ပဲခူးတိုင်းထဲကရေထုကို တလ ၁၂ ကြိမ် တိုင်းတာမယ်
(ပြည်တွင်း) ဇွန် ၆
ပဲခူးတိုင်းဒေသကြီးအတွင်း ပတ်ဝန်းကျင်ရေထုအရည်အသွေး တိုင်းတာခြင်းလုပ်ငန်းတွေကို တစ်လလျှင် ၁၂ ကြိမ်နှုန်းနဲ့ စုစုပေါင်း ၁၄၄ ကြိမ်လျာထားပြီး ဆောင်ရွက်နေလို့ ပတ်ဝန်းကျင်ထိန်းသိမ်း ရေးဦးစီးဌာနကသိရပါတယ်။ပဲခူးတိုင်းဒေသကြီး ပတ်ဝန်းကျင်ထိန်းသိမ်းရေးဦးစီးဌာနမှ တာဝန်ရှိသူများအနေနဲ့ လစဉ်စီမံချက်များရေးဆွဲပြီး တိုင်းဒေသကြီးအတွင်း သတ်မှတ်ထားသောနေရာများ၌ ရေထုအရည်အသွေးတိုင်းတာခြင်း လုပ်ငန်းများကို အကောင် အထည်ဖော်ဆောင်ရွက်လျက်ရှိပြီး ယခုဘဏ္ဍာနှစ်အတွင်းမှာ ပဲခူးတိုင်းဒေသကြီးအတွင်း ပတ်ဝန်းကျင်ရေထုအရည်အသွေး တိုင်းတာခြင်းလုပ်ငန်းတွေကို တစ်လလျှင် ၁၂ ကြိမ်နှုန်းနဲ့ စုစုပေါင်း ၁၄၄ ကြိမ်လျာထားပြီး ဆောင်ရွက်နေတယ်လို့လည်း သိရပါတယ်။
ရေထုညစ်ညမ်းမှတွေ ဖြစ်ပေါ်လာတဲ့အခါ ပြည်သူလူထုကို သတိပေးချက်ထုတ်ပြန်နိုင်ဖို့၊ သက်ဆိုင်ရာဌာနတွေနဲ့ ပေါင်းစပ်ညှိနှိုင်းပြီး ရေထုညစ်ညမ်းမှုတွေကို လျှော့ချနိုင်မယ့်အစီအစဉ်တွေကို ချမှတ်ရေးဆွဲပြီး အကောင်အထည်ဖော် ဆောင်ရွက်နိုင်ဖို့ ရည်ရွယ်ခြင်းဖြစ်ပါတယ်။
အဆိုပါ ပတ်ဝန်းကျင်ရေထုအရည်အသွေး တိုင်းတာခြင်းလုပ်ငန်းတွေကို မိုးယွန်းကြီးအင်း တောရိုင်းတိရစ္ဆာန် ဘေးမဲ့တော၊ အင်းအတွင်းစီးဝင်လျက်ရှိသော ဘုရားကလေးချောင်း၊ ဝမ်းဘဲအင်းချောင်းနဲ့ ပျဉ်ပုံချောင်း၊ ပဲခူးတိုင်းဒေသကြီးအတွင်း စီးဆင်းနေသော ဧရာဝတီမြစ်၊ စစ်တောင်းမြစ်နဲ့ ပဲခူးမြစ် တို့အပြင် ကန်တော်ကြီး ရေဝေရေလဲဧရိယာ၊ လိပ်ပြာကန်၊ ဟံသာဝတီကျုံးနဲ့ တောင်ငူကျုံးတို့မှာ လစဉ်ဆောင်ရွက်ရှိတယ်လို့ ပတ်ဝန်းကျင်ထိန်းသိမ်း ရေးဦးစီးဌာနကပြောပါတယ်။
လက်ရှိမှာ ပဲခူးတိုင်းဒေသကြီးအတွင်း ပတ်ဝန်းကျင်ရေထုအရည်အသွေး တိုးတက်ကောင်းမွန်စေရေးအတွက် သက်ဆိုင်ရာအစိုးရဌာနတွေနဲ့အတူ ဒေသခံပြည်သူလူထုကလည်း ပူးပေါင်းပါဝင်ဆောင်ရွက်ကြဖို့ ပဲခူးတိုင်းဒေသကြီးပတ်ဝန်းကျင်ထိန်းသိမ်းရေးဦးစီးဌာနက မှာကြားထားတယ်လို့ သိရပါတယ်။
