အွန်လိုင်း​လောင်းကစားစနစ်နှင့် VPN App တည်​ဆောက်ခြင်းများကို ဆိုက်ဘာလုံခြုံရေးဥပဒေဖြင့် အ​ရေးယူမည်။


အီလက်ထရွန်နစ် နည်းပညာအသုံးပြုပြီး အလွဲသုံးစားလုပ်ခြင်း၊ အွန်လိုင်းလောင်းကစားစနစ် တည်ဆောက်ခြင်းအပြင် Virtual Private Network (VPN) ဝန်ဆောင်မှုပေးခြင်းများကို ထောင်ဒဏ်နှင့် ငွေဒဏ်ချမှတ်နိုင်မည့် ဆိုက်ဘာလုံခြုံရေးဥပဒေကို ဇန်နဝါရီ ၁ ရက်၊ နေ့စွဲဖြင့် နစက၏ သတင်းထုတ်ပြန်ချက်အရ သိရသည်။

အဆိုပါ ဆိုက်ဘာတိုက်ခိုက်မှုကြောင့် နိုင်ငံ့အချုပ်အခြာအာဏာနှင့် တည်ငြိမ်အေးချမ်းရေးကို ထိခိုက်မှုက ကာကွယ်ရန်နှင့် ဆိုက်ဘာမှုခင်းများကို ထိထိရောက်ရောက် အရေးယူနိုင်ရန်အတွက် ယင်းဥပ​ဒေကို ပြဋ္ဌာန်းရခြင်းဖြစ်​ကြောင်း ထုတ်ပြန်ချက်၌ ​ဖော်ပြခဲ့သည်။

ဆိုက်ဘာလုံခြုံရေးဥပဒေ ပုဒ်မ (၇၂) တွင် မည်သူမဆို အများပြည်သူကြည့်ရှုရန် မသင့်​သော သတင်းအချက်လက်များကို ဖက်စ်၊ အီးမေးလ်အပြင် နည်းပညာဖြင့် ဖန်တီးထားသည့် လူမှုကွန်ရက်များ အသုံးပြုပြီး ဖြန့်ဝေခြင်း၊ ပေးပို့ခြင်း၊ ကူးယူခြင်း၊ ရောင်းချခြင်းများအတွက် ထောင်ဒဏ်အနည်းဆုံး တစ်လက ခြောက်လ၊ ဒဏ်ငွေအနည်းဆုံး ကျပ်ဆယ်သိန်းမှ ကျပ်သိန်းတစ်ရာအထိ ချမှတ်မည့်အပြင် ဒဏ်နှစ်ရပ်စလုံးကိုလည်း ချမှတ်မည်ဟု ဖော်ပြထား​ကြောင်း သိရသည်။

လက်ရှိ ပြဋ္ဌာန်းလိုက်သည့် ဆိုက်ဘာလုံခြုံရေးဥပဒေ ပုဒ်မ (၇၀) တွင် တရားမဝင် VPN ဝန်ဆောင်မှုအတွက် ထောင်ဒဏ်အများဆုံး ခြောက်လအထိ၊ ဒဏ်ငွေအနည်းဆုံး ကျပ်ဆယ်သိန်းမှ ကျပ်သိန်းတစ်ရာအထိ ချမှတ်ခံရမည်ဖြစ်ပြီး ဒဏ်နှစ်ရပ်စလုံးလည်း ချမှတ်နိုင်​ကြောင်း အတိအလင်း ​ဖော်ပြခဲ့သည်။

ထို့ကြောင့် VPN ဝန်ဆောင်မှုပေးနေသည့် လုပ်ငန်းများလည်း ထိခိုက်လာနိုင်ပြီး လက်ရှိ ဝန်ဆောင်မှုပေးခြင်းကို ရပ်နားထားရ​ကြောင်း Virtual Private Network (VPN) ဝန်ဆောင်မှုပေးနေသူများထံက သိရသည်။

အဆိုပါ ဥပဒေကြောင့် VPN အသုံးပြုပြီး လူမှုကွန်ရက်က စီးပွားရေးလုပ်နေသူများကိုပါ ထိခိုက်လာနိုင်​ကြောင်း ​ဝေဖန်မှုများ ထွက်​ပေါ်ခဲ့သည်။

ထို့ပြင် ခွင့်ပြုချက်မရှိဘဲ အွန်လိုင်းလောင်းကစား လုပ်ဆောင်သူများအတွက် ပြစ်မှုထင်ရှားလျှင် ထောင်ဒဏ် အနည်းဆုံး ခြောက်လမှ တစ်နှစ်ချမှတ်မည့်အပြင် ငွေဒဏ်ကိုလည်း ချမှတ်မည်ဟု ​ဖော်ပြချက်အရ သိရသည်။

လက်ရှိ ဆိုက်ဘာလုံခြုံရေးဥပဒေပါ ပြစ်မှုနှင့် ပြစ်ဒဏ်များသည် ပြည်တွင်းသာမက ပြည်ပရောက်နိုင်ငံသားများကိုပါ သက်ရောက်မှုရှိ​နေ​ကြောင်း ၄င်းစာရည်ညွှန်းချက်အရ သိရသည်။
#updatenews
#crd