◼ဗိုလ်ချုပ်အောင်ဆန်းပြတိုက်(ရန်ကုန်)အား အထူးပြပွဲပြသရန်ပြင်ဆင်မှုများပြုလုပ်စဉ် ယာယီပိတ်မည်
ရန်ကုန်မြို့၊ ဗဟန်းမြို့နယ်၊ ဗိုလ်ချို ရပ်ကွက်ရှိ ဗိုလ်ချုပ်အောင်ဆန်းပြတိုက်(ရန်ကုန်)အား အထူးပွဲပြသရန်ပြင်ဆင်မှုများပြုလုပ်စဉ် ယာယီပိတ်မည်ဖြစ်ကြောင်း ရှေးဟောင်းသုတေသန နှင့် အမျိုးသားပြတိုက်ဦးစီးဌာနမှ ထုတ်ပြန်သည်။
ဗိုလ်ချိုရပ်ကွက်၊ဗိုလ်ချုပ်ပြတိုက်လမ်း၊အမှတ် (၂၅)ရှိ အဆိုပါပြတိုက်အား ဇွန် ၁၇ ရက် မှ ဇူလိုင် ၁၈ ရက်အထိ ယာယီပိတ်ထားမည်ဖြစ်ပြီး လာမည့် (ဇူလိုင် ၁၉ရက်)တွင် ကျရောက်မည့် (၇၈)နှစ်ပြည့်၊အာဇာနည်နေ့အထိမ်းအမှတ် အထူးပြပွဲ ခင်းကျင်းပြသရန်အတွက် ပြင်ဆင်မှု လုပ်ငန်းများ ဆောင်ရွက်မည်ဖြစ်၍ ယာယီပိတ်ထားခြင်းဖြစ်ကြောင်း ထုတ်ပြန်ချက်တွင်ဖော်ပြထားသည်။
အဆိုပါ ဗိုလ်ချုပ်အောင်ဆန်းပြတိုက်(ရန်ကုန်)ကို (၇၈)နှစ်ပြည့်၊အာဇာနည်နေ့တွင် ပြန်လည်ဖွင့်လှစ်မည်ဖြစ်ပြီး ယခင်နှစ်များအတိုင်း အခမဲ့ ၀င်ရောက်နိုင်ကြောင်းသိရသည်။
ယင်း ပြတိုက်အား တနင်္လာနေ့ နှင့် အများပြည်သူရုံးပိတ်ရက်များမှလွဲ၍ ကျန်ရက်များတွင် နံနက် ၉နာရီခွဲမှ ညနေ ၄နာရီခွဲအထိ ဖွင့်လှစ်ပြီး သံဃာတော်များ၊ သီလရှင်များ နှင့်ပြည်တွင်းနေထိုင်သူများအား အခမဲ့ဝင်ရောက်ခွင့်ပြုထားကာ နိုင်ငံခြားသားများကိုမူ၀င်ကြေးကောက်ခံကြောင်းသိရသည်။
သတင်း-အင်ကြင်း
ဓာတ်ပုံ-National Museum/Yangon
