"အမေ ခေါ်ထိုက်သူ ဖြစ်ပါစေ"
~~~~~~~~~~~~~~~~~~
နူးညံ့တဲ့ အပင်လေးတွေတောင်
ကြမ်းတမ်းတဲ့ ကန္တာရအလယ်မှာ
အသက်ရှင်နေနိုင်ဖို့ အတွက်
တစ်ပင်ထဲလဲ ရဲရဲဝံ့ဝံ့ ရပ်တည်နိုင်သလို
တစ်ပွင့်ထဲလဲ ရဲရဲဝံ့ဝံ့ တောက်ပနိုင်သေးတာပဲ...
ကျမတို့လို မိန်းမသားတွေကရော
ရပ်တည်ရှင်သန် နေနိုင်ဖို့အတွက်
ကိုယ့်အတွက်.. ..
ကိုယ့်မိသားစုအတွက်...
ရဲရဲဝံ့ဝံ့ ရပ်တည်နိုင်တဲ့သူ
မဖြစ်သင့်ဘူးလား...?
အားနွဲ့တဲ့ မိန်းမသား ဆိုတဲ့
ဝေါဟာရအောက် အညံ့ခံ
အရှုံးပေးရမှာလား...
အိမ်ထောင်ရေး အဆင်မပြေတာနဲ့
ကိုယ့်ရင်သွေးကို စွန့်လွှတ်စရာလား...
စီးပွားရေး အဆင်မပြေတာနဲ့
ကိုယ့်သားသမီးကို လက်လွှတ်စရာလား...
လူမှုရေးပြသနာ တစ်စုံတစ်ရာကြောင့်
ကိုယ့်မိသားစုကို စွန့်ပစ်စရာလား..
နောက်လူ ပျော်ရွှင်စေဖို့
ရင်နဲ့လွယ်ဖွား သမီးသားကို
စတေးပစ်စရာလား....
မိသားစုမှာပဲ ဖြစ်ဖြစ်
ပတ်ဝန်းကျင်မှာပဲ ဖြစ်ဖြစ်
သူ့မေတ္တာကို လိုချင်ရင်
ကိုယ့်မေတ္တာ အရင်ပေးရတာပဲ...
ကိုယ်တိုင်ရော မိသားစုအပေါ်
တာဝန်ကျေခဲ့ပါရဲ့လား
ကိုယ့်သားသမီး အပေါ်မှာရော
မိခင်မေတ္တာ အပြည့်အဝ ပေးနိုင်ခဲ့ရဲ့လား
အမေ ခေါ်ထိုက်သူ ဖြစ်ပါရဲ့လား...
အသိဉာဏ်မဲ့တဲ့ တိရိစ္ဆာန်တွေတောင်
ကိုယ့်သားသမီး ၊ ကိုယ့်မိသားစုကို
အသက်နဲ့ရင်းပြီး ကာကွယ်နိုင်သေးတာ...
မိခင်စိတ် အပြည့်အဝရှိတဲ့
အမျိုးသမီးတိုင်း မှီခိုအားကိုးစရာ မရှိလဲ
ကိုယ့်ရင်သွေးကို အသက်နဲ့ရင်းပြီး
ကာကွယ်စောင့်ရှောက်ရဲတဲ့ သတ္တိရှိတယ်...။
နေခြည် (ဧရာမြေ)
