ငလျင်ဒဏ်ကြောင့် ဖွဲနုဆီစက်ရုံစီမံကိန်း လာမည့်နှစ်ဆန်းပိုင်းမှ ပြီးစီးနိုင်
ရန်ကုန်၊
ငလျင်ဒဏ်ကြောင့် ဖွဲနုဆီစက်ရုံ တည်ဆောက်ရေးလုပ်ငန်းတွေ နှောင့်နှေးခဲ့ရပြီး လာမယ့်နှစ်ဆန်းပိုင်းမှပဲ ဖွင့်လှစ်နိုင်ခြေရှိကြောင်း မြန်မာနိုင်ငံဆန်စပါးအသင်းချုပ် (MRF) ကနေ သိရပါတယ်။
လက်ရှိမှာ အိန္ဒိယအင်ဂျင်နီယာတွေနဲ့ တည်ဆောက်ရေးလုပ်ငန်းတွေကို ဆက်လက်လုပ်ဆောင်နေပြီး မူလရည်မှန်းထားတဲ့ ကာလထက် ၃ / ၄ လခန့် ပိုမိုကြာမြင့်နိုင်တယ်လို့ MRF တာဝန်ရှိသူက ပြောပါတယ်။
“ကံကောင်းရင်တော့ ဒီဇင်ဘာပေါ့။ နည်းနည်းနောက်ကျမယ်ဆိုရင်တော့ နောက်နှစ် ဇန်နဝါရီ၊ ဖေဖော်ဝါရီ ကူးသွားလိမ့်မယ်။ ဒါလည်း ဆောက်လုပ်ရေးလုပ်ငန်းသုံး ကုန်ကြမ်းပစ္စည်းတွေရဲ့ အခြေအနေပေါ်မှာလည်း မူတည်တယ်”လို့ ဦးရဲမင်းအောင်က အင်တာဗျူးတစ်ခုမှာ ဆိုထားပါတယ်။
မြန်မာနိုင်ငံရဲ့ ပထမဆုံး ဖွဲနုဆီကြမ်းနဲ့ ဆီချောပါဝင်တဲ့ မြန်မာနိုင်ငံဆန်စပါးအသင်းချုပ်ရဲ့ ဦးဆောင်မှုနဲ့ ၂၀၂၄ ခုနှစ်၊ ဖေဖော်ဝါရီမှ စတင်ပြီး နေပြည်တော် ပျဉ်းမနားမြို့နယ်က MAPCO ဆန်စက်ဝန်းမှာ တည်ဆောက်နေတာပါ။
လက်ရှိမှာ ဖွဲနုဆီစက်ရုံတည်ဆောက်ရေးလုပ်ငန်းတွေ ၆၀ ရာခိုင်နှုန်းအထိ ပြီးစီးနေပြီလို့ သိရပါတယ်။
ဖွဲနုဆီစက်ရုံကနေ တစ်နှစ်ကို ဆီကြမ်းတန်ချိန် ၉၀၀၀ နဲ့ ဆီချောတန်ချိန် ၆၃၀၀၊ စုစုပေါင်း တန်ချိန် ၁၅၃၀၀ ခန့် ထုတ်လုပ်သွားဖို့ ရှိပါတယ်။
နေပြည်တော်မှာ တည်ဆောက်နေတဲ့ ကနဦးစက်ရုံအပါအဝင် ဧရာဝတီတိုင်း၊ ရန်ကုန်တိုင်းနဲ့ ပဲခူးတိုင်းတို့မှာ ဆီစက်ရုံပေါင်း ၁၀ ရုံ တည်ဆောက်သွားဖို့ စီစဉ်ထားပါတယ်။
အဆိုပါ စက်ရုံတွေက ထွက်ရှိလာတဲ့ ဖွဲနုဆီတွေကို ပြည်တွင်းဈေးကွက်မှာ အဓိကဖြန့်ဖြူးရောင်းချသွားမှာဖြစ်ပြီး ပိုလျှံပါက ဂျပန်၊ တောင်ကိုရီးယားနဲ့ ဥရောပနိုင်ငံတွေထံ တင်ပို့သွားမယ်လို့ သိရပါတယ်။
