ရေဘဝဲအိမ်ကြော် ခပ်စပ်စပ်လေး
ချက်ပြုတ်ရန်ကြာမြင့်ချိန် - (၃၅) မိနစ်

ရေဘဝဲ - (၂) ကောင်
ကြက်သွန်မြိတ် (အကြီး) - (၁) ချောင်း
ဂျင်း - စားပွဲတင်ဇွန်း (၂) ဇွန်း
ကိုရီးယားငရုတ်သီးအမှုန့် - စားပွဲတင်ဇွန်း (၃) ဇွန်း
ပဲငံပြာရည် - စားပွဲတင်ဇွန်း (၃) ဇွန်း
သကြား - စားပွဲတင်ဇွန်း (၁) ဇွန်း
ပြောင်းဖူးမှုန့်/ အာလူးမှုန့် - စားပွဲတင်ဇွန်း (၁) ဇွန်း
ဂျုံမှုန့် - အနည်းငယ်
သကြားရည် (Corn Syrup) - စားပွဲတင်ဇွန်း (၁) ဇွန်း
ဆီ - အနည်းငယ်
ငရုတ်ကောင်းမှုန့် - လက်ဖက်ရည်ဇွန်း (၁) ဇွန်း
ကြက်သွန်နီ - (၂) လုံး
ကြက်သွန်ဖြူ - (၇) မွှာ
ငရုတ်ပွ - (၁) တောင့်

ချက်ပြုတ်နည်း
၁) ပထမဆုံးအနေနဲ့ ရေဘဝဲတွေကိုသန့်ရှင်းရေးပြုလုပ်ပြီး ခေါင်းပိုင်းကိုကတ်ကြေးဖြင့် တစ်ဝက်ဖြတ်ပြီးမလိုအပ်သော အရာများကိုရှင်းပြစ်ပါ။ ပြီးရင်တော့ ရေဘဝဲတွေကိုဂျုံမှုန့်ဖြင့်နယ်ပြီး ရေဆေးချလိုက်ပါ။
၂) ရေပွက်ပွက်ဆူနေသောအိုးထဲကို ရေဘဝဲများထည့်ပြီး ခဏတဖြုတ်ပြုတ်ထားလိုက်ပါ။ ပြီးရင်ပြုတ်ထားရာကနေဆယ်ပြီး မျက်လုံးဖယ်ကာ လက်နှစ်ဆစ်လောက်လှီးလိုက်ပါ။
၃) ကြက်သွန်နီကိုခပ်ပါးပါးလေးလှီးပြီး ကြက်သွန်ဖြူနှင့်ဂျင်းတို့ကို နုတ်နုတ်စဉ်းထားပါ။ ငရုတ်ပွကို ခပ်ထူထူနဲ့ရှည်ရှည်လေးတစောင်းလှီးပါ။ ကြက်သွန်မြိတ်(အကြီး) ကိုလည်း လက်တစ်ဆစ်ခန့်လှီးထားပါ။
၄) ခွက်တစ်ခုထဲတွင် ကိုရီးယားငရုတ်သီးမှုန့်၊ ပဲငံပြာရည်၊ သကြား၊ ပြောင်းဖူးမှုန့်၊ သကြားရည်နှင့် ငရုတ်ကောင်းမှုန့်အနည်းငယ်တို့ထည့်ပြီးမွှေပါ။
၅) အိုးထဲဆီအနည်းငယ်ထည့်ပြီး အပူပေးထားပါ။ ပြီးလျှင် လှီးထားသောကြက်သွန်နီ၊ ကြက်သွန်ဖြူ၊ ကြက်သွန်မြိတ်၊ ဂျင်းနှင့် ငရုတ်သီးတို့ကို မီးအေးအေးဖြင့်ကြော်ပါ။ ပြီးလျှင်ရေဘဝဲများထည့်ပြီး ကြော်ပါ။ နောက်ဆုံးအနေနဲ့ ဖျော်စပ်ထားတဲ့ဆော့စ်ပါထည့်ပြီး သေချာကျက်တဲ့အထိ ချက်လိုက်ပါ။ ရေဘဝဲများကျက်သွားတဲ့အခါ ဆယ်ပြီးမိမိတို့ကြိုက်နှစ်သက်တဲ့ ပန်းကန်ထဲထည့်ပြီး သုံးဆောင်နိုင်ပါပြီ။