မလေးရှား Scientex ကုမ္ပဏီ မြန်မာပြည်ရှိ ပလပ်စတစ်ထုတ်ပိုးမှုလုပ်ငန်းမှ နှုတ်ထွက်မည်
ရန်ကုန်၊ ဇွန် ၁၂
မလေးရှားနိုင်ငံအခြေစိုက် ပလပ်စတစ်ထုတ်ပိုးမှုကုမ္ပဏီ Seientex က ၎င်းရဲ့ မြန်မာပြည်လုပ်ငန်းခွဲ Daibochi Packaging Myanmar မှ နှုတ်ထွက်ဖို့ ဆုံးဖြတ်ခဲ့ကြောင်း ဇွန်လ ၉ ရက်နေ့မှာ ထုတ်ပြန်ခဲ့တဲ့ အစီရင်ခံစာမှာ ဖော်ပြထားပါတယ်။
လာမယ့်ရက်များအတွင်း Daibochi Packaging မှာ တိုးတက်မှုအရိပ်အယောင်တွေ မတွေ့ရတာကြောင့် မြန်မာနိုင်ငံက လုပ်ငန်းတွေကို နှုတ်ထွက်မယ်လို့ ဆိုပါတယ်။
မလေးရှားကုမ္ပဏီအနေနဲ့ ၂၀၁၇ ခုနှစ်မှာ မြန်မာကုမ္ပဏီ Myanmar Smart Pack Industrial နဲ့ ပူးပေါင်းကာ Daibochi Packaging Myanmar ဖက်စပ်ကုမ္ပဏီကို ထူထောင်ပြီး ရင်းနှီးမြှုပ်နှံလုပ်ကိုင်ခဲ့ပါတယ်။
ဖက်စပ်ကုမ္ပဏီမှာ Scientex က ရှယ်ယာ ၆၀ ရာခိုင်နှုန်းပိုင်ဆိုင်ကာ အမေရိကန်ဒေါ်လာ ၆.၈ သန်းရင်းနှီးမြှုပ်နှံခဲ့ပြီး မြန်မာကုမ္ပဏီက ရှယ်ယာ ၄၀ ရာခိုင်နှုန်း ပိုင်ဆိုင်ပါတယ်။
အဲ့ဒီနောက် မြန်မာနိုင်ငံရင်းနှီးမြှုပ်နှံမှုကော်မရှင် (MIC) ခွင့်ပြုမိန်နဲ့ လှိုင်သာယာမြို့နယ်က စက်မှုဇုန်-၂ မှာ အစားအသောက်၊ လူသုံးကုန်ပစ္စည်းနဲ့ စက်မှုကုန်ပစ္စည်းများအတွက် ထုတ်ပိုးပစ္စည်းအမျိုးမျိုး ထုတ်လုပ်ရောင်းချခြင်းလုပ်ငန်းတွေ ဆောင်ရွက်ခဲ့ပါတယ်။
Scientex ရဲ့ မြန်မာပြည်လုပ်ငန်းခွဲ ပလတ်စတစ်ထုတ်ပိုးမှုလုပ်ငန်းမှ ဝင်ငွေဟာ ၂၀၂၄ မှာ ကုမ္ပဏီစုစုပေါင်းဝင်ငွေရဲ့ ၃.၈ ရာခိုင်နှုန်းသာ ရှိခဲ့ပါတယ်။
လက်ရှိဖြစ်ပေါ်နေတဲ့ စီးပွားရေးနဲ့ နိုင်ငံရေးမတည်ငြိမ်မှုတွေကြောင့် မလေးရှားနိုင်ငံအခြေစိုက် ပလပ်စတစ်ထုတ်ပိုးသူအနေနဲ့ ပြီးခဲ့တဲ့နှစ်အနည်းငယ်အတွင်း မြန်မာနိုင်ငံမှာ လုပ်ငန်းလည်ပတ်မှုဆိုင်ရာ စိန်ခေါ်မှုတွေနဲ့ ရင်ဆိုင်ခဲ့ရပါတယ်။
အခုလိုရပ်ဆိုင်းမှုမှ လုပ်ငန်းလည်ပတ်မှုနဲ့ ဘဏ္ဍာရေးဆိုင်ရာ အကျိုးသက်ရောက်မှုတွေကို လျှော့ချဖို့ လုပ်ဆောင်မှာဖြစ်ပြီး ၎င်းရဲ့ ကုန်ကျစရိတ်တွေကို ဂရုတစိုက်စီမံခန့်ခွဲခြင်းအပေါ် ဆက်လက်အာရုံစိုက် လုပ်ဆောင်သွားမယ်လို့ ကြေညာချက်မှာ ဖော်ပြထားပါတယ်။
