#နိုင်ငံတကာသတင်း
◼ယူကရိန်းတိုက်ခိုက်မှုများအပါ်တုံ့ပြန်ရလိမ့်မည်ဟု ထရန့်အားပူတင်ပြောကြား
ရုရှား၏ နျူကလီးယားလက်နက်သယ်ဆောင်နိုင်သော ဗုံးကြဲလေယာဉ်များအပေါ် ယူကရိန်းက ဒရုန်းများဖြင့် တိုက်ခိုက်ခဲ့မှုများအား ၎င်းအနေဖြင့် တုံ့ပြန်သွားရမည်ဖြစ်ကြောင်း ရုရှားသမ္မတ ဗလာဒီမာပူတင် က အမေရိကန်သမ္မတ ဒေါ်နယ်ထရန့်အား ယမန်နေ့တွင် ပြောကြားပြီး တစ်ဖက်တွင်လည်း ယူကရိန်းနှင့် ငြိမ်းချမ်း‌‌ရေးဆွေးနွေးပွဲများမှာ အသုံးဝင်ကြောင်း ၎င်းက ဆိုသည်။
မော်စကိုနှင့်ကိဗ် နှစ်ဖက်စလုံးအပေါ် ထရန့်၏ ချော့တစ်လီခြောက်တစ်လှည့်ပြောဆိုမှု လေးလကြာခဲ့ပြီးနောက် ယူကရိန်းစစ်ပွဲမှာ ပိုမိုပြင်းထန်လာခဲ့သည်။
ယူကရိန်းက တံတားများကို ဖောက်ခွဲဖျက်ဆီးပြီး ဆိုက်ဘေးရီးယားအတွင်းပိုင်းနှင့် ရုရှား မြောက်ဖျားစွန်းတွင် ထား ရှိသော ရုရှား၏ မဟာဗျူဟာမြောက် ဗုံးကြဲလေယာဉ်ကြီးများအား တိုက်ခိုက်ခဲ့ပြီးနောက် ယူ ကရိန်း ခေါင်းဆောင်များက ငြိမ်းချမ်း‌‌ရေးလိုချင်သည်ဟု ၎င်းအနေဖြင့် မထင်ကြောင်း ပူတင်က ယမန်နေ့တွင် ပြောသည်။
ယူကရိန်းတိုက်ခိုက်မှုများနှင့်ပတ်သက်၍ ပူတင်က ထိပ်တန်းဝန်ကြီးများနှင့် မော်စကိုတွင် ဆွေးနွေးပြီးနောက် မကြာမီ ၎င်းအနေဖြင့် ပူတင် နှင့် တစ်နာရီ ၁၅ မိနစ်ကြာ ဖုန်းပြောခဲ့ကြောင်း နှင့် ယူကရိန်းတိုက်ခိုက်မှုများအကြောင်းအပြင်အီရန်အရေး ကိုပါ ဆွေးနွေးခဲ့ကြောင်း ဒေါ်နယ်ထရန့် က ပြောသည်။
“ ရုရှားနိုင်ငံမှာ ရပ်ထားတဲ့ လေယာဉ်တွေကို ယူကရိန်းက တိုက်ခိုက်ခဲ့တာနဲ့ နှစ်ဖက်စလုံးမှာ ဖြစ်ပေါ်နေတဲ့ တခြားတိုက်ခိုက်မှုတွေအကြောင်းကို ကျွန်တော်တို့ ဆွေးနွေးခဲ့ကြပါတယ်။ ကောင်းမွန်တဲ့ ပြောဆိုမှုပါ။ ဒါပေမယ့်လည်း ငြိမ်းချမ်း‌ရေးချက်ချင်းရမယ့်ဆီ ဦးတည်မယ့် ပြောဆိုမှုတော့ မဟုတ်ပါဘူး။” ဟု ဒေါ်နယ်ထရန့်က ဆိုရှယ်မီဒီယာတွင် ပြောသည်။
ရုရှားကလည်း မကြာသေးမီသီတင်းပတ်များအတွင်း ယူကရိန်းအပေါ် ကြီးကျယ်‌သော လေကြောင်းတိုက်ခိုက်မှုများ လုပ်ဆောင်ခဲ့သည်။
“ မကြာမီက ဖြစ်ပေါ်ခဲ့တဲ့ လေယာဉ်ကွင်းတွေအပေါ် တိုက်ခိုက်မှုတွေကို သူ့အနေနဲ့ တုံ့ပြန်သွားရလိမ့်မယ်လို့ သမ္မတပူတင်က တော်တော်လေးပြင်းပြင်းထန်ထန် ပြောပါတယ်” ဟု ထရန့် က ပြောသည်။
ထိုအတောအတွင်း ယူကရိန်းက ပြတ်တောက်သွားအောင် လုပ်ဖို့ ကြိုးပမ်းနေပေမယ့်လည်း မော်စကိုနဲ့ ကိဗ်ကြားအပစ်ရပ်ဆွေးနွေးပွဲတွေက အကျိုးရှိကြောင်း ရုရှားခေါင်းဆောင်က ထရန့်အား ပြောကြားခဲ့သည်ဟု နိုင်ငံခြားရေးမူဝါဒနှင့်ပတ်သက်၍ ပူတင်၏ လက်ထောက်ဖြစ်သူ ယူရီအူရှာနော့ဗ် က ပြောသည်။
ငြိမ်းချမ်း‌‌ရေး အစီအစဉ်များကို ဖော်ပြထားသော စာချွှန်လွှာများအား နှစ်ဖက်အပြန်အလှန်လဲလှယ်ခဲ့ကြကြောင်း နှင့် ၎င်းတို့ကိုလေ့လာပြီးပါကလည်း နှစ်ဖက်ဆက်လက်ဆွေးနွေးနိုင်မည်ဟု မျှော်လင့်ကြောင်း အူရှာနော့ဗ် က ဆက်ပြောသည်။
သတင်း-ရဲမင်း
ကိုးကား-Reuters