🪷 ကိုယ်ထိန်းချုပ်လို့ မရတဲ့အရာတွေအပေါ် စိတ်သောကရောက်နေမဲ့အစား ကိုယ့်ကိုယ်ကိုယ်ပဲ အရင်ထိန်းလိုက်ပါ။

🪷 ဘဝမှာ အရာရာ တော်တော်များများအပေါ် ထိန်းချုပ်လို့မရနိုင်ပါဘူး။ မိုးရွာတာ၊ နေပူတာကအစ ကိုယ်ကောင်းအောင် နေပါရက်နဲ့ ကိုယ့်အပေါ် အမြင်မကြည်တာ၊ ကိုယ့်ကို သူပြန်ချစ်တာ၊ မချစ်တာအဆုံး ကိစ္စတော်တော်များများကို ကျွန်မတို့ ထိန်းချုပ်နိုင်စွမ်း မရှိပါဘူး။ ဘာကြောင့်လဲဆိုတော့ လောကသဘာဝအရ အရာရာတိုင်းဟာ အကြောင်းအကျိုး ဆက်စပ်နေကြတာမိုလို့ပါ။

🌿 အကြောင်းရှိလို့ အကျိုးလာဖြစ်နေကြတာ။ ဘယ်အရာကမှ အကြောင်းမဲ့ ဖြစ်နေကြတာ မရှိပါဘူး။ အဆင်ပြေခြင်းမှာလည်း သူ့အကြောင်းတရားနဲ့သူ၊ အဆင်မပြေခြင်းမှာလည်း သူ့အကြောင်းတရားနဲ့သူ ဖြစ်ပါတယ်။ ဒါကို လက်သင့်ခံတတ်မှ ဘဝမှာ အေးချမ်းနိုင်မှာ ဖြစ်ပါတယ်။

လူတစ်ချို့က ကောင်းတာတွေ ဖြစ်နေရင်တော့ သိပ်သတိမထားမိကြပေမဲ့ အဆိုးတွေနဲ့ ကြုံတဲ့အခါ ကံကို၊ လောကကြီးကို၊ မိမိကိုယ်ကိုယ် အပြစ်တင်လို့ မဆုံးပါဘူး။ "ဘာလို့ ဒီလိုဖြစ်ရတာလဲ၊ ဘာကြောင့်လဲ၊ ငါကြိုးစားရက်နဲ့ ကြိုးစားသလို ဖြစ်မလာရတာလဲ" ဆိုပြီး ယူကျုံးမရ ဖြစ်တတ်ကြပါတယ်။ ကိုယ်ထိန်းချုပ်လို့ မရတဲ့အရာတွေအပေါ် အတင်းကာရော ပြန်ပြီး ပြုပြင်ချင်ကြတယ်။ ဖြေမဆည်နိုင်အောင် ဖြစ်ကြပါတယ်။

🌿 လက်ခံလိုက်ပါ။ ဘဝမှာ ကျွန်မတို့ ထိန်းချုပ်လို့ ရနိုင်တဲ့ အပိုင်း၊ မရနိုင်တဲ့အပိုင်းဆိုတာ ရှိပြီးသားပါ။ ကိုယ့်ရဲ့ အတွေးတွေ၊ အပြုအမူတွေ၊ စကားလုံးတွေ လုပ်ရပ်တွေကိုသာလျှင် ထိန်းချုပ်နိုင်ပြီးတော့ သူတစ်ပါးရဲ့ ကိုယ့်အပေါ် ထားတဲ့ အမြင်တွေ၊ အတွေးတွေ၊ အပြုအမူတွေကို ကျွန်မတို့ ဘာမှသွားပြီး ဒီလိုပြောလေ၊ ဒီလိုလုပ်လေဆိုပြီး မထိန်းချုပ်နိုင်ပါဘူး။

🪷 ဒါကို လက်သင့်ခံနိုင်အောင် ကြိုးစားပါ။ ဘဝမှာ နေတတ်ထိုင်တတ်မှ အေးချမ်းမှုဆိုတာ ရရှိတာပါ။ ကိုယ့်ရဲ့ လုပ်နိုင်စွမ်း ပြင်ပက အရာတွေကို အတင်းကြိုးစား မပြုပြင်ခြင်းအားဖြင့် မိမိရဲ့ energyကို ခြွေတာပါ။

#control #outofcontrol #acceptance
#everythinghappensforareason
#mindfulness #yoga #avyoga #aprilvirtue