X ပလက်ဖောင်း ဆိုက်ဘာတိုက်ခိုက်ခံရပြီး ပြတ်တောက်မှု ဖြစ်ပွား
မနေ့က အီလွန်မတ်စ်ပိုင် X လူမှုကွန်ရက် ဆိုက်ဘာတိုက်ခိုက်ခံလိုက်ရပြီး တစ်ရက်တည်း ၃ ကြိမ် ပြတ်တောက်ခဲ့ပါတယ်။
DownDetector မှာတော့ X ဟာ အရှေ့တိုင်းစံတော်ချိန် မနက် ၆ နာရီ ၊ မနက် ၁၀ နာရီနဲ့ ညနေ ၂ နာရီတွေမှာ လိုင်းတွေ ကျသွားခဲ့တယ်လို့ ဆိုပါတယ်။ X လိုင်းကျသွားတာဟာ DDoS လို့ ခေါ်တဲ့ server ကျပြီး ဝင်မရအောင် လုပ်တဲ့ ဆိုက်ဘာတိုက်ခိုက်မှုကြောင့်လို့ အီလွန်မတ်စ်က ပြောပါတယ်။ ဝက်ဘ်ဆိုက်ရော app ပါ သုံးမရ ဖြစ်သွားခဲ့တာပါ။
အီလွန်မတ်စ်ကတော့ သူ့ X ပို့စ်မှာ အခုလို အကြီးအကျယ် hack တဲ့ ကိစ္စနောက်ကွယ်မှာ အဖွဲ့အစည်းကြီးကြီးတစ်ခုနဲ့အတူ နိုင်ငံတစ်နိုင်ငံလည်း ပါမယ်လို့ ပြောထားပါတယ်။
"ကျွန်တော်တို့ နေ့တိုင်း တိုက်ခိုက်ခံနေရတာပါ။ ဒါပေမယ့် ဒါကတော့ အရင်းအမြစ်အများကြီးနဲ့ လုပ်သွားတာပါ။" လို့ မတ်စ်က ဆိုပါတယ်။
X ကို လိုင်းကျအောင် DDoS Attack ဝင်ခဲ့တာ Dark Storm Team ဆိုတဲ့ ပါလက်စတိုင်းတက်ကြွ ဟက်ကာအဖွဲ့လို့ ဆိုပါတယ်။ ဒီအဖွဲ့က ဂါဇာကို အစ္စရေးတိုက်ခိုက်မှုအပေါ် ထောက်ခံအားပေးတဲ့ နိုင်ငံနဲ့ လူပုဂ္ဂိုလ်တွေကို အဓိကပစ်မှတ်ထားတဲ့ ဟက်ကာအဖွဲ့လို့ ပြောပါတယ်။
အီလွန်မတ်စ်ပြောပုံအရတော့ ဟက်ကာတွေဟာ ယူကရိန်းဧရိယာက လာတဲ့ IP address တွေ ရှိတယ်လို့ Fox News နဲ့ အင်တာဗျူးမှာ ပြောထားပါတယ်။ Twitter ကို အီလွန်မတ်စ် ဝယ်ပြီးနောက်ပိုင်း ဝန်ထမ်းအများအပြား အလုပ်ဖြုတ်ခဲ့သလို ပလက်ဖောင်းလိုင်းကျတဲ့ကိစ္စက မကြာခဏ ဖြစ်ပွားခဲ့ပါတယ်။