အမေရိကန်ထောက်ခံသော အဖွဲ့၏ ဂါဇာ အကူအညီပေးဝေမှုနေရာကို ပါလက်စတိုင်းလူအုပ်ကြီးဝင်စီးခဲ့
အငြင်းပွားဖွယ်ရာဖြစ်သော်လည်း အမေရိကန် နှင့် အစ္စရေးကထောက်ခံသော အဖွဲ့တစ်ဖွဲ့ က ဂါဇာတွင် လုပ်ငန်းများ စတင်ပြီး နောက်တစ်ရက်မှာပင် ၎င်းတို့ အဖွဲ့ က စားသောက်စရာအကူအညီပေးနေသော နေရာအား ထောင်ပေါင်းများစွာသော ပါလက်စတိုင်းလူမျိုးများက ဝင်စီးခဲ့ကြကြောင်း ဘီဘီစီသတင်းက ဖော်ပြသည်။
ဂါဇာတောင်ပိုင်း ရာဖာမြို့ မှ ဂါဇာလူသားချင်းစာနာထောက်ထားမှုဖောင်ဒေးရှင်း (GHF) ခြံဝင်း မှ ဖြိုချထားသော စည်းရိုးများနှင့် မြေကတုတ်အတားအဆီးများအား လူအုပ်ကြီးက ကျော်လွှားသွားသည်ကို ဗီဒီယိုများတွင် မြင်တွေ့ရသည်။
အကူအညီတောင်းခံသူများ များပြားလွန်းသောကြောင့် အကူအညီပေးခြင်းကို နောက်ဆုတ်ခဲ့ရကြောင်း ယင်းဖောင်ဒေးရှင်းက ပြောကြားသည်။
အနီးအနားတွင် လုံခြုံရေးယူထားသော အစ္စရေးစစ်ဘက်ကလည်း သတိပေးပစ်ခတ်မှုများ လုပ်ဆောင်ခဲ့ကြောင်း သိရသည်။
မကြာသေးခင်တွင် အနည်းငယ်ဖြေလျော့ပေးခြင်းမတိုင်မီ အစ္စရေးက သီတင်း ၁၁ ပတ်ကြာ တားဆီးပိတ်ဆို့မှုများ လုပ်ဆောင်ထားခဲ့ပြီး အငတ်ဘေးဆိုက်တော့မည်ဟု ကျွမ်းကျင်သူများက သတိပေးထားသော ဂါဇာ၌ ကုလသမဂ္ဂအား ဖြတ်ကျော်၍ အဓိကအကူအညီပေးသူ ဖြစ်ရန် GHF ဖောင်ဒေးရှင်းက ရည်မှန်းထားကာ ၎င်းတို့လုံခြုံရေးအတွက် အမေရိကန်လုံခြုံရေးကန်ထရိုက်များအား အသုံးပြုနေသည်။
ရာဖာမြို့မှ ထွက်ပေါ်လာသော ဗီဒီယိုများကကြေကွဲလောက်စရာ ဖြစ်ကြောင်း နှင့် ဂါဇာဒေသမှ အသည်းအသန်အကူအညီလိုအပ်နေသော လူဦးရေ ၂ ဒသမ ၁ သန်းအား လုံလောက်သော အကူအညီပေးရန် ၎င်းတို့တွင် အသေးစိတ်စီမံကိန်းတစ်ခု ရှိနေကြောင်း ကုလသမဂ္ဂက ပြောကြားသည်။
လူသားချင်းစာနာထောက်ထားမှု အခြေခံမူများနှင့် ဆန့်ကျင်ပြီး အကူအညီအား လက်နက်သဖွယ် အသုံးချနေပုံရသောကြောင့် GHF အဖွဲ့နှင့် ပူးပေါင်းဆောင်ရွက်ခြင်းကို ကုလသမဂ္ဂနှင့် အခြား အကူအညီ‌ပေးရေး အဖွဲ့များက ငြင်းဆိုထားသည်။
