#ယနေ့ထုတ်သတင်းစာ_သတင်း
◼ ထိုင်းနိုင်ငံသို့ တရားမဝင် ဝင်ရောက်လာသည့် မြန်မာရွှေ့ပြောင်းလုပ်သား ၇၁ ဦး ဖမ်းဆီးခံရ
ထိုင်းနိုင်ငံသို့ တရားမဝင် ဝင်ရောက်ပြီး မလေးရှားသွားမည့်သူများပါဝင်သော မြန်မာအလုပ်သမား ၇၁ ဦးကို ကန်ချနဘူရီခရိုင် တောထဲတွင်ဖမ်းမိခဲ့ကြောင်း ကန်ချနဘူရီရဲတပ်ဖွဲ့က မေ ၆ ရက်တွင် သိရသည်။
မြန်မာအလုပ်သမား ၇၁ ဦးသည် မေ ၆ ရက် ကန်ချနဘူရီခရိုင် နံနက်အစောပိုင်း ၁ နာရီခွဲခန့်တွင် ကန်ချနစန်ခရာဘူရီဒေသရှိတောအစပ်တွင် ပုန်းအောင်းပြီး ကားသမားများလာခေါ်ရန် စောင့်ဆိုင်းနေစဉ်ရခြင်းဖြစ်ကြောင်း ထိုင်းစုပေါင်းရဲတပ်ဖွဲ့၏ ဖမ်းဆီးခံရခြင်း သိရသည်။
မြန်မာအလုပ်သမား ၇၁ ဦးတွင် အမျိုးသား ၃၂ ဦးနှင့် အမျိုးသမီး ၃၉ ဦး ပါဝင်ပြီး မည်သည့်စာရွက်စာတမ်းမှ မပါရှိကြောင်း၊ ထိုင်းဘာသာစကားဖြင့် ဆက်သွယ်ပြောဆိုနိုင်ခြင်း မရှိသည့်အတွက် စန်ခရာဘူရီရဲစခန်းသို့ ထပ်မံစစ်ဆေး မေးမြန်းရန် ပို့ဆောင်ခဲ့ကြောင်း၊ စကားပြန်မှတစ်ဆင့်မေးမြန်းချက်အရ အဆိုပါအလုပ်သမားများသည် ထိုင်းနိုင်ငံအတွင်းပိုင်းပြည်နယ်များ၊ တောင်ပိုင်းဒေသနှင့် မလေးရှားတို့တွင်အလုပ်လုပ်ရန် လာရောက်ကြကြောင်း၊ ပွဲစားများကို အကွာအဝေးအပေါ်မူတည်၍ တစ်ဦးလျှင် ဘတ် ၁၈ဝဝဝ မှ ၃၅ဝဝဝ အထိပေးခဲ့ကြောင်း ဝန်ခံခဲ့သည်ဟု ထိုင်းသတင်းများက ဖော်ပြထားသည်။
မြန်မာအလုပ်သမား ၇၁ ဦးကို စန်ခရာဘူရီရဲစခန်းမှ လူဝင်မှုကြီးကြပ်ရေးဥပဒေဖြစ်သည့် နိုင်ငံခြားသားများ တရားမဝင် ဝင်ရောက်နေထိုင်ခြင်းဖြင့် တရားစွဲဆိုခဲ့ပြီး မူရင်းနိုင်ငံသို့ ပြန်လည်ပို့ဆောင်မည်ဖြစ်ကြောင်း သိရသည်။
ဧပြီ ၂၇ ရက် ည ၁၁ နာရီခန့်ကလည်း ထိုင်း-မြန်မာနယ်စပ် ကန်ချနဘူရီခရိုင်တွင် တရားမဝင်နယ်စပ်ဖြတ်ကျော်ဝင်ရောက်လာသော မြန်မာနိုင်ငံသား ၂ဝ ဦးကို ထိုင်းရဲတပ်ဖွဲ့က ဖမ်းဆီးခဲ့ကြောင်း Kanchanaburi News တွင်ဖော်ပြချက်အရသိရသည်။
