ဒေါ်နယ်ထရန့် ပိုင်သည့် ဟိုတယ်ရှေ့မှာ Tesla Cybertruck ယာဥ်တစ်စီး ပေါက်ကွဲမှုကြောင့် လူတစ်ဦးသေဆုံးပြီး ၇ ဦးဒဏ်ရာရ
ဇန်နဝါရီ ၂
အမေရိကန်နိုင်ငံ ရွေးကောက်ခံသမ္မတဖြစ်တဲ့ ဒေါ်နယ်ထရန့်ရဲ့ ပိုင်ဆိုင်မှုတစ်စိတ်တစ်ပိုင်းဖြစ်တဲ့ လာ့စ်ဗီးဂက်စ်မြို့က ထရမ့်ဟိုတယ်မာ့ဗီးဂက်စ်ရဲ့အပြင်ဘက်မှာ ဇန်နဝါရီ ၁ ရက်နေ့က Tesla ဆိုင်ဘာထရပ်ယာဉ်တစ်စီး မီးလောင်ပေါက်ကွဲခဲ့လို့ လူတစ်ဦးသေဆုံးပြီး ၇ ဦးထက်မနည်း ဒဏ်ရာရခဲ့တယ်လို့ သိရပါတယ်။
လာ့စ်ဗီးဂတ်စ်ရဲအရာရှိ ကီဗင်မက်မဟေးရဲ့ပြောကြားမှုအရ ယခုလို ကြီးမားတဲ့ပေါက်ကွဲမှုမဖြစ်မီမှာ လျှပ်စစ်ကားဟာ ထရမ့်အင်တာနေရှင်နယ်ဟိုတယ်ရဲ့ မှန်ဝင်ပေါက်ထိ ဝင်သွားခဲ့ကြောင်းနဲ့ ဗီဒီယိုမှတ်တမ်းများအရ အဲဒီ သံမဏိထရပ်ကားဟာ မီးလောင်ကျွမ်းခဲ့ပြီးနောက် မီးရှူးမီးပန်းတွေလိုမျိုး သေးငယ်တဲ့ ပေါက်ကွဲမှုတွေ ဖြစ်ပွားခဲ့တာလို့ ဆိုပါတယ်။
Tesla အကြီးအကဲ အီလွန်မက်ခ်ကတော့ အဆိုပါပေါက်ကွဲမှုဟာ ယာဥ်နဲ့မသက်ဆိုင်ဘဲ အလွန် ကြီးမားတဲ့ မီးရှူးမီးပန်းတွေ၊ ဒါမှမဟုတ် Cybertruck ပေါ်မှာ သယ်ဆောင်လာတဲ့ ဗုံးကြောင့်သာ ဖြစ်နိုင်တယ်လို့ သူ့ရဲ့လူမှုကွန်ရက် X မှာရေးသားထားပါတယ်။
အစောပိုင်းမှာ ဒီပေါက်ကွဲမှုကို Tesla ဝါရင့်ကျွမ်းကျင်သူတစ်ဖွဲ့လုံးက စုံစမ်းစစ်ဆေးခဲ့ပေမယ့် "ဒီလိုမျိုး တစ်ခါမှ မတွေ့ဖူးဘူး" လို့သာ ပြောကြားခဲ့တယ်လို့သိရပြီး ရဲတပ်ဖွဲ့ကတော့ ပေါက်ကွဲမှု ဖြစ်ပွားရတဲ့ အကြောင်းရင်းကို ဖော်ထုတ်ဖို့ ဆက်လက် လုပ်ဆောင်နေတယ်လို့ သိရပါတယ်။
#centralnewsnaypyitaw
