#ယနေ့ထုတ်သတင်းစာ_နိုင်ငံတကာသတင်း
◼ တောင်ကိုရီးယားရေတပ် ပင်လယ်ရေကြောင်း ကင်းလှည့်လေယာဉ်တစ်စင်း ပျက်ကျ
တပ်ဖွဲ့ဝင်လေးဦး လိုက်ပါသွားသော တောင်ကိုရီးယားရေတပ်မှ ပင်လယ်ရေကြောင်း ကင်းလှည့်လေယာဉ်တစ်စင်းသည် မေ ၂၉ ရက်တွင် ပိုဟန်းမြို့ စစ်စခန်းတစ်ခုအနီးပျက်ကျခဲ့ကြောင်း သိရသည်။
ပီ-၃စီ အမျိုးအစားအဆိုပါ ပင်လယ်ရေကြောင်း ကင်းလှည့်လေယာဉ်သည် ပိုဟန်းမြို့လေတပ်စခန်းတစ်ခုမှ ပျံတက်ခဲ့ပြီး မကြာမီမှာပင် မည်သည့်အကြောင်းကြောင့် မသိရဘဲ တောင်ကုန်းဒေသတစ်ခုပေါ်သို့ ပျက်ကျခဲ့ရခြင်းဖြစ်သည်။
လက်ရှိအချိန်တွင် ပီ-၃စီ အမျိုးအစား ရေကြောင်းကင်းလှည့်လေယာဉ်ပျက်ကျခဲ့ရခြင်း အကြောင်းတရားကို အတည်ပြုနိုင်ရေးအတွက် တောင်ကိုရီးယားရေတပ်က ကြိုးပမ်းနေကြောင်း သိရသည်။
ယင်းလေယာဉ်နှင့်အတူ လိုက်ပါသွားသော တပ်ဖွဲ့ဝင်လေးဦး၏ ကံကြမ္မာကို မသိရသေးကြောင်း တောင်ကိုရီးယားရေတပ်ကသတင်းထုတ်ပြန်ထားသည်။
လေယာဉ်ပျက်ကျခဲ့ပြီးနောက် ပျက်ကျရာနေရာသို့ ရှာဖွေကယ်ဆယ်ရေးသမားများနှင့် မီးသတ်ယာဉ်များကို ပိုဟန်းမြို့ တာဝန်ရှိသူများက စေလွှတ်ထားကြောင်း သိရသည်။
ပြီးခဲ့သည့်နှစ် ဒီဇင်ဘာလကလည်း ဂျီဂျူး လေကြောင်းလိုင်း ခရီးသည်လေယာဉ်တစ်စင်း လေဆိပ်အဆင်းပျက်ကျခဲ့ရာ လိုက်ပါလာသူ ၁၈၁ ဦးအနက် နှစ်ဦးသာ အသက်ရှင်ခဲ့သည်။
ရိုက်တာ
