#ပြည်တွင်းသတင်း
◼တာချီလိတ်၌ မိုးသည်းထန်စွာရွာသွန်းခြင်းကြောင့် ရပ်ကွက်တချို့ရေကြီးရေလျှံ
ရှမ်းပြည်နယ်(အရှေ့ပိုင်း)၊ တာချီလိတ်မြို့၌ ယမန်နေ့(မေ ၂၁ ရက်)ညနေပိုင်းက မိုးသည်းထန်စွာ ရွာသွန်းခြင်းကြောင့် ရပ်ကွက်တချို့ရေကြီးရေလျှံခြင်းများဖြစ်ပေါ်လျက်ရှိကြောင်း ဒေသခံများထံမှ သိရသည်။
မိုးသည်းထန်စွာရွာသွန်းခြင်းကြောင့် မယ်ဆိုင်ချောင်းရေနှင့် တောင်ကျချောင်းရေများမြင့်တက်လာကာ အနိမ့်ပိုင်းရပ်ကွက်နှင့်လမ်းများပေါ်သို့ရေကြီးရေလျှံခြင်းများဖြစ်ပွားနေခြင်းဖြစ်ကြောင်းသိရသည်။
"မိုးက မနေ့ကတည်းကရွာနေတာ ဒီနေ့လည်းရွာနေတယ်။ ကျွန်တော်တို့ဆီမှာ မိုးရွာတာနဲ့မယ်ဆိုင် ချောင်းရေကမြင့်တက်လာတယ်။ အဲဒီတက်လာတဲ့ရေတွေက ရပ်ကွက်တွေထဲဝင်လာတာ။ အခုတက် လာတဲ့ရေကမိုးရေဆိုတော့ မိုးတိတ်တာနဲ့ရေကချက်ခြင်းပြန်ဆင်းပါတယ်။ တောင်ကျရေပဲစိုးရိမ်ရ တာ။ တောင်ကျရေဆိုရင်အနည်းဆုံးသုံးလေရက်ကြာတယ်" ဟု တာချီလတ်မြို့မှဒေသခံတစ်ဦးက ပြောသည်။
တာချီလိတ်မြို့အတွင်းမိုးသည်းထန်စွာရွာသွန်းခြင်းကြောင့် အနိမ့်ပိုင်းရပ်ကွက်များဖြစ်သည့် မယ်ခေါင်၊ ဆန်ဆိုင်(က၊ ခ) စသည့်ရပ်ကွက်များတွင် ရေကြီးရေလျှံခြင်းများဖြစ်ပေါ်နေကြောင်းသိရသည်။
သတင်း - ပိုင်လေး
ဓာတ်ပုံ - CJ