GHF က အကောင်အထည်ဖော်နေသော စနစ်သည် သွားလာလှုပ်ရှားမှုမလုပ်နိုင်သူများကို ချန်လှပ်ထားသလို ထပ်မံ၍ရွှေ့ပြောင်းနေထိုင်ရမှုများဖြစ်စေနိုင်ကြောင်း ၊ လူထောင်ပေါင်းများစွာအား အန္တရာယ်ဖြစ်စေနိုင်ကြောင်းနှင့် အကူအညီပေးမှုအား နိုင်ငံရေးနှင့်စစ်ရေး ရည်မှန်းချက်များနှင့် ချိတ်ဆက်ထားပြီး ကမ္ဘာတစ်ဝန်း အကူအညီပေးမှုလုပ်ငန်းများ အတွက် လက်ခံနိုင်ဖွယ်ရာမရှိသည့် ရှေ့ပြေးနမူနာတစ်ခု ဖြစ်စေကြောင်း ၎င်းတို့က သတိပေးကြသည်။
ဟားမားစ်အဖွဲ့ က အကူအညီများ ခိုးယူနေခြင်းကို တားဆီးရန် ဂါဇာမှ လက်ရှိ အကူအညီပေးနေသော ကုလသမဂ္ဂစနစ်ထက် အခြားစနစ်တစ်ခုလိုအပ်နေကြောင်း အစ္စရေးက ပြောကြားခဲ့သည်။
ဂါဇာတွင် အကူအညီပေးရေးလုပ်ငန်းများ စတင်နေပြီဖြစ်ကြောင်းနှင့် ၎င်းတို့၏ ဖြန့်ချိရေးစင်တာများတွင် ပါလက်စတိုင်းများအတွက် အထောက်အပံ့များ စတင်ဝေငှနေပြီ ဖြစ်ကြောင်း GHF က တနင်္လာနေ့တွင် ပြောကြားခဲ့သည်။
GHF အဖွဲ့၏ ရဲရင့်ပြီး တစ်မူထူးခြားသောကြိုးပမ်းမှုများကို အမေရိကန်သမ္မတ ဒေါ်နယ်ထရန့် နှင့် နိုင်ငံခြားရေးဝန်ကြီး မာကိုရူဘီယိုတို့က ထောက်ခံကြကြောင်း အမေရိကန်အရာရှိကြီးတစ်ဦးက ပြောကြားသည်။
ရာဖာမြို့၌ အကူအညီ ဖြန့်ဖြူး‌‌‌ပေးသော နေရာနှစ်ခုတွင် အကူအညီပေးမှု စတင်ပြီးနောက် တစ်နာရီအတွင်းမှာပင် ယင်းနေရာတွင် ဝရုန်းသုန်းကား အခြေအနေများ ဖြစ်ပေါ်ခဲ့သည်။
လူအများအပြားက စားနပ်ရိက္ခာပုံးများ နှင့် အခြားပစ္စည်းများကို အတင်းဝင်ရောက် ရယူခဲ့ကြပြီး အနီးအနားတွင် ချထားသော အစ္စ‌‌ရေးတပ်ဖွဲ့များကလည်း ပစ်ခတ်မှုများ လုပ်ဆောင်ခဲ့ကြောင်း မျက်မြင်သက်သေများက ပြောကြားကြသည်။
“ အခြေအနေ အလွန်ခက်ခဲပါတယ်။ သူတို့က တစ်ကြိမ်ကို လူ ၅၀ ပဲ ပေးဝင်တယ်။ နောက်ဆုံးတော့ ထိန်းမနိုင် သိမ်းမနိုင်ဖြစ်ပြီး လူတွေက ခြံစည်းရိုးတွေ ကျော်တက် ၊ အခြားလူတွေကို တိုက်ခိုက်ပြီး ပစ္စည်းတွေကို ဝင်ယူကြတော့တာပဲ” ဟု အမျိုးသားတစ်ဦး က ဘီဘီစီအာရပ်သတင်းဌာနကို ပြောကြားခဲ့သည်။
ငတ်မွတ်မှုနှင့် ဆင်းရဲမွဲတေမှုက လူတိုင်းကို ထိခိုက်နေကြောင်း အစားအစာရှာဖွေပြီး ကလေးများကို ‌ကျွေးမွေးနိုင်ရန် လူများက အသက်ကိုရင်းရန်ပင် ပြင်ဆင်ထားကြကြောင်း အမျိုးသမီးတစ်ဦး က ပြောသည်။
သတင်း-ရဲမင်း
ကိုးကား-BBC