ရွှေသောင်ယံမြို့တွင် တိုက်ပွဲများဖော်ဆောင်မည်ဆိုသော သတင်းများကြောင့် ချောင်းသာ၊‌ ငွေဆောင် ခရီးစဉ်များ ခေတ္တရပ်နားမှုနှင့် ပယ်ဖျက်မှုများရှိနေ

ဇန်နဝါရီ ၁၄

ဧရာဝတီတိုင်းဒေသကြီးအတွင်းရှိ ရွှေသောင်ယံမြို့တွင် AA လက်နက်ကိုင်အဖွဲ့မှ တိုက်ပွားများဖော်ဆောင်မည်ဆိုသော သတင်းများကြောင့် ချောင်းသာ၊ ငွေဆောင်ကမ်းခြေများသို့ ပြည်တွင်းခရီးသွားလုပ်ငန်းများ ခေတ္တရပ်နားထားသလို ကြိုတင်စီစဉ်ထားသော ခရီးသည်များကလည်း ခရီးစဉ်များ ပယ်ဖျက်မှုများရှိနေကြောင်း ပြည်တွင်းခရီးသွားလုပ်ငန်းများထံမှ သိရသည်။

“လောလောဆယ် တောင်ကြီးဘက်သွားနေတာ။ ဒီရက်ထဲတော့ သတင်းတွေတော့ကြားတယ်။ တချို့ကတော့လည်း မသွားဘူး။ နေ့တိုင်းပြေးဆွဲနေတဲ့ကားတွေတော့ သွားတယ်ကြားတယ်။ ကျွန်မတို့က Travel Package တွေလုပ်တာဆိုတော့။ ပြီးခဲ့တဲ့ တစ်ပတ်ကတော့ ငွေဆောင်ကနေ ပြန်လာတယ်။ ပြီးခဲ့တဲ့တစ်ပတ်က ဘာမှမဖြစ်ဘူး။ မနေ့ကမှ ချောင်းသာလမ်းတွေ ပိတ်လိုက်တယ်ကြားတော့ တောင်ကြီးဘက်ရောက်နေတာဆိုတော့ နေ့စဉ်ပြေးဆွဲတဲ့ ယာဉ်လိုင်းတွေ ထွက်မထွက်တော့ မသိဘူး” ဟု ပြည်တွင်းခရီးသွားလုပ်ငန်းရှင်တစ်ဦးက ပြောသည်။

ခရီးသွားရာသီဖြစ်သော်လည်း အဆိုပါသတင်းကြောင့် ပြည်တွင်း ခရီးသွားလုပ်ငန်းများက ချောင်းသာ-ငွေဆောင်ခရီးစဉ်များကို ရှောင်ပြီးခရီးစဉ်များရေးဆွဲနေသည့်အပြင် ကြိုတင်စီစဉ်ထားသော ခရီးသည်များကပင် ခရီးစဉ်များကို ပြန်လည်ပယ်ဖျက်မှုများရှိနေပြီး ငွေဆောင်ခရီးစဉ်ထက် ချောင်းသာခရီးစဉ်များအတွက် ပယ်ဖျက်မှုပိုများကြောင်း သိရသည်။

“အခုလောလောဆယ် Cancel ဖြစ်တဲ့ဟာတွေလည်း ရှိတယ်။ ပြည်တွင်းကဟာတွေကတော့ အချို့ Cancel လုပ်ကြတယ်။ အဓိကတော့ ဟိုတယ်တွေအပိုင်းမှာ ပိုပြီးတော့သိမှာပေါ့။ ခရီးသွားကုမ္ပဏီတွေအနေနဲ့ကတော့ Cancel တွေဖြစ်တယ်လို့ ကြားတယ်။ ဘယ်လောက်ပမာဏအထိ ဖြစ်တယ်ဆိုတာတော့ မသိရသေးဘူး။ ချောင်းသာထက်စာရင် ငွေဆောင်ကတော့ Cancel ဖြစ်တာနည်းတယ်။ နည်းနည်းပါးပါးလောက်ပဲဖြစ်တယ်” ဟု မြန်မာနိုင်ငံခရီးသွားလုပ်ငန်းရှင်များအသင်း နာယက ဦးနောင်းနောင်းဟန်က ပြောသည်။

ထို့ပြင် ချောင်းသာနှင့် ငွေဆောင်သို့ နေ့စဉ်ပြေးဆွဲပေးနေသည့် ယာဉ်လိုင်းအချို့မှာလည်း တစ်ရက်လျှင် ခရီးသည် သုံး၊ လေးဦးသာ သွားရောက်မှုရှိသဖြင့် ကားအသေးများဖြင့် လူပြည့်သည့်ရက်အထိစောင့်ကာ ခရီးစဉ်များ ပြေးဆွဲပေးနေရကြောင်း သိရသည်။

သို့သော် လက်ရှိတွင် ခရီးသွားများအနေဖြင့် စိုးရိမ်စိတ်များကြောင့် ယခု ခရီးသွားရာသီကာအတွင်း ချောင်းသာ၊ ငွေဆောင် ခရီးစဉ်များကို ရှောင်ပြီးအခြားခရီးစဉ်များကို ဦးစားပေး‌ရွေးချယ်နေသလို ပုံမှန်ခရီးသွားသည်ပင် သွားလာမှုနည်းလာခြင်းဖြစ်သည်။

Credit - Myanmar Transparency News Agency

#သတင်းဟင်းလေးအိုးကြီး