#နိုင်ငံတကာသတင်း
◼ စီးနင်းမှုများအရှိန်မြှင့်ရန် လော့စ်အိန်ဂျလိစ်သို့ မရိန်းတပ်ဖွဲ့များ ထရန့် စေလွှတ်
လော့စ်အိန်ဂျလိစ်မြို့သို့ အမေရိကန်မရိန်းတပ်ဖွဲ့များကို ဒေါ်နယ်ထရန့်အစိုးရက စေလွှတ်ခဲ့ပြီး အထောက် အ ထားမဲ့ မသင်္ကာသူ ရွှေ့ပြောင်းနေထိုင်သူများအပေါ် စီးနင်းဖမ်းဆီးမှုများကို တိုးမြှင့်လုပ်ဆောင်ခဲ့ရာ လမ်းပေါ် မှဆန္ဒပြသူများအား ပိုမိုဒေါသူပုန်ပုန်ထစေခဲ့သည်။
ဒီမိုကရက်တစ်ခေါင်းဆောင်များကလည်း အစိုးရ၏ လုပ်ရပ်ကြောင့် အမျိုးသားရေး အကျပ် အတည်း ဖြစ်လာ မည်ကို စိုးရိမ်ကြောင်း သတိပေးပြောကြားကြသည်။
ဒေါ်နယ်ထရန့် ဒုတိယသက်တမ်းအစိုးရ၏ အမှတ်အသားတစ်ခုဖြစ်လာခဲ့သော လူဝင်မှုကြီးကြပ်ရေး စီးနင်းမှုများအား ဆန့်ကျင်သည့် လမ်းပေါ် ဆန္ဒပြမှုများအား ကူညီနှိမ်နင်းရန် ဖက်ဒရယ်အစိုးရမဟာဗျူဟာ တစ်စိတ်တစ်ပိုင်းအဖြစ် ကယ်လီဖိုးနီးယားတောင်ပိုင်း အခြေစိုက်စခန်းမှ စေလွှတ်ထားသော မရိန်း တပ်ဖွဲ့ များ သည် အမေရိကန်စံတော်ချိန် ဇွန် ၁၀ ရက် နံနက်ပိုင်း(မြန်မာစံတော်ချိန်ယနေ့ညနှောင်းပိုင်း)တွင် ရောက်ရှိနိုင်ကြောင်း တာဝန်ရှိသူများက ပြောကြားသည်။
မရိန်းတပ်များ၏တာဝန်မှာ အင်အား ၄၀၀၀ ရှိသော အမျိုးသား အစောင့်တပ်များ လော့စ်အိန်ဂျလိစ်မြို့သို့ အပြည့်အဝ ရောက်ရှိလာချိန်အထိ ဖက်ဒရယ်ရုံးများနှင့် ဝန်ထမ်းများအား ကာကွယ်ပေးရန် ဖြစ်သော်လည်း ၎င်းတို့အား ဖြန့်ကြက်ခြင်းမှာ ရဲတပ်ဖွဲ့၏ စစ်ဆင်ရေးအား ကူညီရာ၌ စစ်တပ်အင်အားကို ထူးထူးခြားခြား အသုံးချခြင်းဖြစ်သလို အကူအညီတောင်းဆိုခြင်းမရှိသော ပြည်နယ်နှင့် ဒေသန္တရခေါင်းဆောင်များ၏ ကန့်ကွက်မှုများကြားမှ လုပ် ဆောင်ခြင်းဖြစ်သည်။
ထိုအတောအတွင်းမှာပင် လူဝင်မှုကြီးကြပ်ရေးဥပဒေချိုးဖောက်သူများအား ဖမ်းဆီးသည့် စစ်ဆင်ရေးများကို တိုးမြှင့်သွားမည်ဖြစ်ကြောင်း အမေရိကန်အမိမြေလုံခြုံရေးဝန်ကြီး ခရစ္စတီနိုအမ် က ကြုံးဝါးပြောဆိုခဲ့ရာ ဆန္ဒပြပွဲများ ဖြစ်ပေါ်စေခဲ့သော နှိမ်နင်းမှုများအား တိုးချဲ့မည့်သဘောဖြစ်သည်။
