#ယနေ့ထုတ်သတင်းစာ_နိုင်ငံတကာသတင်း
◼ အရန်ဆန် မက်ထရစ်တန်နှစ်သိန်း ဂျပန်အစိုးရထုတ်ရောင်း
ဂျပန်နိုင်ငံတွင် ယမန်နှစ်မှစ၍ ဆန်ဈေးနှစ်ဆတက်လာမှုကို ကိုင် တွယ်ဖြေရှင်းရန်အတွက် အရေးပေါ်ဆန်ထဲမှ နောက်ထပ် ဆန်တန်ချိန် မက်ထရစ်တန် နှစ်သိန်းကို ထပ်မံရောင်းချပေးမည်ဟု ဂျပန်အစိုးရက ဇွန် ၁ဝ ရက်တွင် ပြောသည်။
တိုကျိုနှင့် ကျန်တစ်နိုင်ငံလုံး၌အဓိကရွေးကောက်ပွဲများ မတိုင်မီဆန်ဈေးများမြင့်တက်လာခြင်းသည် စားသုံးသူနှင့် မူဝါဒချမှတ်သူများအတွက် အဓိကစိုးရိမ်စရာဖြစ်လာသည်။ လွန်ခဲ့သည့် သီတင်းပတ်ကျော်က စတိုးဆိုင်များတွင် ဆန်ပြတ်လပ်မှုများ စတင်ပြီးနောက် စားသုံးသူများသည်ဆန်ငါးကီလိုဂရမ်ကို ယန်း နှစ်ထောင်ဖြင့် ဝယ်ယူရန် တန်းစီစောင့်ဆိုင်းနေရသည်။
သိုလှောင်ထားသော အရန်ဆန်များ စားသုံးသူများထံ မြန်မြန် ဆန်ဆန်နှင့်ဈေးသက်သာစွာ ရောက်ရှိနိုင်ရေးအတွက် အရှိန်အဟုန်ဖြင့် ဆောင်ရွက်နေကြောင်း ဂျပန်စိုက်ပျိုးရေးဝန်ကြီး ရှင်ဂျီရိုကိုအိဇူမီက ပြောသည်။
ဂျပန်တာဝန်ရှိသူများသည် မတ်လမှစ၍ အရေးပေါ်ဆန်တန်ချိန် ခန့်မှန်းခြေ ကိုးသိန်းအနက် ခြောက်သိန်းကျော်ကို ထုတ်ရောင်းခဲ့ပြီးဖြစ်သည်။ အရေးပေါ်ဆန် အားလုံးကို ထုတ်ရောင်းပေးမည်ဖြစ်ပြီး ဈေးနှုန်းများတည်ငြိမ်ရန်လိုအပ်ပါက သွင်းကုန်များအသုံးပြုရန် အဆင်သင့်ရှိကြောင်း ၎င်းကပြောသည်။
ဆန်နှင့်ပတ်သက်သည့်ပြဿနာများကို ဆောလျင်စွာဖြေရှင်းနိုင်မည်ဟု ယုံကြည်ကြောင်း စိုက်ပျိုးရေးဝန်ကြီးကပြောသည်။ ဇွန် ၉ ရက်အချက်အလက်များအရ ဇွန် ၁ ရက်မှ ၇ ရက်အတွင်း ဆန်ဈေးနှုန်းသည် ငါးကီလိုဂရမ်လျှင် ယန်းငွေ ၄၂၂၃ ယန်း ရှိခဲ့ပြီး လွန်ခဲ့သည့် သီတင်းပတ်ကထက် ၃၇ ယန်း ကျဆင်းခဲ့သည်။
စီအင်န်အေ
