#နိုင်ငံတကာသတင်း
◼ကုန်သွယ်ရေးစစ်ပွဲအရေး အမေရိကန်နှင့် တရုတ် စနေနေ့ ဆွေးနွေးမည်
ကမ္ဘာ့အကြီးဆုံး စီးပွားရေးနှစ်နိုင်ငံကြားက ကုန်သွယ်ရေးစစ်ပွဲ အရှိန်လျော့ကျလာစေရေး ကြိုးပမ်းရန် အမေရိကန်နှင့်တရုတ် အရာရှိများ ကယခုသီတင်းပတ်ကုန်တွင် ဆွေးနွေးပွဲများ စတင်ကြတော့မည်ဖြစ်သည်။
မေ ၉ ရက် မှ ၁၂ ရက် အထိ ဆွစ်ဇာလန်နိုင်ငံတွင် ကျင်းပမည့်ဆွေးနွေးပွဲသို့ စီးပွားရေးနှင့်ပတ်သက်လျှင် တရုတ်ထိပ်သီးဖြစ်သည့် ဒုတိယဝန်ကြီးချုပ် ဟီလီဖန်း တက်ရောက်မည်ဖြစ်ကြောင်း တရုတ်နိုင်ငံခြားရေး ဝန်ကြီးဌာနက ပြောကြားသည်။
အမေရိကန်ဘက် မှ ဘဏ္ဍာရေးဝန်ကြီး စကော့ဘက်ဆန့် နှင့် အမေရိကန်ကုန်သွယ်ရေးကိုယ်စားလှယ် ဂျေမီဆန်ဂရီယာ တို့ တက်ရောက်ကြမည်ဖြစ်ကြောင်း ၎င်းတို့၏ ရုံးများက ပြောကြားသည်။
ဒုတိယအကြိမ် အမေရိကန်သမ္မတဖြစ်လာခဲ့ပြီးနောက် သမ္မတ ဒေါ်နယ်ထရန့် က တရုတ်ကုန်ပစ္စည်းများအပေါ် သွင်းကုန်ခွန်သစ် ၁၄၅ ရာခိုင်နှုန်းအထိ စည်းကြပ်ခဲ့ပြီး ပေကျင်းကလည်း အမေရိကန်ကုန်ပစ္စည်းများအပေါ် အခွန် ၁၂၅ ရာခိုင်နှုန်း အထိ ပြန်လည်ချမှတ်ထားသည်။
နှစ်ဖက် ဆွေးနွေးပွဲများ လပေါင်းများစွာ ကြာမြင့်နိုင်ကြောင်း ကမ္ဘာ့ကုန်သွယ်ရေး ကျွမ်းကျင်သူများက ဘီဘီစီသတင်းအား ပြောကြားကြသည်။
ယင်းမှာ ဒေါ်နယ်ထရန့်၏ ကျမ်းသစ္စာကျိန်ဆိုပွဲသို့ တရုတ် ဒုတိယသမ္မတ ဟန်ဇန်း တက်ရောက်ခဲ့ပြီးနောက်ပိုင်း အမေရိကန်နှင့် တရုတ်ကြား ပထမဆုံး အကြိမ် အဆင့်မြင့် ထိတွေ့ဆက်ဆံမှု ဖြစ်သည်။
အမေရိကန်၏ အကျိုးစီးပွားများကို ပိုမိုဆောင်ရွက်နိုင်ရန် နိုင်ငံတကာစီးပွားရေးစနစ်ကို ပြန်လည်၍ မျှခြေညီအောင် လုပ်ဆောင်နိုင်မည်ဟု မျှော်လင့်ကြောင်း အမေရိကန် ဘဏ္ဍာရေးဝန်ကြီး ဘက်ဆန့် က ပြောကြားသည်။
ယခုဆွေးနွေးမှုမှာ ကြီးမားသောကုန်သွယ်ရေးသဘောတူညီချက်အတွက် မဟုတ်ဘဲ ကုန်သွယ်ရေးစစ်ပွဲ အရှိန်လျှော့ချရေးကိစ္စက အဓိကဖြစ်မည်ဟု ခံစားရကြောင်း နှင့် ရှေ့မဆက်ခင်မှာ တင်းမာမှုအရှိန်လျော့ရေးကို မဖြစ်မနေလုပ်ဆောင်ရမည်ဖြစ်ကြောင်း ဖောက်စ် သတင်းနှင့် တွေ့ဆုံချိန်၌ ဘက်ဆန့်က ပြောကြားသည်။
လက်ရှိပြဿနာကို ဆွေးနွေးညှိနှိူင်းမှုများဖြင့် ဖြေရှင်းသွားရန် အမေရိကန်က အလိုရှိခဲ့ပါက ကမ္ဘာကြီးနှင့်၎င်းတို့ကိုယ်တိုင်အပေါ် တစ်ဖက်သတ်ချမှတ်ခဲ့သော အခွန်အကောက်များ၏ အပြုသဘောမဆောင်သည့် ရိုက်ခတ်မှုများကို အမေရိကန်က ရင်ဆိုင်ဖြေရှင်းရမည် ဖြစ်ကြောင်း တရုတ်စီးပွားကူးသန်းဝန်ကြီးဌာန ပြောရေးဆိုခွင့်ရှိသူက ယနေ့ နံနက်ပိုင်းတွင် ပြောကြားသည်။
တစ်ကမ္ဘာလုံးမှ မျှော်လင့်ချက်များ ၊ နိုင်ငံ၏ အကျိုးစီးပွားနှင့် အမေရိကန်စီးပွားရေးလုပ်ငန်းများထံမှ ပန်ကြားမှုများကို ထည့်သွင်းစဉ်းစားပြီးနောက် အမေရိကန် နှင့် ထိတွေ့ဆက်ဆံရန် ပေကျင်းက ဆုံးဖြတ်ခဲ့ကြောင်း တရုတ်အစိုးရမီဒီယာက ရေးသားဖော်ပြသည်။
တရုတ်နိုင်ငံက ဆွေးနွေးမှုများအတွက် လမ်းဖွင့်ထားကြောင်း သို့သော်လည်း တစ်ဖက်က ကုန်သွယ်ရေးစစ်ပွဲကို ဆက်လက်ဆင်နွဲရန်ဆုံးဖြတ်ခဲ့ပါက တရုတ်ကလည်း အဆုံးအထိ တိုက်ပွဲဝင်သွားမည်ဖြစ်ကြောင်း အစိုးရမီဒီယာသတင်းက ဆက်လက်ပြေသည်။
သတင်း-ရဲမင်း
ကိုးကား- BBC
