သိပ္ပံပညာရှင်တွေဟာ ကနေဒါနိုင်ငံ၊ ဗန်ကိုးဗားကျွန်းတဝိုက်အနီးက ရှေးဟောင်း ရေအောက်မီးတောင်တခု ကနေ ပုံမှန်ထက် အလွန်ကြီးမားပြီး အရေအတွက် သန်းနဲ့ချီတဲ့ ဥတွေကို တွေ့ရှိခဲ့ကြပါတယ်။ ဥ တွေ့တာ မထူးဆန်းပေမဲ့ ဒီလောက် သန်းချီတဲ့ ဥတလုံးစီဟာ တပေခွဲကျော်ကျော် (၅၀ စင်တီမီတာ) လောက်ရှိနေကြတာကြောင့် ထူးဆန်းနေတာပါ။ အဏ္ဏဝါဇီဝပညာရှင်တွေကို ထပ်ပြီး ရင်ခုန်သွားစေတဲ့ အချက်က ဒီဥတွေဟာ ကမ္ဘာမှာ သိရှိပြီးသား သတ္တဝါတွေထဲက ဘယ်သူ့ဥမှ မဟုတ်ပါဘူးတဲ့။
လူတွေ သိထားတဲ့ ဘယ်လို ရေသတ္တဝါကမှ ဒီလောက်ကြီးတဲ့ ဥကို ရေအောက်မီးတောင်လို ပတ်ဝန်းကျင်မှာ အုဖို့ မဖြစ်နိုင်ဘူး ဆိုပါတယ်။ ကနဦးမှာတော့ ပင်လယ်ငါးကြီးတွေ ဒါမှမဟုတ် ရေနက်ပိုင်းသတ္တဝါတွေ အုထားတဲ့ ဥဆိုပြီး ထင်ခဲ့ကြပေမဲ့ တကယ်ဆန်းစစ်ကြည့်တဲ့အခါ အမျိုးအစား တူမနေတာကြောင့် သူတို့ကို ပိုခေါင်းရှုပ်စေခဲ့ပါတယ်။
သုတေသနအဖွဲ့က ဒီဥတွေကို ဘယ်သူ အု ထားမှန်း အစရှာဖို့အတွက် ရေအောက်မီးတောင်အနီးတဝိုက်မှာ ရေနက်ပိုင်းသုံး စက်ရုပ်တွေကို ခိုင်းစေပြီး သေချာ စူးစမ်းနေကြပါတယ်။ ဒီနေရာအနီးတဝိုက်မှာ ရေဟာ ပိုပြီး ပူနွေးနေတာကြောင့် လှုပ်ရှားမှုရှိတဲ့ ရေအောက်မီးတောင်လို့ မှတ်ယူထားကြပါတယ်။ သိပ္ပံပညာရှင်တွေဟာ ဒီဥတွေရဲ့ DNA ကို စစ်ဆေးလျက်ရှိကြပြီး ကနဦးထုတ်ပြန်ချက်အရတော့ မီးတောင်ပေါက်ကွဲမှု နဲ့ ရေအောက်ကမ္ဘာရဲ့ ပတ်ဝန်းကျင် ဒီနှစ်ခုလုံးကို လိုက်လျောညီထွေ ခံနိုင်ရည်ရှိအောင် လက်ဆင့်ကမ်းလာတဲ့ သတ္တဝါ တမျိုးရဲ့ ဥ လို့ပဲ အကြမ်းဖျင်း ပြောထားပါသေးတယ်။
ဒီလို ထူးခြားခက်ခဲတဲ့ အခြေအနေမျိုးမှာ သက်ရှိတွေ ဘယ်လိုမျိုးပွါးနိုင်ကြလဲ၊ ပတ်ဝန်းကျင်အခြေအနေကိုလိုက်ပြီး အခက်အခဲကြားက ဘယ်လို ရှင်သန်ကြလဲဆိုတာအပြင် ဒီ ဥတွေရဲ့ ဇာတိနဲ့ နိဒါန်း၊ တဖြည်းဖြည်း ပြောင်းလဲလာမယ့် ပုံစံတွေ၊ ကမ္ဘာမြေကြီးရဲ့ အပူအအေးဘာဝကြီးက သူတို့ကို ဘယ်လိုပုံဖော်ပေးနေလဲဆိုတာ သေချာသိအောင် အချိန်ပေးလေ့လာနေကြတာပါ။
လူသားတွေ မသိသေးတဲ့ ကမ္ဘာကြီးပေါ်က အကြောင်းတွေဟာ ပိုကျယ်ပြန့်လို့ လာနေပါတယ်။ ပုံမှန်ထက် အရွယ်အစား ကြီးနေတဲ့အပြင် ဒီလိုနေရာမှာမှ ဘယ်လို သတ္တဝါက အုထားတာလဲဆိုတာကို ပညာရှင်တွေအတွက်တော့ သဘာဝတရားကြီးက အိမ်စာပေးလိုက်ပြန်ပါပြီ။
