#ပြည်တွင်းသတင်း
◼အင်းလေးကန်စိုးရိမ်ရေအမှတ်သုံးပေကျော်လွန်နေ၊ ရေကြီးရေလျှံဖြစ်မည်ကိုဒေသခံများစိုးရိမ်
ရှမ်းပြည်နယ်(တောင်ပိုင်း)၊ အင်းလေးဒေသ၌ မိုးသည်းစွာရွာသွန်းနေခြင်းကြောင့် အင်းလေးကန် အတွင်း ရေများမြင့်တက်လာရာ ယနေ့(ဇွန် ၁၅ ရက်)တွင် စိုးရိမ်ရေအမှတ်ထက်သုံးပေကျော်ရောက် ရှိနေသည့်အတွက် ရေဆက်တက်လာမည်ကိုစိုးရိမ်လျက်ရှိကြောင်း ဒေသခံများထံမှသိရသည်။
တောင်ကြီး၊ ကလော၊ အောင်ပန်၊ ညောင်ရွှေ၊ ရွှေညောင်စသည့်မြို့များတွင်လည်း မိုးသည်ထန်စွာရွာသွန်းခြင်းကြောင့် ရေကြီးရေလျှံခြင်းများဖြစ်ပေါ်နေပြီး ၎င်းရေများမှာ အင်းလေးကန်အတွင်းသို့ စီးဆင်းလာမည်ဖြစ်သည့်အတွက် အင်းလေးကန်၌ရေကြီးရေလျှံခြင်းများဖြစ်ပေါ်လာမည်ကို စိုးရိမ်းလျက်ရှိကြောင်း အင်းလေးဒေသတွင် သီတင်းသုံးနေထိုင်သည့် ဆရာတော်တစ်ပါးက မိန့်ကြားသည်။
"မိုးကနေ့ရောညပါရွာနေတာသုံးရက်ရှိပြီ။ အင်းထဲမှာရေက သုံးပေလောက်စိုးရိမ်ရေမှတ်ကိုကျော်နေ တယ်။ တောင်ကျရေတွေလည်းဆင်းလာပြီဆိုတော့ အခြေနေကစိုးရိမ်ရတာပေါ့။ မနှစ်ကလည်း ဒေသခံတွေ အခုလိုဖြစ်စဉ်ကြုံခဲ့ရတာ။ အဲဒီလိုဖြစ်မလား၊ အဲဒီထက်ဆိုးမလားဆိုပြီးစိုးရိမ်ကြတာ။ နောက်ထပ်သုံးပေကျော်လောက်ထပ်တက်လာရင် အင်းထဲမှာရှိတဲ့အိမ်တွေမြုပ်တော့မှာ။ အခုနှစ်ထပ် အိမ် အောက်ထပ်တွေမြုပ်ကုန်ပြီ။ တောင်ပေါ်မှာလည်းမိုးကကောင်းနေတော့ အဲဒီတောင်ကျရေတွေက အင်းလေးကန်ထဲကိုစီးဝင်လာမှာဆိုတော့ မနှစ်ကထက်ရေကြီးမှုဆိုးလာမှာကိုစိုးရိမ်ရပါတယ်" ဟု အဆိုပါဆရာတော်က မိန့်ကြားသည်။
လက်ရှိတွင် ရွှေညောင်မြို့၌ရေကြီးနေသည့်ရပ်ကွက်နှင့် ကျေးရွာများမှဒေသခံများကို မီးသတ်တပ်ဖွဲ့ ဝင်များ၊ လူမှုကူညီရေးအသင်းဝင်များက ပရိယတ္တိစာသင်တိုက်အတွင်းရှိ ဇေယျာသီရိဓမ္မာရုံနဲ့ ဒက္ခိဏာရာမဘုန်းတော်ကြီးကျောင်းတိုက်တွင် ရေဘေးယာယီကယ်ဆယ်ရေးစခန်းဖွင့်၍ ကူညီပေးထားကြောင်းသိရသည်။
သတင်း - ပိုင်လေး
