#နိုင်ငံတကာသတင်း
◼အမေရိကန်ပြည်နယ်အမတ်နှစ်ဦးအားလုပ်ကြံပစ်ခတ်ခဲ့သူကိုပိုက်စိပ်တိုက်ရှာဖွေနေ
ပစ်မှတ်ထားသော နိုင်ငံရေးအကြမ်းဖက်လုပ်ရပ်ဟု ပြည်နယ်အုပ်ချုပ်ရေးမှူး တင်မ်ဝေါ့ဇ် က ပြောကြားသော ဖြစ်ရပ်၌ ယမန်နေ့ နံနက်ပိုင်းက မင်နီဆိုတာပြည်နယ် လွှတ်တော်အမတ်နှစ်ဦး သေနတ်ဖြင့် ပစ်ခတ်ခံခဲ့ရကာ တစ်ဦးသေဆုံးခဲ့ပြီးနောက် ကျူးလွန်သူအား ပိုက်စိတ်တိုက်ရှာဖွေမှုလုပ်ဆောင်နေကြသည်။
ရဲအရာရှိတစ်ဦးအဖြစ် ဟန်ဆောင်ခဲ့သည် ဆိုသော သံသယရှိသူကိုရဲတပ်ဖွဲ့ကရှာဖွေနေပြီးအသက် (၅၇) နှစ်အရွယ် ဗန့်လူသာဘိုလ်တာဖြစ်ကြောင်း ရဲတပ်ဖွဲ့ က ထုတ်ပြန်ထားကာ၎င်းကို ဖမ်းမိရန် သတင်းပေးသူအား ဆုကြေးငွေဒေါ်လာငါးသောင်းချီးမြင့်မည်ဟုလည်း ထုတ်ပြန်ထားသည်။
သံသယရှိသူ ဘိုလ်တာသည် ပြည်နယ်အထက် လွှတ်တော်အမတ် ဟော့ဖ်မန်းနှင့်အတူပြည်နယ်၏လုပ်သားအင်အားဖွံ့ဖြိုးတိုးတက်ရေးဘုတ်အဖွဲ့တွင် အတူတူ တာဝန်ထမ်းဆောင်ခဲ့သည် ဆိုသော်လည်း ၎င်းက ယင်းနိုင်ငံရေးသမားနှစ်ဦးနှင့် သိကျွမ်းသည်လားဆိုခြင်းကို ရဲတပ်ဖွဲ့ က စုံစမ်းစစ်ဆေးနေသည်။
ပြစ်မှုကျူးလွန်သူက အမတ်များ၏ နေအိမ်သို့ ရဲဝတ်စုံ၊ ရဲရင်ထိုးတံဆိပ် များ ဖြင့်အသွင်ယူဝင်ရောက်ခဲ့ပြီး အရေးပေါ်မီးများပါသော ရဲကားနှင့် ဆင်တူသော ကားတစ်စီးကိုလည်း အသုံးပြုခဲ့ကြောင်း ရဲတပ်ဖွဲ့ က ပြောကြားသည်။
ဒီမိုကရက်အမတ်တစ်ဦးဖြစ်သူ အသက်(၅၅) နှစ်အရွယ် မယ်လီဆာဟော့မန်း နှင့် ခင်ပွန်းသည်တို့နှစ်ဦး မီနီယာပိုလစ်မြို့အနီးမှ ဘရွတ်ကလင်းပါ့ခ် မြို့တွင် ပစ်ခတ်ခံရပြီး သေဆုံးသွားခဲ့ခြင်းဖြစ်သည်။
အခြားဒီမိုကရက်တစ်ဦးဖြစ်သူ အသက်(၆၀) နှစ်အရွယ် ဂျွန်ဟော့ဖ်မန်း နှင့် ဇနီးသည်တို့လည်း ပထမပစ်ခတ်မှုမှ ကိုးမိုင်ဝေးသော ၎င်းတို့၏ နေအိမ်တွင် ပစ်ခတ်ခံခဲ့ရသည်။
ယင်းအမတ်မှာ ခွဲစိတ်ကုသမှုခံယူခဲ့ရပြီးနောက် တည်ငြိမ်သောအနေအထားတွင် ရှိကြောင်းသိရသည်။
ပြည်နယ်အထက်လွှတ်တော်အမတ် ဟော့ဖ်မန်းနှင့် ဇနီးသည်တို့ ပစ်ခတ်ခံရမှု နှင့် ဆက်စပ်သော ဖုန်းခေါ်ဆိုမှုအား ရဲတပ်ဖွဲ့ က ဒေသစံတော်ချိန် ည ၂ နာရီတွင် လက်ခံရရှိခဲ့ပြီး နောက်တစ်နာရီခွဲခန့်အကြာတွင် လွှတ်တော်ဥက္ကဌ မစ္စက်ဟော့မန်း နှင့် ဆက်စပ်သော ဖုန်းခေါ်ဆိုမှုကို လက်ခံခဲ့ရကြောင်း ဘီဘီစီ သတင်းအရ သိရသည်။
မစ္စက်ဟော့မန်း၏ နေအိမ်တွင် ရဲတပ်ဖွဲ့နှင့် သံသယရှိသူအကြား အပြန်အလှန်ပစ်ခတ်မှု ဖြစ်ခဲ့သော်လည်း ၎င်းက ထွက်ပြေးလွတ်မြောက်သွားခဲ့သည်။
ရဲတပ်ဖွဲ့ဝင် ရာပေါင်းများစွာနှင့်အတူ အက်ဖ်ဘီအိုင်အရာရှိများ၊ အထူးတပ်ဖွဲ့များ အားလုံံး ပူးပေါင်း၍ ပြစ်မှုကျူးလွန်သူအား ပိုက်စိတ်တိုက်ရှာဖွေမှုများ လုပ်ဆောင်နေကြောင်း ဘရွတ်ကလင်းပါ့ခ်မြို့ ရဲတပ်ဖွဲ့ အကြီးအကဲ မာ့ခ်ဘရူလီ က ပြောကြားသည်။
ယခုကဲ့သို့သော တုန်လှုပ်ဖွယ်ရာအကြမ်းဖက်မှုအား အမေရိကန်နိုင်ငံတွင် သီးခံမည်မဟုတ်ကြောင်း၊ ပါဝင်ပတ်သက်သူမှန်သမျှကို အာဏာပိုင်များက ဥပဒေအတိုင်းအတာ အဆုံးအထိ ဖမ်းဆီးအရေးယူသွားမှာ ဖြစ်ကြောင်း အမေရိကန်သမ္မတ ဒေါ်နယ်ထရန့်ကလည်း ထုတ်ပြန်ပြောကြားခဲ့သည်။
သတင်း-ရဲမင်း
ကိုးကား-BBC
