#နိုင်ငံတကာသတင်း
◼ကီလိုမီတာ ၂၀၀၀ အထိ ပစ်ခတ်နိုင်သော တာဝေးပစ်လက်နက် ဗြိတိန်နှင့်ဂျာမနီ ပူးတွဲတည်ဆောက်မည်
ဥရောပ၏ အကြီးဆုံးစီးပွားရေး နှစ်နိုင်ငံက ကာကွယ်ရေးပူးပေါင်းဆောင်ရွက်မှုကို တိုးမြှင့်နေကြစဉ် ကီလိုမီတာ ၂၀၀၀ ( ၁၂၄၂ မိုင်)ကျော်အထိရောက်ရှိနိုင်ပြီး အတွင်းပိုင်းကို တိကျစွာ တိုက်ခိုက်နိုင်သည့် လက်နက်အသစ်တစ်မျိုးကို ဗြိတိန်နှင့်ဂျာမနီ က ပူးတွဲတည်ဆောက်သွားမည်ဖြစ်ကြောင်း ဗြိတိန်အစိုးရ က ယနေ့တွင်ပြောကြားသည်။
ယင်းစီမံကိန်းမှာ လက်နက်အသစ်များ တည်ဆောက်သွားရေးပြီးခဲ့သည့်နှစ် က ထားရှိခဲ့သော ကတိကဝတ်မှ ပေါ်ထွက်လာခြင်းဖြစ်သည်။
ထိုစဉ်က ဗြိတိန်နှင့် ဂျာမနီကြား ကာကွယ်ရေးသဘောတူညီချက်ကို လက်မှတ်ရေးထိုးခဲ့ကြသလို ယူကရိန်းစစ်ပွဲ အရှိန်မြင့်တက်လာခဲ့ပါက ဥရောပအနေဖြင့် မိမိကိုယ်ကိုယ် ကာကွယ်နိုင်စွမ်းရှိရန် လိုအပ်ကြောင်း အလေးအနက်ထား ပြောကြားခဲ့ကြသည်။
ထိုသဘောတူညီချက် လက်မှတ်ရေးထိုးခဲ့ပြီးနောက် အမေရိကန်သမ္မတ ရွေးကောက်ပွဲတွင် ဒေါ်နယ်ထရန့် အနိုင်ရရှိခဲ့ကာ ဥရောပက ၎င်းတို့ကိုယ်ပိုင်လုံခြုံရေးအတွက် တာဝန်ယူသွားမည်ဟု မျှော်လင့်ကြောင်း ရှင်းလင်းစွာ ပြောကြားခဲ့ရာ ပြည်တွင်းကာကွယ်ရေးလုပ်ငန်းများ တိုးတက်လာရေးကို ဥရောပက အလျင်စလို လုပ်ဆောင်လာခဲ့ရသည်။
တာဝေးပစ်လက်နက်သစ် စီမံကိန်းအား ဘာလင်မြို့ အစည်းအဝေးတစ်ရပ်၌ ဗြိတိန်ကာကွယ်ရေးဝန်ကြီး ဂျွန်ဟဲလေးနှင့် ဂျာမနီကာကွယ်ရေးဝန်ကြီး ဘောရစ် ပစ်တိုးရီးယပ်စ် တို့က ကြေညာသွားမည်ဖြစ်သည်။
“အန္တရာယ်ပိုများလာတဲ့ ကမ္ဘာကြီးမှာ နေတိုးအဖွဲ့နဲ့ ဥရောပမဟာမိတ်တွေ စည်းလုံးညီညွတ်စွာ ရပ်တည်နေကြပါတယ်။ ဒီလို ပူးပေါင်းဆောင်ရွက်မှုက ကာကွယ်ရေးလုပ်ငန်းကို ဖွံ့ဖြိုးတိုးတက်ရေးအင်ဂျင်ဖြစ်ဖို့ ကူညီပေးပြီး အလုပ်အကိုင်တွေဖန်တီး ၊ ကျွမ်းကျင်မှုတွေ မြင့်တက်လာစေကာ ဗြိတိန် နဲ့ ဂျာမနီ နှစ်နိုင်ငံစလုံးမှာ ရင်းနှီးမြုပ်နှံမှုတွေကိုမောင်းနှင်သွားပါမယ်။” ဟု ဗြိတိန်ကာကွယ်ရေးဝန်ကြီး ဟဲလေးက ထုတ်ပြန်ချက်တစ်ရပ်တွင် ပြောကြားသည်။
သို့ရာတွင် အဆိုပါစီမံကိန်းနှင့် ပတ်သက်၍ အချိန်အတိုင်းအတာ ၊ ဘတ်ဂျက်စသော အသေးစိတ်အချက်များ ထုတ်ပြန်ချက်တွင် မပါဝင်ခဲ့ပေ။
ဘာလင်မြို့အစည်းအဝေးမှာပင် ရေကြောင်းကင်းလှည့်ရေးအတွက် တော်ပီဒိုများနှင့် ထောက်လှမ်းရေးလေယာဉ်များကို ပူးတွဲမှာယူရေးကို ဝန်ကြီးများက ဆွေးနွေးမည်ဟု မျှော်လင့်ရပြီး ဗြိတိန်နိုင်ငံလုပ် စစ်ဘက်သုံးတံတားများကို ဂျာမနီက ဝယ်ယူမည့် သဘောတူညီချက်ကိုလည်း ကြေညာမည်ဟု ဟဲလေးက ဆက်လက်ပြောကြားသည်။
သတင်း-ရဲမင်း
ကိုးကား-Reuters
