DeepSeek ကြောင့် ရှယ်ယာဈေးတက်သွားတဲ့ Tencent
တရုတ်မှာတော့ လျှပ်စစ်ကားကုမ္ပဏီကနေ စာပို့ app အထိ DeepSeek ကို လက်သွက်သွက်နဲ့ သုံးနေပါတယ်။
တရုတ်ရဲ့ အကြီးဆုံးနည်းပညာလုပ်ငန်းစုတစ်ခု ဖြစ်တဲ့ Tencent ကလည်း သူ့ရဲ့ Weixin app မှာ DeepSeek AI မော်ဒယ်ကနေ ရှာဖွေမှုလုပ်နိုင်အောင် စမ်းပြီး သုံးနေပါပြီ။ beta testing အနေနဲ့ Weixin အသုံးပြုသူတချို့ကို DeepSeek နဲ့ search လုပ်နိုင်အောင် စမ်းသပ်လွှင့်တင်လိုက်တာပါ။
DeepSeek ကို Weixin app မှာ စပြီး သုံးနေပြီဆိုတဲ့ သတင်းတွေ ထွက်လာအပြီးမှာတော့ Tencent အစုရှယ်ယာတွေလည်း ၆.၆% တက်လာပါတယ်။ Weixin က ပြည်တွင်းသုံး messaging app ဖြစ်ပြီး သူနဲ့ sister app ဖြစ်တဲ့ WeChat က ပြည်ပ users တွေကိုပါ ပစ်မှတ်ထားတဲ့ ဘက်စုံသုံး app ပါ။ ဒီနှစ်ခုပေါင်း အသုံးပြုသူဦးရေက သန်း ၁၃၈၀ ကျော် ရှိပါတယ်။
Waixin မှာက AI search စနစ်ကို Tencent ရဲ့ Hunyuan LLM မော်ဒယ် သုံးထားတာပါ။ Weixin မှာ DeepSeek ကို ထည့်သုံးလာတာက ရှေ့ပြေးအဆင့်လို့ ပြောရမှာပါ။ Tencent က DeepSeek ကို သူ့ရဲ့ Cloud AI Code Assistant နဲ့ Tencent Yuanbao တို့လို တခြား products တွေမှာလည်း ပေါင်းထည့်ဖို့ စဉ်းစားနေပါတယ်။
Tencent အတိုင်း Baidu ကလည်း သူ့ search engine မှာ ကုမ္ပဏီပိုင် Ernie LLM နဲ့အတူ DeepSeek ပါ ပေါင်းစည်းထားပြီလို့ ဆိုပါတယ်။ နာမည်ကျော် BYD လျှပ်စစ်ကားကုမ္ပဏီကလည်း DeepSeek နဲ့ ပေါင်းပြီး တည်ဆောက်ထားတဲ့ God's eye အလိုအလျောက်မောင်းနှင်စနစ်ကို နောက်ပိုင်းထွက်ကားတွေမှာ တပ်ဆင်သွားမယ်လို့ ကြေညာထားပါတယ်။
တစ်ဖက်မှာလည်း DeepSeek နဲ့ ပေါင်းလိုက်တဲ့ကိစ္စကြောင့် အချက်အလက်ပေါက်ကြားနိုင်တဲ့ စိုးရိမ်ချက်တွေက BYD ကို တောင်ကိုရီးယားက စုံစမ်းစစ်ဆေးမှုတွေ လုပ်ဖို့ရှိပါတယ်။