ဒေါ်နယ်ထရန့်နဲ့ ဘီလျံနာ အီလွန်မာ့ခ်တို့ အပြန်အလှန် ဝေဖန်တိုက်ခိုက်ပြီး တင်းမာမှု မြင့်တက်နေ
ဝါရှင်တန်၊ ဇွန်-၆-၂၀၂၅
မျိုးဆက်(VOM)
အမေရိကန်သမ္မတ ဒေါ်နယ်ထရန့်နှင့် သူ့ရဲ့ အနီးကပ်လက်ထောက်ဖြစ်ခဲ့ဖူးသူ ဘီလျံနာ အီလွန်မာ့ခ် တို့အကြား အပြန်အလှန် ဝေဖန်တိုက်ခိုက်မှုတွေနဲ့အတူ တင်းမာမှုတွေ မြင့်တက်နေပါတယ်။
အမေရိကန်အစိုးရနဲ့ အီလွန်မာ့ခ်ရဲ့ ကုမ္ပဏီတို့ ချုပ်ဆိုထားတဲ့ အစိုးရစာချုပ်တွေကို ဖျက်သိမ်းမယ်လို့ ဒေါ်နယ်ထရန့်က ခြိမ်းခြောက်ခဲ့ပြီး အီလွန်မာ့ခ်ကလည်း ဒေါ်နယ်ထရန့်ကို စွပ်စွဲပြစ်တင်သင့်တယ်လို့ ဆိုပါတယ်။
မိမိတို့ရဲ့ အသုံးစရိတ် ဒေါ်လာဘီလီယံများစွာကို စုဆောင်းဖို့ အလွယ်ဆုံးအလုပ်က အီလွန်မာ့ခ်အတွက် အစိုးရထောက်ပံ့ကြေးတွေနဲ့ စာချုပ်တွေကို ရပ်စဲဖို့ ဖြစ်တယ်လို့ ထရန့်ကပြောပါတယ်။ အီလွန်မာ့ခ်ဟာ စိတ်ပျက်စရာကောင်းတယ်လို့ ထရန့်က အိမ်ဖြူတော်မှာ ဂျာမနီဝန်ကြီးချုပ်နဲ့ တွေ့ဆုံချိန်မှာ ပြောပါတယ်။
ထရန့်ရဲ့ အခွန်ကောက်ခံမှုနဲ့ အသုံးစရိတ်ဥပဒေမူကြမ်းအပေါ် အီလွန်မာ့ခ်က ဝေဖန်ပြီးနောက်မှာ သူတို့နှစ်ယောက်အကြာ ပြဿနာဟာ ပြီးခဲ့တဲ့ အင်္ဂါနေ့မှာ စတင်ခဲ့ပါတယ်။ အီလွန်မာ့ခ်ကလည်း ထရန့်ဟာ သူမပါရင် ရွေးကောက်ပွဲ ရှုံးလိမ့်မယ်လို့ ပြောပါတယ်။
ရွေးကောက်ပွဲမှာ ထရန့်နဲ့ အခြား ရီပတ်ဘလီကန်တွေကို ထောက်ပံ့ဖို့ ဒေါ်လာသန်း ၃၀၀ အသုံးပြုခဲ့ပြီး ဒီကျေးဇူးတရားတွေကို မေ့တယ်လို့ အီလွန်မာ့ခ်က ဝေဖန်ပါတယ်။ ဒါအပြင် ထရန့်ရဲ့ အခွန်စည်းကြပ်မှုတွေဟာ အမေရိကန်ကို ယခုနှစ်နှောင်းပိုင်းမှာ စီးပွားရေးကျဆင်းမှု ချောက်ထဲကို တွန်းပို့နေတယ်လို့ ဆိုပါတယ်။
ထရန့်ရဲ့ ခြိမ်းခြောက်မှုတွေကြောင့် အမေရိကန်အစိုးရရဲ့ အာကာသအစီအစဉ်မှာ အရေးပါတဲ့အခန်းကဏ္ဍကနေ ပါဝင်နေတဲ့ Space X ရဲ့ Dragon အာကာသယာဉ် မစ်ရှင်တွေကို စတင်ဖျက်သိမ်းတော့မယ်လို့ အီလွန်မာ့ခ်က ပြောပါတယ်။
ဒီအာကာသယာဉ်ဟာ အာကာသစခန်းကို ယာဉ်မှူးတွေစေလွှတ်နိုင်တဲ့ အမေရိကန်ရဲ့ တခုတည်းသော အာကာသယာဉ်ဖြစ်ပါတယ်။ လက်ရှိမှာတော့ အီလွန်မာ့ခ်ရဲ့ တက်စ်လာ လျှပ်စစ်ကားရှယ်ယာတွေဟာ နယူးယောက်စျေးကွက်မှာ ၁၄ ဒဿမ ၃ ရာခိုင်နှုန်း ကျဆင်းခဲ့ပြီး တက်စ်လာသမိုင်းမှာ တနေ့တည်း ဒေါ်လာ ၁၅၀ ဘီလီယံ စျေးကွက်တန်ဖိုး ဆုံးရှုံးမှုအဖြစ် မှတ်တမ်းဝင်ခဲ့ပါတယ်။
အီလွန်မာ့ခ်ဟာ ဇန်နဝါရီလမှာ ရာထူးတက်လာတဲ့ ဒေါ်နယ်ထရန့်အစိုးရလက်ထက်မှာ ဘက်ဂျက်တွေ စီမံခန့်ခွဲ လျှော့ချနိုင်တဲ့ အစိုးရစွမ်းဆောင်ရည်ဌာန အကြိးအကဲအဖြစ် တာဝန်ထမ်းဆောင်ခဲ့ပြီး မကြာသေးခင်မှာ ရာထူးကနေ ထွက်ခွာခဲ့ပါတယ်။
Ref:CNA
Photo:Reuters