ယင်းဆန္ဒပြပွဲများမှာ ဥပဒေမဲ့လုပ်ရပ်များဖြစ်ကြောင်း နှင့် ပြည်နယ်နှင့် ဒေသခံ ဒီမိုကရက်များက အထောက်အထားမဲ့ ရွှေ့ပြောင်းများအတွက် ခိုလှုံစရာမြို့ကြီးများဖြင့် အကာအကွယ်ပေးနေကာ မငြိမ်မသက်မှုများအား ခွင့်ပြုခဲ့ကြောင်း ထရန့်အရာရှိများက ပြစ်တင်ပြောကြားကြသည်။
ဖက်ဒရယ်နှိမ်နင်းမှုများအား လက်သင့်မခံမှုဖြင့် ကယ်လီဖိုးနီးယားပြည်နယ် မှ ဒီမိုကရက်အုပ်ချုပ်ရေးမှူး ဂါဗင်နယူဆမ် အား ဖမ်းဆီးသွားမည်ဟု ရီပက်ဘလေကန်သမ္မတ ထရန့်က ခြိမ်းခြောက်ခဲ့ရာ စစ်တပ်နှင့်ဖက်ဒရယ်ဥပဒေစည်းကြပ်ရေး စစ်ဆင်ရေးများကြောင့် အမေရိကန်၏ အဓိကပါတီကြီးနှစ်ခုကြားက သဘောထားကွဲပြားမှုများအား ပိုမိုကြီးမားလာစေခဲ့သည်။
အမျိုးသားအစောင့်တပ်ဖွဲ့များနှင့် မရိန်းတပ်ဖွဲ့များ ချထားခြင်းကို တားဆီးပိတ်ပင်ရန် ကယ်လီဖိုးနီးယားပြည်နယ်ကလည်း ထရန့်အစိုးရ ကို ယမန်နေ့က တရားစွဲလိုက်ပြီး ယင်းသို့ ချထားခြင်းမှာ ဖက်ဒရယ်ဥပဒေကို ချိုးဖောက်ခြင်း ၊ ပြည်နယ်အချုပ်အခြာကို ချိုးဖောက်ခြင်းဖြစ်ကြောင်း စောဒက တက်ထားသည်။
မရိန်းတပ်ဖွဲ့များ ချထားသော ထရန့်၏ လုပ်ရပ်ကြောင့် အလွန်အမင်း စိတ်အနှောက်အယှက်ဖြစ်ရကြောင်း အထက်လွှတ်တော် လက်နက်ရေးရာလုပ်ငန်းများကော်မတီ မှ ထိပ်တန်းဒီမိုကရက်အမတ် ဂျက်ရိဒ် က ပြောကြားသည်။
သမ္မတက ပြည်နယ်အုပ်ချုပ်ရေးမှူးနှင့် မြို့တော်ဝန်တို့၏ လုပ်ပိုင်ခွင့်အာဏာကို အဓမ္မလွှမ်းမိုးပြီး စစ်တပ်အား နိုင်ငံရေးလက်နက်တစ်ခုအဖြစ် အသုံးချနေကြောင်း၊ အမေရိကန်မြေပေါ်မှ ဥပဒေစည်းကြပ်မှုလုပ်ငန်းများတွင် စစ်တပ်ကို အသုံးမချလိုသော အမေရိကန်ပြည်သူများ၏ သဘောထားမှာ နိုင်ငံတည် ထောင် ကတည်းကရှင်းနေကြောင်း အထက်လွှတ်တော်အမတ် ဂျက်ရိဒ် က ပြောကြားသည်။
သတင်း-ရဲမင်း
ကိုးကား-Reuters
