#ပြည်တွင်းသတင်း
◼ မြန်မာပြည်သူများကိုကူညီရန် ရန်ပုံငွေများအရေးပေါ်လိုအပ်နေဟု UN ထုတ်ပြန်
မြန်မာနိုင်ငံ၌ လူသားချင်းစာနာထောက်ထားမှုဆိုင်ရာ အကူအညီလိုအပ်နေသူ များကိုကူညီရန် အရေးပေါ်ရန်ပုံငွေများလိုအပ်နေကြောင်း ကမ္ဘာ့ကုလသမဂ္ဂ (UN) က ယနေ့(ဧပြီ ၃၀ ရက်) တွင် ထုတ်ပြန်သည်။
ယခုနှစ်တွင် လူသားချင်းစာနာထောက်ထားမှုလိုအပ်ချက်နှင့် တုံ့ပြန်ရေးအစီအစဉ်(HNRP) ထံသို့ ဒေါ်လာ ၂၇၅ သန်းတောင်းဆိုထားသော်လည်း ဘဏ္ဍာရေးစနစ်အရ ဒေါ်လာ ၃၅ သန်းသာထုတ်ပေးထားကြောင်း အဆိုပါထုတ်ပြန်ချက်တွင်ဖော်ပြထားသည်။
မြန်မာနိုင်ငံ၌ငလျင်လှုပ်ခတ်ပြီးရက်ပိုင်းအတွင်း UN က ဒေါ်လာသန်း ၂၀ ထောက်ပံ့ပေးထားပြီး ကျွမ်းကျင်ပညာရှင်များပါဝင်သည့် United Nations Disaster Assessment and Coordination (UNDAC) အဖွဲ့ကိုလည်းစေလွှတ်ပေးခဲ့ကြောင်း UN ကထုတ်ပြန်ထားသည်။
မြန်မာနိုင်ငံတွင် ငလျင်ဘေးကြီးသင့်ခဲ့သည်မှာ တစ်လပြည့်ခဲ့ပြီဖြစ်ပြီး ငလျင်ဘေးသင့်ပြည်သူများမှာ ယာယီတဲမျာတွင်ဆက်လက်နေထိုင်နေကြရကြောင်း၊ သန့်ရှင်းသည့်သောက်သုံးရေ၊ ကျန်းမာရေးစောင့်ရှောက်မှုနှင့် ကာကွယ်စောင့်ရှောက်ပေးမှုများ အလုံအလောက်မရရှိနိုင်ကြသေးကြောင်း၊ပြန်လည်ထူထောင်နိုင်ရေးအတွက် အကူအညီများလိုအပ်လျက်ရှိနေကြောင်း UN Myanmar ကလည်းထုတ်ပြန်ထားသည်။
ပြီးခဲ့သည့်မတ်လ ၂၈ ရက်မွန်းလွဲပိုင်းကလှုပ်ခတ်ခဲ့သည့် အင်အားပြင်းငလျင်ကြောင့် မြန်မာနိုင်ငံတွင် လူပေါင်း ၃၇၀၀ ကျော်သေဆုံးကာ ၅၀၀၀ ကျော်ဒဏ်ရာရရှိခဲ့ပြီး လူဦးရေခြောက်သိန်းကျော် ငလျင်ဘေးသင့်ခဲ့သည်ဟု နစက ၏ထုတ်ပြန်ချက်များအရသိရသည်။
သတင်း - နေသစ်ဦး
ဓာတ်ပုံ - UN
