#နိုင်ငံတကာသတင်း
◼အိန္ဒိယနှင့် အမျိုးသားလုံခြုံရေးကောင်စီအဆင့် အဆက်အသွယ်ရှိကြောင်း ပါကစ္စတန်သံအမတ်ကြီးပြောကြား
အိန္ဒိယနှင့်ပါကစ္စတန်ကြား အမျိုး သားလုံခြုံရေးကောင်စီအဆင့်များတွင် အဆက်အသွယ်ရှိကြောင်း အမေရိကန်နိုင်ငံဆိုင်ရာ ပါကစ္စတန်သံအမတ်ကြီး က ယမန်နေ့တွင် ပြောကြားသည်။
နျူကလီးယားလက်နက်ပိုင်ဆိုင်သော တောင်အာရှ အိမ်နီးချင်းနှစ်နိုင်ငံကြားတွင် လက်ရှိအချိန်၌ ဆက်သွယ်ပြောဆိုမှုရှိပါသလားဟု အမေရိကန်သတင်းဌာန CNN ၏ မေးမြန်းမှုအပေါ် သံအမတ်ကြီး ရစ်ဇဝမ်ဆာအက်ရှိက် က ယင်းသို့ ပြောကြားခြင်းဖြစ်ကာ နှစ်ရက်ကြာတိုက်ခိုက်မှုများ ဖြစ်ပေါ်ခဲ့ပြီးနောက် နှစ်နိုင်ငံကြားတင်းမာမှုများ လျော့ ကျလာရေးမှာ အိန္ဒိယပေါ်တွင် မူတည်ကြောင်းလည်း ၎င်းက ပြောသည်။
“ အမျိုးသားလုံခြုံရေးကောင်စီအဆင့်မှာ အဆက်အသွယ်ရှိတယ်လို့ ကျွန်တော်ထင်ပါတယ်။” ဟု သံအမတ်ကြီးက ပြောကြားပြီး နှစ်ရက်အတွင်းဖြစ်ပေါ်ခဲ့သော လုပ်ရပ်များ၊ ပြောစကားများကို ရပ်တန့်ရန် လိုအပ်ကြောင်း ၎င်းက ဆက်ပြောခဲ့ကာ နှစ်ဘက်ကြားဆက်သွယ်မှုအကြောင်းကိုမူ ရှိက်က အကျယ်ချဲ့မပြောခဲ့ပေ။
“အခုဆိုရင်တင်းမာမှုလျော့ပါးအောင်လုပ်ဖို့ အိန္ဒိယမှာ တာဝန်ရှိပါတယ်။ သည်းခံနိုင်စွမ်းမှာ အကန့်အ သတ်ရှိ ပါတယ် ။ ပါကစ္စတန်က လက်တုံ့ပြန်ခွင့်ကို စွဲကိုင်ထားပြီး တုံ့ပြန်မှုလုပ်ဖို့ ပြည်သူလူထုကလည်း အစိုးရကို ဖိအားပေးနေပါတယ်။" သံအမတ်ကြီးက ဆက်ပြောသည်။
အမေရိကန်အပါအဝင် ကမ္ဘာ့နိုင်ငံများကလည်း တင်းမာမှုများ လျော့ပါးအောင် လုပ်ဆောင်ရန်နှင့် ဆက်သွယ်ရေးလမ်းကြောင်းများဖွင့်ထားရန် နယူးဒေလီ နှင့် အစ္စလာမ္မာဘတ် အား တိုက်တွန်းထားပြီးတိုက်ရိုက်ဆွေးနွေးကြရန် ဝါရှင်တန်က တောင်းဆိုထားသည်။
ထိုအတော အတွင်းမှာပင် အိန္ဒိယ နှင့် ပါကစ္စတန်ကြားက စစ်ပွဲမှာမိမိတို့နှင့် မပတ်သက်ကြောင်း နှင့် ယင်းနှစ်နိုင်ငံကို အမေရိကန်ကလည်း မထိန်းချုပ်နိုင်ကြောင်း အမေရိကန်ဒုတိယသမ္မတ ဂျေဒီဗန့်စ် က ပြောကြားသည်။
“ ဒါကြီးကို အမြန်ဆုံး လျော့ပါးသွားတာကို ကျွန်တော်တို့လိုလားပါတယ် ။ ဒါပေမယ့်လည်း ဒီနိုင်ငံတွေကို ကျွန်တော်တို့ မထိန်းချုပ်နိုင်ပါဘူး” ဟု ဖောက်စ်သတင်းဌာန၏ "The Story with Martha MacCallum" ရုပ်သံအစီအစဉ် တွင် ဗန့်စ်က ပြောကြားသည်။
“ ကျွန်တော်တို့လုပ်နိုင်တာကတော့ တင်းမာမှုတွေ နည်းနည်း အရှိန်လျော့လာအောင် ဒီလူတွေကို ကြိုးစားတိုက်တွန်းတာဖြစ်ပါတယ်။ ဒါပေမယ့်လည်း အခြေခံအားဖြင့် အမေရိကန်ထိန်းချုပ်နိုင်စွမ်းနဲ့ဘာမှမဆိုင်၊ ကျွန်တော်တို့နဲ့ဘာမှမပတ်သက်တဲ့ စစ်ပွဲထဲကို ကျွန်တော်တို့ ပါဝင်ပတ်သက်မှု လုပ်မှာ မဟုတ်ပါဘူး။” ဟု အမေရိကန် ဒုတိယသမ္မတ က ဆက်လက်ပြောကြားခဲ့သည်။
သတင်း-ရဲမင်း
ကိုးကား-Reuters
