#ပြည်တွင်းသတင်း
◼ငလျင်လှုပ်ခတ်ခြင်းကြောင့်ယာယီပိတ်ထားသည့် မန္တလေးပြည်သူ့ဆေးရုံရှိကိုးထပ်ဆောင် ပြန်လည်ဖွင့်လှစ်
ငလျင်လှုပ်ခတ်မှုဖြစ်ပေါ်ခဲ့ပြီးနောက် ယာယီပိတ်ထားရသည့်မန္တလေးပြည်သူ့ဆေးရုံရှိကိုးထပ်ဆောင်ကို ပြန်လည်ဖွင့်လှစ်လိုက်ပြီဖြစ်ကြောင်း ပြုပြင်ရေးအပိုင်းတွင်ပါဝင်ကူညီခဲ့သည့် ဧရာဝတီဖောင်ဒေးရှင်းက သတင်းထုတ်ပြန်သည်။
အဆိုပါအထွေထွေရောဂါကု ကိုးထပ်ဆောင်ကို ဧရာဝတီဖောင်ဒေးရှင်းမှ အင်ဂျင်နီယာနှင့်ကျွမ်းကျင်လုပ်သား ၂၀၀ ကျော်တို့က သက်ဆိုင်ရာဆရာဝန်၊ ဆရာမများနှင့်အတူ ပြီးခဲ့သည့်ဧပြီ ၃၀ ရက်မှ စတင်ကာ အပျက်အစီးများရှင်းလင်းခြင်း၊ ပျက်စီးခဲ့သည့်အစိတ်အပိုင်းများပြုပြင်မွမ်းမံခြင်း၊ လိုအပ်သည့် အဲယားကွန်းများဖြည့်စွက်တပ်ဆင်ခြင်း၊ M&E လုပ်ငန်းများစစ်ဆေးပြုပြင်ခြင်းနှင့် သန့်ရှင်းရေးလုပ်ငန်းများကိုတာဝန်ယူ ဆောင်ရွက်ပေးခဲ့ကြောင်းသိရသည်။
ပြီးခဲ့သည့်မတ်လ ၂၈ ရက်၊ ငလျင်လှုပ်ခတ်သည့်နေ့တွင် မန္တလေးပြည်သူ့ဆေးရုံရှိ ၁၀ ထပ်ဆောင်၊ ကိုးထပ်ဆောင်၊ ရှစ်ထပ်ဆောင်၊ သုံးထပ်ဆောင် စသည့်အထပ်မြင့်အဆောက်အဦများမှလူနာများကို ဆေးရုံရှေ့ကွက်လပ်များရှိကားပါကင်များသို့ ယာယီပြောင်းရွှေ့ခဲ့ရကြောင်း၊ ယင်းနောက် လူနာများအားသက်ဆိုင်ရာလူနာဆောင်များသို့ပြန်ပို့ရာတွင် ထိခိုက်ပျက်စီးမှုမရှိသည့် တစ်ထပ်ဆောင်၊ နှစ်ထပ်ဆောင်နှင့် သုံးထပ်ဆောင်များသို့ပြောင်းရွှေ့ကုသပေးခဲ့ရကြောင်း၊ ထပ်မံရောက်ရှိလာသည့် ငလျင်ဒဏ်သင့်လူနာများကိုလည်း အရေးပေါ်ကုသမှုများဆောင်ရွက်ပေးနိုင်ခဲ့ကြောင်း မန္တလေးပြည်သူ့ဆေးရုံအုပ်ကြီးက သတင်းမီဒီယာတစ်ခုနှင့်အင်တာဗျူးတွင်ဖြေကြားခဲ့သည်။
သတင်း - အင်ကြင်း
ဓာတ်ပုံ - ဧရာဝတီဖောင်ဒေးရှင်း/FB