မြေရှားသတ္ထု ပြန်လည်တင်ပို့ရေးနဲ့ တရုတ်ကျောင်းသားတွေ ဗီဇာကိစ္စ အမေရိကန်နဲ့ တရုတ်သဘောတူ
ဝါရှင်တန်၊ ဇွန်-၁၂-၂၀၂၅
ရတီ(VOM)
အမေရိကန်နဲ့ တရုတ်နိုင်ငံတို့အကြား ကုန်သွယ်ရေးတင်းမာမှုဖြေလျှော့ရေး ရည်ရွယ်တဲ့ ဆွေးနွေးပွဲဟာ သဘောတူညီချက်တရပ်နဲ့အတူ ပြီးဆုံးခဲ့ကြောင်း အမေရိကန်သမ္မတ ဒေါ်နယ်ထရန့်က ထုတ်ဖော်ပြောဆိုလိုက်ပါတယ်။
တရုတ်နိုင်ငံဟာ အမေရိကန်ကုမ္ပဏီတွေကို မြေရှားသတ္တုနဲ့ အခြားအရေးပါတဲ့ သတ္တုတွေ ပြန်လည်ရောင်းချပေးဖို့ သဘောတူခဲ့ပြီး အမေရိကန်ကလည်း တရုတ်ကျောင်းသားတွေကို ဗီဇာရုပ်သိမ်းမယ့် အစီအစဉ်ကို ပြန်လည်ရုပ်သိမ်းခဲ့တယ်လို့ ဒေါ်နယ်ထရန့်က ပြောပါတယ်။
ဒီသဘောတူညီချက်အတွက် သမ္မတရှီနဲ့အတူ ခွင့်ပြုသွားမယ်လို့ ထရန့်ကပြောပါတယ်။ နှစ်နိုင်ငံအကြား ကုန်သွယ်ရေးစစ်ပွဲ တင်းမာမှုတွေကို ဖြေလျှော့ဖို့ ဂျီနီဗာဆွေးနွေးပွဲအပြီး သဘောတူညီချက်ရရှိခဲ့ပေမယ့် ချိုးဖောက်မှုများရှိတယ်လို့ နှစ်ဖက်စလုံးက အပြန်အလှန် စွပ်စွဲနေပါတယ်။
အဲဒီနောက်မှာတော့ သမ္မတဒေါ်နယ်ထရန့်နဲ့ တရုတ်သမ္မတ ရှီကျင်းပင်တို့ ပြီးခဲ့တဲ့ သီတင်းပတ်အတွင်းက တယ်လီဖုန်းဆက်သွယ်ဆွေးနွေးခဲ့ပြီး နှစ်နိုင်ငံထိပ်တန်းတာဝန်ရှိသူတွေ တွေ့ဆုံဆွေးနွေးဖို့ သဘောတူခဲ့ကြပါတယ်။
တင်းမာမှုတွေ ဖြေရှင်းဖို့ လန်ဒန်မှာ နှစ်ရက်ကြာဆွေးနွေးပြီးနောက် သဘောတူညီချက် ထပ်မံရရှိခဲ့တာဖြစ်ပါတယ်။ တရုတ်နိုင်ငံကတော့ သဘောတူညီချက်ပတ်သက်ပြီး အသေးစိတ်အချက်အလက်တွေကို ထုတ်ဖော်ပြောကြားတာမျိုးမရှိသေးပါဘူး။
နှစ်ဖက်စလုံးအနေနဲ့ ဂျီနီဗာသဘောတူညီချက်ကို အကောင်အထည်ဖော်ဖို့ မူဘောင်တရပ်ကို ရရှိခဲ့ပြီး သမ္မတနှစ်ယောက် အတည်ပြုပြီးတာနဲ့ အကောင်အထည်ဖော်ဖို့ ကြိုးပမ်းသွားမယ်လို့ အမေရိကန်ကူးသန်းရောင်းဝယ်ရေးဝန်ကြီး ဟောင်းဝပ်လပ်နစ်က ပြောပါတယ်။
