အဇာဘိုင်ဂျန်လေယာဉ်ပျက်ကျမှုအတွက်_သမ္မတပူတင်တောင်းပန်
-----------------------------------------
အဇာဘိုင်ဂျန်သမ္မတ အီလ်ဟမ် အလီယက်ဗ်နှင့် ဖုန်းခေါ်ဆိုမှုတွင် ရုရှားလေပိုင်နက်တွင် ကြေကွဲဖွယ်ဖြစ်ရပ်ဖြစ်ပွားခဲ့ခြင်းအတွက် သမ္မတပူတင်က တောင်းပန်ခဲ့ကြောင်း ကရင်မလင်နန်းတော်မှ ထုတ်ပြန်ချက်တွင် ဖော်ပြထားသည် ။
လေယာဉ်သည် Grozny တွင် ဆင်းသက်ရန် ကြိုးပမ်းချိန်တွင် ရုရှား၏ လေကြောင်းရန်
ကာကွယ်ရေးစနစ်များ သက်ဝင်နေကြောင်း ပူတင်က စနေနေ့တွင် ပြောကြားခဲ့သည်။ လေယာဉ်သည် ဦးတည်လေဆိပ်သို့ မရောက်နိုင်ဘဲ အရှေ့ဘက်သို့ လမ်းကြောင်းပြောင်းသွားကာ နောက်ဆုံးတွင် ကာဇက်စတန်နိုင်ငံ၊ Aktau အနီးတွင် ပျက်ကျခဲ့ပြီး လေယာဉ်ပေါ်ပါ လူ ၃၈ ဦး သေဆုံးခဲ့သည်။
အဖြစ်အပျက်နောက်ကွယ်၌ ရှိနေသည့်အချက်ကို အတည်မပြုနိုင်သေးသော်လည်း အစောပိုင်း ညွှန်ပြချက်များအရ ရုရှားလေယာဉ်ပစ်ဒုံးကျည်က ခရီးသည်တင် ဂျက်လေယာဉ်ကို ပစ်ချခဲ့မိခြင်း ဖြစ်နိုင်သည်ဟု အမေရိကန် အရာရှိတစ်ဦးက ပြောသည်။ ရုရှားလေကြောင်းရန်ကာစနစ်က ခရီးသည်တင်လေယာဉ်ကို ထိမှန်သည်ဟု ပူတင်၏မှတ်ချက်တွင် ပြောကြားခြင်းမရှိပေ။
လေယာဉ်သည် Grozny လေဆိပ်သို့ အကြိမ်ကြိမ်ဆင်းသက်ရန် ကြိုးပမ်းခဲ့သည်။ တစ်ချိန်တည်းတွင် Grozny၊ Mozdok နှင့် Vladikavkaz နယ်မြေများကို ယူကရိန်းတိုက်ခိုက်ရေးဒရုန်းများဖြင့် တိုက်ခိုက်ခဲ့ပြီး ရုရှားလေကြောင်းကာကွယ်ရေးစနစ်များက အဆိုပါတိုက်ခိုက်မှုများကို တွန်းလှန်ခဲ့သည်။
ရုရှား၏ စုံစမ်းစစ်ဆေးရေးကော်မတီသည် သဘာဝဘေးအန္တရာယ်နှင့် ဆက်နွှယ်သည့် ရာဇ၀တ်မှုတစ်ခုကို အမှုဖွင့်ထားကြောင်း ထုတ်ပြန်ချက်တွင် ဖော်ပြထားသည်။
ယူကရိန်းနိုင်ငံခြားရေးဝန်ကြီး Andrii Sybiha က မော်စကိုသည် လေယာဉ်ပျက်ကျရသည့်အကြောင်းရင်းကို လိမ်လည်ပြောဆိုခဲ့ကြောင်း၊ ပျက်စီးသွားသော ဂျက်လေယာဉ်အား ၎င်းတို့၏ ရာဇ၀တ်မှုဆိုင်ရာ အထောက်အထားများကို ဖုံးကွယ်ရန် ကြိုးပမ်းလျက် ပင်လယ်ပြင်ကို ဖြတ်ကျော်ခိုင်းခဲ့ကြောင်း စွပ်စွဲပြောကြားခဲ့သည်။