Apple က အရင်လို Creative မဖြစ်တော့ဘူး
အရင်တုန်းက ဖန်တီးမှုအငွေ့အသက်တွေ Apple မှာ မတွေ့ရတော့ဘူးလို့ ပြောနေတဲ့သူတွေ ရှိကြပါတယ်။
ဒီလူတွေထဲမှာ Nothing CEO ဝေဖန်ချက်က အတော်ထိပါတယ်။ Nothing တည်ထောင်သူ ကားလ်ပိုင်နဲ့ Wired အင်တာဗျူးမှာပါ။
"ကျွန်တော် ငယ်ငယ်ကတည်းက Apple ကို အံ့ဩအားကျခဲ့ရတာပါ။ ပထမဆုံး iPod ၊ ပထမဆုံး iPhone ဒါတွေက ဒီလောကထဲ ကျွန်တော် ရောက်လာစေခဲ့တဲ့ အကြောင်းရင်းပဲ။ ဒါပေမယ့် အဲ့ဒီအတိတ်တုန်းက ဖန်တီးမှုအားကောင်းတဲ့ ကုမ္ပဏီတွေဟာ တအားကြီးသွားပြီး ကော်ပိုရိတ်ဆန်သွားကြတယ်။ သူတို့ အရမ်းကြီး ဖန်တီးမှုမကောင်းတော့ဘူး။ ငယ်ရွယ်တဲ့မျိုးဆက်အတွက် စိတ်လှုပ်ရှားအားကျစရာ မဖြစ်တော့ဘူး"
နောက်တစ်ချက် ကားလ်ပိုင် ပြောတာက Apple Intelligence အကြောင်းပါ။ Apple Intelligence က ကုမ္ပဏီအတွက် အလဲအကွဲတစ်ခုပဲလို့လည်း ပြောပါတယ်။
"ဒီနေ့ Apple က ကျွန်တော်ငယ်ငယ်ကနဲ့ တခြားစီပဲ။ မနှစ်က Apple Intelligence ဆိုပြီး အကြီးကြီးတွေ ပြောတယ်။ အခု တစ်နှစ်လောက်ကြာတော့ အီမိုဂျီထုတ်လုပ်နိုင်တာထက် ဘာမှမပိုပါဘူး။ စားသုံးသူတွေကို မယုံသင်္ကာဖြစ်စေတာပဲ ရှိတယ်။"
Apple ရဲ့ အနာဂါတ်အကြောင်း ပြောတဲ့အပိုင်းက စိတ်ဝင်စားစရာပါ။
"နောင်မှာ ဖုန်းတစ်ခုလုံး app တစ်ခုပဲ ရှိလိမ့်မယ်။ အဲ့ဒါကလည်း OS ပဲ ဖြစ်မယ်လို့ ကျွန်တော် ယုံကြည်တယ်။ Operating System က အသုံးပြုသူကို ကောင်းကောင်းသိတယ်။ သိတဲ့အတိုင်း လူအတွက် အကောင်းဆုံးဖြစ်အောင် အကြံပြုလုပ်ဆောင်နိုင်မယ်"
နောက်ပိုင်းထွက် Apple ထုတ်ကုန်တွေ တီထွင်ဆန်းသစ်မှုမပါတော့ဘူးလို့ Nothing လို ကုမ္ပဏီငယ်တွေက ဝေဖန်တာ သိပ်တော့ မလွန်ပါဘူး။ ဒီတော့လည်း ၂၀၂၇ မှာ ထွက်မယ်ဆိုတဲ့ bezel မမြင်ရတဲ့ UD selfie ကင်မရာသုံး နှစ် ၂၀ ပြည့် iPhone အဆန်းဆိုတာကို စောင့်ကြည့်ရမှာပါ။