ထရန့်နဲ့ ပူတင် လူချင်းမတွေ့ဘဲ ယူကရိန်းငြိမ်းချမ်းရေး အဆင်မချောနိုင်
အန်ကာရာ ၊ မေ-၁၆-၂၀၂၅
မျိုးဆက်(VOM)
တူရကီမှာ ကျင်းပမယ့် ရုရှား-ယူကရိန်း ငြိမ်းချမ်းရေးဆွေးနွေးပွဲမှာ ရလဒ်တွေကို များစွာမျှော်လင့်လို့မရကြောင်း အမေရိကန် နိုင်ငံခြားရေးဝန်ကြီး ရူဘီယိုက ထုတ်ဖော်ပြောဆိုလိုက်ပြီး တိုးတက်မှုရပြီး အဆင်ချော ချင်တယ်ဆိုရင် ဒေါ်နယ်ထရန့်နဲ့ ပူတင်တို့ တွေ့ဆုံဖို့ လိုတယ်လို့ ဆိုပါတယ်။
သမ္မတထရန့်နဲ့ပူတင်တို့ ဒီအကြောင်းအရာနဲ့ပတ်သက်ပြီး တိုက်ရိုက်မဆက်ဆံမချင်း ဆွေးနွေးပွဲအောင်မြင်မှုရှိနိုင်မယ်မထင်ဘူးလို့ တူရကီမှာကျင်းပတဲ့ နေတိုးနိုင်ငံခြားရေးဝန်ကြီးများအစည်းအဝေးအပြီးမှာ ရူဘီယိုက ပြောပါတယ်။
အစ္စတန်ဘူလ်ဆွေးနွေးပွဲအတွက် ယူကရိန်းကိုယ်စားလှယ်အဖွဲ့ စေလွှတ်မယ်လို့ သမ္မတဇီလန်စကီးက အတည်ပြုထားပြီး ရုရှားက အဆင့်မြင့်မဟုတ်တဲ့ ကိုယ်စားလှယ်အဖွဲ့စေလွှတ်မှုအပေါ် သူက ဝေဖန်ထားပါတယ်။ အဖွဲ့ကိုဦးဆောင်မယ့် ပူတင်ရဲ့လက်ထောက် ဗလာဒီမာမက်ဒင်စကီးကတော့ ကိုယ်စားလှယ်အဖွဲ့မှာ လိုအပ်တဲ့ အရည်အချင်းရှိတယ်လို့ ပြောပါတယ်။
အရှေ့အလယ်ပိုင်းကို ရောက်ရှိနေတဲ့ အမေရိကန်သမ္မတ ဒေါ်နယ်ထရန့်ကလည်း သူနဲ့ပူတင်တို့ လူချင်းမတွေ့ဆုံဘဲ ယူကရိန်းငြိမ်းချမ်းရေးဆွေးနွေးပွဲဟာ သိသာထင်ရှားတဲ့တိုးတက်မှု ရှိမှာမဟုတ်ဘူးလို့ အစောပိုင်းမှာ ပြောဆိုထားပါတယ်။
ဒါပေမယ့် လူ့အသက်များစွာ သေဆုံးနေတဲ့အတွက် ဒီကိစ္စကို ဖြေရှင်းရမယ်လို့ ထရန့်ကပြောပါတယ်။ ကနဦးမှာတော့ တူရကီဆွေးနွေးပွဲကို အဆင်သင့်ရင် တက်ရောက်မယ်လို့ ပြောဆိုထားပေမယ့် နောက်ပိုင်းမှာတော့ ဝါရှင်တန်ပြန်မယ်လို့ ဆိုပါတယ်။
တူရကီ၊ အမေရိကန်၊ ယူကရိန်းနဲ့ ရုရှားကိုယ်စာလှယ်အဖွဲ့တွေဟာ ၂၀၂၂ ခုနှစ်မှာ စစ်ပွဲစတင်ပြီးနောက်ပိုင်း ပထမဆုံးအကြိမ်အဖြစ် ယူကရိန်းနဲ့ ရုရှား တိုက်ရိုက်ဆွေးနွေးမှုအတွက် တူရကီကို ရောက်ရှိနေကြပြီး ဒီကနေ့မှာ ဆွေးနွေးပွဲလုပ်ဖွယ်ရှိနေပါတယ်။