ဓနဥစ္စာ ရှာဖွေရာ၌ လိုအပ်သောဥစ္စာကို ရစိမ့်သောငှာ အောက်ပါနည်းလမ်းများဖြင့် ဆောင်ရွက်ရမည် ။
(၁) လိုအပ်သော စီးပွားရွှေငွေ အရေအတွက်ကို မိမိ၏ စိတ်ထဲတွင် တိတိကျကျ ပိုင်းခြား မှန်းထားရမည် ။ ငွေများများကြီး အလိုရှိသည်ဟူသော မှန်းဆချက်မျိုးနှင့် ကိစ္စမပြီးချေ ။ မည်၍ မည်မျှ အလိုရှိသည်ကို တိတိကျကျ မှန်းရွယ်ထားရမည် ။ အရေအတွက်ကို တိတိကျကျ မှန်းထားရခြင်းမှာ အချည်းအနှီး အကြောင်းမဲ့ မဟုတ်ကြောင်းကို နောက်အခန်းတစ်ခန်းတွင် ဖော်ပြလိမ့်မည် ။
(၂) ထိုငွေကို ရမှုအတွက် မိမိက မည်မျှလောက်အထိ အပင်ပန်း အဆင်းရဲခံနိုင်မည်ဟူ၍လည်း တိတိကျကျ ဆုံးဖြတ်ထားရမည် ။ လောက၌ တစ်ခုခုမပေးဘဲ အချည်းအနှီး အလကား ရနိုင်သော အရာဟူ၍ မရှိချေ ။
(၃) မှန်းထားသောငွေကို မည်သည့်နေ့ရက်တွင် ရလိုသည်ဟု ရက်စွဲနှင့်တကွ တိတိကျကျ ဆုံးဖြတ်ထားရမည် ။
(၄) ထိုငွေကို ရမှုအတွက် ဘယ်ကဲ့သို့ ဆောင်ရွက်မည်ဟု အကြံအစည်ပြုလုပ်ပြီးလျှင် ၎င်းအကြံအစည်အတိုင်း
မဆိုင်းမလင့်ဘဲ ချက်ချင်း စတင် ဆောင်ရွက်ရမည် ။
(၅) အလိုရှိသော ငွေအရေအတွက် ရရှိရမည့် ရက်စွဲ ၊ ထိုငွေရမှုအတွက် မိမိက အနစ်နာခံနိုင်မည့် အချက်များ ၊ ၎င်းရမှုအတွက် ဆောင်ရွက်မည့် အကြံအစည်များ စသည်တို့ကို စာရွက်တစ်ရွက်ပေါ်တွင် ထင်ထင်ရှားရှား ရေးသားဖော်ပြ ရမည် ။
(၆) ၎င်းစာရွက်ကို နံနက်အိပ်ရာမှ ထသောအခါ၌ တစ်ကြိမ် ၊ အိပ်ရာဝင်သောအခါ၌ တစ်ကြိမ် ၊ အသံထုတ်၍ ဖတ်ရမည် ။ ထိုကဲ့သို့ ဖတ်နေစဉ် ထိုငွေကို လက်ထဲရောက်ပြီးကဲ့သို့ စိတ်ချယုံကြည်၍ မျက်စိထဲတွင် ထင်မြင်ရမည် ။
အထက်ပါ နည်းလမ်းခြောက်ခုအတိုင်း ကျကျနန လိုက်နာ ဆောင်ရွက်ဖို့ အလွန် အရေးကြီးလှ၏ ။ အထူးသဖြင့် နံပါတ်(၆)ကို တိတိကျကျနှင့် မပျက်မကွက် လိုက်နာဖို့ အလွန်အရေးကြီး၏ ။
#ရွှေဥဒေါင်း