ဘီလ်ဂိတ်စ်ကို အံ့အားသင့်စေခဲ့တဲ့ အိန္ဒိယက တီထွင်ရှင်
ကျောင်းပရောဂျက်ကနေ ဒေါ်လာသိန်းချီတန် startup ထောင်နိုင်ခဲ့တဲ့ ကျောင်းသားတစ်ယောက်ရှိပါတယ်။
ဒီကျောင်းသားရဲ့ တီထွင်ချက်ကို ကမ္ဘာကျော်သူဌေးကြီး ဘီလ်ဂိတ်စ်တောင်မှ အံ့ဩခဲ့ရပါတယ်။ သူကတော့ Aurangabad က စက်မှုအင်ဂျင်နီယာကျောင်းသား ယိုဂတ်ရှ် ဂါဝန်ဒီပါ။
ယိုဂါတ်ရှ်က Aurangabad မြို့ DIEMS မှာ စက်မှုအင်ဂျင်နီယာပထမနှစ်တက်နေတုန်း အတွင်းပိုင်းလောင်ကျွမ်းအင်ဂျင် (internal combustion engine) တွေအကြောင်း စာသင်ချိန်မှာ စိုက်ပျိုးရေးနည်းပညာနယ်ပယ်ကို ဆန်းသစ်စေမယ့်အိုင်ဒီယာ ရခဲ့ပါတယ်။
အိုင်ဒီယာက အင်ဂျင်ယန္တရားကို ပြောင်းပြီး ဘီးအခြေခံ စပရေးဖြန်းစနစ် တည်ဆောက်ဖို့ပါ။ ဒီစပရေးကနေ ပိုးသတ်ဆေး နဲ့ အပင်အားဖြည့်ဆေးတွေ ဖြန်းနိုင်ပါတယ်။ နောက်တော့ အင်ဂျင်ကနေ သဘာဝပတ်ဝန်းကျင်နဲ့ ကိုက်တဲ့ ဆိုလာဒီဇိုင်းပြောင်းပါတယ်။
ဒီပရောဂျက်ကို ယိုဂတ်ရှ်က သူနဲ့ စိတ်တူကိုယ်တူ အတန်းဖော် ၄-၅ ယောက်နဲ့ စခဲ့ပြီး သူတို့ကိုယ်သူတို့လည်း NIYO Group လို့ နာမည်ပေးခဲ့ပါတယ်။ ယိုဂါတ်ရှ်တို့ အဖွဲ့သားတွေက နောက်ဆုံးနှစ် ပရောဂျက် Presentation အထိ စောင့်မနေဘဲ သူတို့ထုတ်ထားတဲ့ စပရေးဖြန်းစက်ကို ရွာက လယ်သမားတွေဆီ သွားရောင်းပါတယ်။
လူလည်း သက်သာ အလုပ်လည်းတွင်ကျယ်တာကြောင့် လယ်သမားတွေက သူတို့စက်ကို သဘောကျခဲ့ကြပါတယ်။ ဈေးကွက်ထဲ ဝင်နိုင်အောင် အရင်းအနှီးရဖို့ Bharatiya Yuva Shakti Trust (BYST) အဖွဲ့အစည်းနဲ့ ချိတ်မိပြီးတဲ့နောက် Startup အဖြစ်ကို ရောက်လာခဲ့တာပါ။
အိန္ဒိယကို ဘီလ်ဂိတ်စ်အလည်ရောက်လာချိန်မှာ သူတို့ရဲ့ဖြန်းစက်ကို တွေ့ပြီး ကိုယ်တိုင်စမ်းသပ်မောင်းနှင်ခဲ့သလို အတော်လည်း သဘောကျသွားခဲ့ပါတယ်။ အခုဆို ယိုဂတ်ရှ်တို့ရဲ့ NIYO Solar Sprayer စက်ပေါင်း ၅၀၀၀ ကျော် ရောင်းချနိုင်ခဲ့ပြီ ဖြစ်သလို အလုပ်အကိုင်ပေါင်း ၁၀၀ ကျော်ပါ ဖန်တီးနိုင်ခဲ့ပြီလို့ ဆိုပါတယ်။
သူတို့ထောင်ထားတဲ့ Niyo FarmTech ကလည်း ရူပီး ၄.၃ ကုဋေတန် လုပ်ငန်းအဖြစ်ကို ရောက်ရှိလာခဲ့ပါတယ်။ အိုင်ဒီယာတွေကို ပြောင်မြောက်အောင် အကောင်အထည်ဖော်နိုင်သူတို့ အတွက် အိပ်မက်တွေက လှပမြဲပါပဲ။
