#ပြည်တွင်းသတင်း
◼ငလျင်ဒဏ်သင့်ဒေသများသို့လည်ပတ်နိုင်ဟု ဟိုတယ်နှင့်ခရီးသွားလာရေးဝန်ကြီးဌာနကြေညာ
ငလျင်ဒဏ်သင့်ဒေသများရှိ ဒေသနေပြည်သူများနှင့်ခရီးသွားလုပ်ငန်းအား အထောက်အပံ့ဖြစ်စေရန် ငလျင်ဒဏ်သင့်ဒေသများသို့သွားရောက်လည်ပတ်နိုင်ကြောင်း နစက၏ဟိုတယ်နှင့်ခရီးသွားလာရေးဝန်ကြီးဌာနက ယမန်နေ့(မေ ၈ ရက်) နေ့စွဲဖြင့်အကြံပြုထုတ်ပြန်ထားသည်။
ပြီးခဲ့သည့်မတ်လ ၂၈ ရက်တွင်လှုပ်ခတ်ခဲ့သည့် အင်အားပြင်းငလျင်ကြောင့် စစ်ကိုင်းတိုင်း၊ မန္တလေးတိုင်း၊ ပဲခူးတိုင်း၊ ရှမ်းပြည်နယ်နှင့်နေပြည်တော်တို့တွင် လူသေဆုံးမှုနှင့် ထိခိုက်ပျက်စီးမှုများ ရှိခဲ့ကြောင်း၊ အဆိုပါဒေသများသို့ ငလျင်ကြောင့်ထိခိုက်ပျက်စီးဆုံးရှုံးခဲ့ရမှုများကို ပြည်တွင်းပြည်ပခရီးသည်များမှ သွားရောက်လေ့လာကြည့်ရှုကြခြင်းဖြင့် ငလျင်နှင့်ပတ်သက်သည့်ဗဟုသုတများ ရရှိစေနိုင်သည့်အပြင် ဟိုတယ်နှင့်ခရီးသွားလုပ်ငန်းများ၊ ဒေသခံများ၏ အလုပ်အကိုင်အခွင့်အလမ်းနှင့် ဝင်ငွေများတိုးပွားရရှိစေနိုင်ရန် အထောက်အပံ့ဖြစ်စေမည်ဖြစ်ကြောင်း ထုတ်ပြန်ချက်တွင်ဖော်ပြသည်။
ထို့ပြင် နစက၏ဟိုတယ်နှင့်ခရီးသွားလာရေးဝန်ကြီးဌာနက ငလျင်ဒဏ်သင့်ဒေသများတွင်ငလျင် ကြောင့်ထိခိုက်ပျက်စီးမှုမရှိသော ဟိုတယ်များ၊ ခရီးသွားအေဂျင်စီများ၊ ဟိုတယ်နှင့်ခရီးသွားဆိုင်ရာ အသင်းအဖွဲ့များအနေဖြင့် ပုံမှန်ပြန်လည်ဆောင်ရွက်လျက်ရှိကြောင်း၊ ပြည်တွင်းပြည်ပ ခရီးသွားဧည့်သည်များအနေဖြင့် ငလျင်ဘေးသင့်ဒေသများနှင့် မြန်မာနိုင်ငံ၏ခရီးစဉ်ဒေသများသို့ ယခင်ပုံမှန် အတိုင်း သွားလာလည်ပတ်နိုင်သည်ဟုဆိုထားသေးသည်။
လက်ရှိတွင် ငလျင်ကြောင့် သေဆုံးသူ ၄၀၀၀ နီးပါးရှိလာပြီး ထိခိုက်ပျက်စီးမှုများမှာ မန္တလေးမြို့၊ အင်းဝဒေသ၊ ပင်းယဒေသ၊ ပလိပ်ဒေသ၊ ကျောက်ဆည်-မက္ခရာဒေသ၊ အမရပူရဒေသနှင့် စစ်ကိုင်းတိုင်း၊ မင်းကွန်း ဒေသများရှိ ရှေးဟောင်းအဆောက်အအုံများစွာ ထိခိုက်ပျက်စီးခဲ့ကြောင်း၊ ၎င်းတို့အနက်ရှေးဟောင်း အဆောက်အအုံ ၉၆၁ ခုရှိသည့် အင်းဝဒေသတွင် ရှေးဟောင်းအဆောက်အအုံ ၆၁၄ ခုထိခိုက်ပျက်စီး ခဲ့ကြောင်း၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာန၏ ထုတ်ပြန်ချက်အရသိရသည်။
သတင်း - အင်ကြင်း
