🍚 ကောက်ညှင်း ငချိပ်ပေါင်း 🍚
********************************
ကောက်ညှင်း ငချိပ်ပေါင်းဆိုတာ
မြန်မာလူမျိုးများရဲ့ အကြိုက်ဆုံး အစားအစာတစ်ခုပါ။
ချက်စားလို့ ရပေမယ့်လည်း မြေပေါင်းအိုးလေးနဲ့ပေါင်းမှ
ကောက်ညှင်းပေါင်း၏ အနှစ်သာရ ပိုပြည့်ဝ၏။
တောင်ရိုးငချိပ်လေးကို မြေအိုးနဲ့ပေါင်းစားရင်
တဖောက်ဖောက်နဲ့ ဝါးစားလို့ အလွန်ကောင်း၏။
ပေါင်းနည်းလေးက ဒီလို။
ကောက်ညှင်း ငချိပ် ( ခေါ် ) ကောက်ညှင်းမဲမကို
တစ်ည ရေစိမ်ထား။
မိုးလင်းရင် မြေအိုးလေးထဲထည့် ရေစစ်ထား။
အောက်ခံအိုးလေးထဲ ရေထည့်ပြီး ရေဆူအောင်တည်။
ရေဆူလာရင် မီးအားသင့်ရုံလေးလျှော့။
ရေတွေ တအားကြီးပွက်နေရင်
အပေါ်ပေါင်းအိုးထဲ ရေတွေ ဝင်ကုန်မယ်။
အပေါ်က ကောက်ညှင်းအိုးလေးကို မြေအိုးဖုံးလေးဖုံး။
ရေငွေ့လုံအောင် အိုးနှစ်ခုကြား အဝတ်လေးနဲ့ပတ်။
တအေးတဆေးပေါင်းထား။
၁ နာရီလောက်ပေါင်းပြီးရင် ရပြီပေါ့။
ကောက်ညှင်းသား အနည်းငယ်မာတယ်ထင်ရင်
အဖုံးလေးဖွင့်ကြည့်ပြီး
ရေလေးတော့ တောက်တောက်ပေးပေါ့။
ကောက်ညှင်းငချိပ်ရရင်တော့ မိမိနှစ်သက်တဲ့
ပုံစံနဲ့ စားလို့ရပြီပေါ့။
ကျမကတော့ ကောက်ညှင်းငချိပ်ကို
နှမ်းတောင်း, အုန်းသီးနဲ့လည်းစားတယ်။
ကောက်ညှင်းငချိပ်ကို အရသာမှုန့် အနည်းငယ် ,
မြေပဲဆီ, ပဲပြုတ်, နှမ်းတောင်း,
ဒါတွေနဲ့ ရောနယ်ပြီး
ငခြောက်ဖုတ်, အုန်းသီးနဲ့လည်း တွဲဖက်စားတယ်။
နှမ်းထောင်းလေး ထောင်းတာကတော့ ဒီလို။
ဒယ်အိုးကို မီးဖိုပေါ်တင် အပူပေး။
ဒယ်အိုးကြီး ပူလာရင် မီးပိတ်။
နှမ်းတွေထည့် မွှေ။
နှမ်းလှော်နံ့လေး သင်းလာရင်
ကျောက်ငရုတ်ဆုံကြီးထဲထည့်
ဆားလေး သင့်ရုံထည့်
မငံစေနဲ့
မညက် တညက်လေးထောင်း
ညက်သွားရင် သိပ်မလှ
ကဲ တော်ပြီနော်။
အားလုံးပဲ အဆင်ပြေကြပါစေ။
