အမေရိကန်အစိုးရသည် အမေရိကန်နိုင်ငံ၏ သင်္ဘောတည်ဆောက်မှုကဏ္ဍ ပြန်လည် တိုးတက်လာစေရန်နှင့် ကမ္ဘာ့ရေကြောင်းသယ်ယူပို့ဆောင်မှု ကဏ္ဍ၌ တရုတ်နိုင်ငံ၏ လွှမ်းမိုးမှုကို ဖြတ်တောက်နိုင်ရန် ရည်ရွယ်ပြီး သမ္မတအမိန့်တစ်ရပ် ထုတ်ပြန်ရန် စီစဉ်လျက် ရှိကြောင်း သိရသည်။
အဆိုပါ ထုတ်ပြန်မည့် သမ္မတအမိန့်တွင် အစီအမံ (၁၈) ရပ် ပါဝင်မည် ဖြစ်ကာ ၎င်းတွင် အမေရိကန်နိုင်ငံသို့ တင်သွင်းလာသည့် တရုတ်နိုင်ငံထုတ် သင်္ဘောများနှင့် ဝန်ချီစက်များကို သွင်းကုန်ခွန် တိုးမြှင့် ကောက်ခံခြင်းနှင့် ပြည်တွင်းသင်္ဘောတည်ဆောက်မှုကဏ္ဍ မြှင့်တင်ရန် အမျိုးသားလုံခြုံရေး ကောင်စီ ( National Security Council, NSC ) အောက်၌ ဌာနခွဲအသစ်တစ်ခု ဖွဲ့စည်း တည်ထောင်ခြင်း၊
နျူးကလီးယား စွမ်းအင်သုံးသင်္ဘောကျင်းများရှိ အလုပ်သမားများအတွက် လုပ်ခလစာ တိုးမြှင့်ခြင်းနှင့် Elon Musk ဦးဆောင်သည့် အစိုးရလုပ်ငန်းများ ထိရောက်စွာ အကောင်အထည်ဖော်ရေး ဝန်ကြီးဌာန ( Department of Government Efficiency, DOGE ) ခေါ် ဌာနသစ်အား အမေရိကန်ရေတပ်၏ အစိုးရဝယ်ယူမှု လုပ်ငန်းစဉ်များကိုပါ ပြန်လည် သုံးသပ်ရန် ညွှန်ကြားခြင်း၊
ရေကြောင်းသယ်ယူ ပို့ဆောင်ရေးကဏ္ဍ၌ ရင်းနှီးမြှုပ်နှံမှုများ မြှင့်တင်ရန် ရေကြောင်းသယ်ယူပို့ဆောင်ရေးဇုန် ( Maritime Opportunity Zones ) နှင့် ရေကြောင်းလုံခြုံရေး ရန်ပုံငွေ ( Maritime Security Trust Fund ) တည်ထောင်ခြင်း စသည့် အစီအမံများ ပါဝင်လာနိုင်ကြောင်း သိရသည်။
ယင်းသမ္မတအမိန့်မူကြမ်းပါ အချက်များသည် သမ္မတက အတည်မပြုမီအထိ ပြင်ဆင်နိုင်ဖွယ် ရှိသော်လည်း ၂၀၂၅ ခုနှစ်၊ မတ်လ (၄) ရက် အမေရိကန်လွှတ်တော်၌ မိန့်ခွန်းပြောကြားစဉ် သမ္မတက အမေရိကန်နိုင်ငံအတွင်း၌ ကူးသန်းရောင်းဝယ်ရေးနှင့် စစ်ဘက်သုံးသင်္ဘော တည်ဆောက်မှုကို ပြန်လည် ရှင်သန်လာစေရန် ဆောင်ရွက်သွားလိုပြီး ဌာနခွဲအသစ်တစ်ခု ဖွဲ့စည်းလိုသည်ဟု ထည့်သွင်း ပြောကြားခဲ့ကြောင်း ပါရှိသည်။
