ကုန်သွယ်ရေး ဆွေးနွေးချင်ရင် အခွန်ကောက်တာတွေ အရင်ရုပ်သိမ်းဖို့ အမေရိကန်ကို တရုတ်ပြော
ပေကျင်း၊ ဧပြီ-၂၀၂၅
မျိုးဆက်(VOM)
အမေရိကန်နဲ့ တရုတ်တို့အကြား ကုန်သွယ်ရေးစစ်ပွဲကို ဖြေရှင်းဖို့ အလေးအနက်သဘောထားတယ်ဆိုရင် တရုတ်ကုန်ပစ္စည်းတွေအပေါ် အရင်ဆုံး အခွန်တွေရုပ်သိမ်းဖို့ တရုတ်နိုင်ငံက အမေရိကန်ကို တိုက်တွန်းလိုက်ပါတယ်။
လက်ရှိကုန်သွယ်ရေးစစ်ပွဲနဲ့ပတ်သက်ပြီး အမေရိကန်အစိုးရဘက်က ထုတ်ဖော်ပြောကြားတာတွေရှိနေပေမယ့် နှစ်နိုင်ငံအကြား ကုန်သွယ်ရေးဆွေးနွေးတာမျိုးမရှိဘူးလို့ တရုတ်တာဝန်ရှိသူတွေကပြောပါတယ်။ နှစ်နိုင်ငံအကြား ကုန်သွယ်ရေးစစ်ပွဲဟာ အရှိန်မြင့်နေပြီး အမေရိကန်ရဲ့အခွန်ကို လက်တုံ့ပြန်တဲ့အနေနဲ့ မှာယူထားတဲ့ ဘိုးအင်းလေယာဉ်တွေကို တရုတ်က အမေရိကန်ပြန်ပို့ခဲ့ပါတယ်။
အမေရိကန်ဟာ တရုတ်သွင်းကုန်တွေအပေါ် အခွန် ၁၄၅ ရာခိုင်နှုန်းထိ ကောက်ခံနေပြီး တရုတ်ကလည်း အမေရိကန်သွင်းကုန်တွေအပေါ် ၁၂၅ ရာခိုင်နှုန်းထိ လက်တုံ့ပြန်အခွန်ကောက်ထားပါတယ်။ လက်ရှိမှာတော့ ထရန့်ဟာ တရုတ်အပေါ် မူဝါဒကို ပျော့ပြောင်းလာနေပြီး အခွန်တွေ သိသိသာသာ လျှော့ချမယ်လို့ ဆိုပါတယ်။
ကုန်သွယ်ရေးစစ်ပွဲကို အမှန်တကယ်ဖြေရှင်းလိုပါက အမေရိကန်အနေနဲ့ တရုတ်အပေါ် ချမှတ်ထားတဲ့ တဖက်သတ်အခွန်တွေအားလုံးကို ဖယ်ရှင်းသင့်တယ်လို့ တရုတ်ကုန်သွယ်ရေး ဝန်ကြီးဌာန ပြောရေးဆိုခွင့်ရှိသူက ပြောပါတယ်။
လက်ရှိအချိန်ထိ တရုတ်နဲ့ အမေရိကန်အကြား ကုန်သွယ်ရေးဆိုင်ရာ သဘောတူညီချက်ရဖို့ မဆိုထားနဲ့ တိုင်ပင်တာမျိုး ၊ ညှိနှိုင်းတာမျိုးမရှိသေးဘူးလို့ တရုတ်နိုင်ငံခြားရေးဝန်ကြီးဌာန ပြောဆိုဆိုခွင့်ရှိသူကလည်း ပြောပါတယ်။ သတင်းတွေက အမှားတွေလို့ သူကပြောပါတယ်။
အမေရိကန် ကုန်သွယ်ရေးဝန်ကြီးကတော့ တရုတ်နဲ့ အမေရိကန်တို့အကြား သဘောတူညီချက်ကြီးတရပ်အတွက် အခွင်းအလမ်းရှိနေပြီး ရေရှည်မတည်မြဲနိုင်တဲ့ ကုန်သွယ်ရေးစစ်ပွဲ အရှိန်လျှော့ဖို့ မျှော်လင့်တယ်လို့ ထုတ်ဖော်ပြောဆိုထားပါတယ်။
