မန္တလေး-ရန်ကုန် လေယာဉ်ခရီးစဉ်တွင် ဘရိတ်စနစ် ပူပြင်းမှုကြောင့် မီးလောင်မှု ဖြစ်ပွားခဲ့ဟု MNA ထုတ်ပြန်
ရန်ကုန်၊ မေ ၇
မေလ ၆ ရက်နေ့၊ ညနေပိုင်းက မန္တလေးမြို့ကနေ ရန်ကုန်မြို့ကို ပျံသန်းတဲ့ လေယာဉ်ခရီးစဉ်အတွင်း လေယာဉ်ရဲ့ Break စနစ် ပူပြင်းမှုကြောင့် ဘယ်ဖက်တာယာတွေ ပွင့်ထွက်လွင့်စင်မှုဖြစ်ပေါ်ခဲ့ပြီး မီးလောင်မှုဖြစ်ပွားခဲ့ကြောင်း မြန်မာအမျိုးသားလေကြောင်း (MNA) က ထုတ်ပြန်ပါတယ်။
ခရီးစဉ် UB – 812 ကို ဘိုရင်း XY-ALV လေယာဉ်ဟာ ခရီးသည် ၁၄၃ ဦးကို သယ်ဆောင်ကာ ပျံတက်ဖို့ ပြုလုပ်နေစဉ် ပုံမှန်မဟုတ်တဲ့ အချက်ပြမှုဖြစ်ပေါ်ခဲ့တာကြောင့် လေယာဉ်မှုးမှ ပြေးလမ်းပေါ်မှာ ပျံသန်းမှုရပ်တန့်ခြင်း ပြုလုပ်ခဲ့တယ်လို့ ဆိုပါတယ်။
အဲ့ဒီနောက် ဘရိတ်စနစ်ပူပြင်းမှုကြောင့် ဖြစ်ပေါ်လာတဲ့ မီးတောက်ကို အချိန်မီ ငြိမ်းသက်နိုင်ခဲ့ပြီး ကျန်ရှိတဲ့ လေယာဉ်ဘီးတွေ ကောင်းမွန်တာကြောင့် လေယာဉ်ပြေးလမ်းရဲ့ မြောက်ဘက်ထိပ်မှာ ဘေးအန္တရာယ်ကင်းရှင်းစွာ ပြေးလမ်းပေါ် ရပ်တန့်နိုင်ခဲ့တယ်လို့ သိရပါတယ်။
လေယာဉ်ပေါ်မှာ ပါရှိတဲ့ လေယာဉ်အမှုထမ်းတွေ လိုက်နာကျင့်သုံးရတဲ့ Safety Operating Procedure တွေအတိုင်း ပြုလုပ်ခဲ့ပြီး ခရီးသည်တွေနဲ့ လေယာဉ်အမှုထမ်းများအားလုံး ထိခိုက်မှုတစ်စုံတစ်ရာမရှိဘဲ ဘေးကင်းလုံခြုံစွာနဲ့ လေဆိပ်နားနေဆောင်ကို ပို့ဆောင်ပေးနိုင်ခဲ့တယ်လို့ ထုတ်ပြန်ထားပါတယ်။
မြန်မာအမျိုးသားလေကြောင်းအနေနဲ့ အဆိုပါခရီးစဉ်မှာ ပါရှိတဲ့ ခရီးသည်တွေကို ရန်ကုန်မြို့ထံ အစားထိုးလေယာဉ်တွေနဲ့ ပို့ဆောင်ပေးနိုင်ခဲ့ပြီး ခရီးသည်တွေရဲ့ လိုအပ်ချက်တွေအတိုင်း အဆင်ပြေစွာ ဆောင်ရွက်ပေးနိုင်ခဲ့တယ်လို့ ဆိုပါတယ်။
ဖြစ်ပွားခဲ့တဲ့ ဖြစ်စဉ်နဲ့ ပတ်သတ်ပြီး မြန်မာအမျိုးသားလေကြောင်းမှ ခရီးသွားမိဘပြည်သူတွေကို အနူးအညွတ်တောင်းပန်ကြောင်း ပြောကြားခဲ့ပြီး အခုမတော်တဆဖြစ်ပွားမှုအတွက် စုံစမ်းစစ်ဆေးမှုတွေကို စနစ်တကျ ဆောင်ရွက်နေပြီလို့ အသိပေးထားပါတယ်။