#နိုင်ငံတကာသတင်း
◼အမေရိကန် နှင့် အခွန်ကိစ္စဆွေးနွေးညှိနှိုင်းမှုများကို ရွှေ့ဆိုင်းလိုက်ကြောင်း ထိုင်းဝန်ကြီးချုပ်ပြောကြား
အရေးကြီးသောကိစ္စရပ်များအား ပြန်လှန်သုံးသပ်ရန် အမေရိကန် က တောင်းဆိုခဲ့ပြီးနောက် ကြီးလေးသောအခွန်များနှင့်ပတ်သက်၍ ဝါရှင်တန်နှင့် ထိုင်းနိုင်ငံတို့ကြား ညှိနှိုင်းဆွေးနွေးမှုများအား ရွှေ့ဆိုင်းထားလိုက်ကြောင်း ထိုင်းဝန်ကြီးချုပ် ပေထုန်တန် ရှင်နာဝပ်က ယနေ့တွင်ပြောကြားလိုက်သည်။
တွေ့ဆုံပွဲ နေ့ရက်အသစ်ကို စီစဉ်နေကြကြောင်း ပေထုန်တန်က ပြောကြားပြီးယခင် သတ်မှတ်ထားသော နေ့မှာ ဧပြီ ၂၃ ရက် ဖြစ်ကြောင်းသိရသည်။
ထိုင်းနိုင်ငံသည် အမေရိကန်အခွန်စည်းကြပ်မှုများ အများဆုံးချမှတ်ခံရသော အရှေ့တောင်အာရှနိုင်ငံများတွင် ပါဝင်ပြီး တစ်ကမ္ဘာလုံးအတိုင်းအတာဖြင့် အမေရိကန်၏အခွန်စည်းကြပ်မှု ဆိုင်းငံ့ထားခြင်းများ ဇူလိုင်လတွင် သက်တမ်းမကုန်ဆုံးမီ အခွန်လျှော့ပေါ့ပေးရေးကို မညှိနှိုင်းနိုင်ပါက ၃၆ ရာခိုင်နှုန်း စည်းကြပ်မှုနှင့် ရင်ဆိုင်နေရသည်။
“ကျွန်မတို့က နှေးကွေးလွန်းနေတာ မဟုတ်ပါဘူး။ ကျွန်မတို့ရဲ့ အခွန်စည်းကြပ်မှုအပါအဝင် အရေးကြီးတဲ့ကိစ္စတွေကို ပြန်လှန်သုံးသပ်နေတာပါ။ ကျွန်မတို့ရဲ့ အခွန်တွေကိုလည်း သင့်တော်သလို ပြန်ညှိပေးသွားပါမယ်။” ဟု ပေထုန်တန် က ပြောကြားပြီး ထိုင်းစိုက်ပျိုးရေးထုတ်ကုန်များနှင့် အခြားသွင်းကုန်များကို လေ့လာဆန်းစစ်နေကြောင်း ဆက်ပြောသည်။
အမေရိကန်သည် ယမန်နှစ်က ထိုင်းနိုင်ငံ၏ အကြီးဆုံးပြည်ပတင်ပို့မှုဈေးကွက် ဖြစ်ခဲ့ကာ ထိုင်းနိုင်ငံမှတင်ပို့မှုစုစုပေါင်း၏ ၁၈ ဒသမ ၃ ရာခိုင်နှုန်းကို လက်ခံခဲ့ပြီး ထိုင်းနိုင်ငံက ဝင်ငွေအမေရိကန်ဒေါ်လာ ၅၄ ဒသမ ၉၆ ဘီလီယံ ရရှိခဲ့သည်။
ထိုင်းနိုင်ငံနှင့်ကုန်သွယ်မှုတွင် မိမိတို့ဘက်၌ ဒေါ်လာ ၄၅ ဒသမ ၆ ဘီလီယံ လိုငွေ ပြသခဲ့ကြောင်း ဝါရှင်တန်က ပြောသည်။
“ကျွန်မတို့က ပညာရှင်တွေ ၊ အခြားသက်ဆိုင်သူတွေနဲ့လည်း တိုင်ပင်နေပြီး ဒီလိုအခြေအနေမှာ အကောင်းဆုံးလုပ်ဆောင်နေပါတယ်။ စိုက်ပျိုးရေးလုပ်ငန်းအကျိုးစီးပွားတွေကို အတတ်နိုင်ဆုံး ကာကွယ်နေပါတယ်။” ဟု ပေထုန်တန် က ပြောကြားကာ ညှိနှိုင်းဆွေးနွေးမှုများမှာ နှစ်နိုင်ငံစလုံးအတွက် အကျိုးဖြစ်ထွန်းသင့်ကြောင်း ၎င်းက ဆက်ပြောသည်။
ထိုင်းဆန် နိုင်ငံခြားတင်ပို့မှုများသည် ပထမသုံးလပတ်တွင် ၃၀ ရာခိုင်နှုန်းကျဆင်းသွားခဲ့ပြီး အခွန်စည်းကြပ်မှုများကြောင့် တစ်နှစ်ပတ်လုံးတင်ပို့ရန် လျာထားသည့် တန်ပေါင်း ၇ ဒသမ ၅ သန်း ထက် များစွာလျော့နည်းနိုင်ကြောင်း ထိုင်းဆန် နိုင်ငံခြားတင်ပို့ရေးအစည်းအရုံးက ပြောကြားသည်။
ပြီးခဲ့သည့်နှစ်တွင် ထိုင်းနိုင်ငံက ဆန်တန်ချိန်သန်းပေါင်း ၉ ဒသမ ၉၄ တန်အား နိုင်ငံခြားသို့ တင်ပို့ခဲ့ပြီး ဘတ်ငွေ ၂၂၅ ဒသမ ၆၅ ဘီလီယံ ရရှိခဲ့ကာ အမေရိကန်နိုင်ငံက တတိယမြောက် အများဆုံး ဝယ်ယူသည့်နိုင်ငံဖြစ်သည်။
နှစ်နိုင်ငံကြားဆွေးနွေးမှုများကို ရွှေ့ဆိုင်းထားလိုက်သော်လည်း အောက်ခြေလုပ်ငန်းအဆင့်တွင် ဆွေးနွေးမှုများ ဆက်ရှိနေကြောင်း ထိုင်းဘဏ္ဍာရေးဝန်ကြီး ပီချိုင်း ချွန်ဟာဗာဂျီရာက ပြောကြားသည်။
သတင်း-ရဲမင်း
ကိုးကား- Reuters