အီဂျစ်တိုက်စစ်ကစားသမား ဆာလာက စာချုပ်သစ်နဲ့ပတ်သက်ပြီး တိုးတက်မှုမရှိတာကြောင့် ဒီရာသီဟာ လီဗာပူးလ်အသင်းမှာ သူ့ရဲ့နောက်ဆုံးရာသီလို့ Sky Sports နဲ့ ပြုလုပ်ခဲ့တဲ့ အင်တာဗျူးမှာ ကြေညာခဲ့ပါတယ်။
ဒီရာသီကုန်ရင် စာချုပ်ကုန်ဆုံးတော့မယ့် ဆာလာနဲ့ လီဗာပူးလ်အသင်းတို့ဟာ စာချုပ်သစ်အတွက် ဆွေးနွေးမှုတွေရပ်တန့်နေတာကြောင့် ဆာလာဟာ ရာသီအကုန်မှာ လီဗာပူးလ်အသင်းကနေ အလွတ်နဲ့ ထွက်ခွာဖို့ရှိနေတာပါ။
>>>>>
ဒီရာသီမှာ လီဗာပူးလ်အသင်းအတွက် ပြိုင်ပွဲစုံသွင်းဂိုး(၂၀)အထိ သွင်းယူပြီး ခြေစွမ်းပြသနေတဲ့ ဆာလာဟာ ဇန်နဝါရီ(၁)ရက်စတင်ပြီး အင်္ဂလန်ပြင်ပကလပ်အသင်းတွေနဲ့ အကြိုစာချုပ်ချုပ်ဆိုလို့ရပြီဖြစ်ပါတယ်။ ဆာလာဟာ လီဗာပူးလ်အသင်းနဲ့ စာချုပ်သစ်အတွက် သဘောတူညီမှုမရရှိတာကြောင့် ဒီရာသီဟာ သူ့ရဲ့နောက်ဆုံးရာသီလို့ အကြိမ်ပေါင်းများစွာပြောနေခဲ့တာပါ။ ဆာလာဟာ သူ့ရဲ့နောက်ဆုံးရာသီမှာ လီဗာပူးလ်အသင်းကို အောင်မြင်မှုတွေရယူပေးချင်နေပြီး ပရီးမီးယားလိဂ်ဖလားရယူနိုင်ဖို့ကို အဓိကရည်မှန်းနေတာဖြစ်ပါတယ်။
လီဗာပူးလ်အသင်းဟာ ဆာလာအပြင် အသင်းခေါင်းဆောင် ဗန်ဒိုက်၊ နောက်ခံလူ အာနိုးလ်တို့ကိုလည်း ရာသီအကုန်မှာ အလွတ်နဲ့ ဆုံးရှုံးရဖွယ်ရှိနေပါတယ်။ သူတို့နှစ်ဦးကလည်း ဒီရာသီကုန်ရင် လီဗာပူးလ်အသင်းနဲ့ စာချုပ်ကုန်ဆုံးမှာဖြစ်ပေမယ့် အခုအချိန်ထိ စာချုပ်သစ်အတွက် သဘောတူညီမှုမရရှိသေးတာဖြစ်ပါတယ်။ အာနိုးလ်ကို ခေါ်ယူဖို့ ရီးရဲလ်မက်ဒရစ်အသင်းက ချဉ်းကပ်မှုတွေပြုလုပ်နေပြီး လီဗာပူးလ်အသင်းကို တရားဝင်ကမ်းလှမ်းမှုပြုလုပ်ဖို့ရှိနေပါတယ်။
ပရီးမီးယားလိဂ်အမှတ်ပေးဇယားကို (၁)ပွဲလျော့၊ရမှတ်(၆)မှတ်အသာနဲ့ ဦးဆောင်နေတဲ့ လီဗာပူးလ်အသင်းဟာ ဇန်နဝါရီ(၅)ရက်မှာ ပရီးမီးယားလိဂ်ပွဲစဉ်အဖြစ် မန်ယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပါတယ်။
