ရန်ကုန်မန်းလေး ခရီးလောက်ကို လမ်းမှာအားသွင်းဖို့မလို၊ ဒရိုင်ဘာမလိုတဲ့ လျှပ်စစ်ကားတွေစီးရဖို့ နီးလာပါပြီ။
တရုတ်လုပ် လျှပ်စစ်ကားတွေနဲ့ အမေရိကန်လုပ် တက်စလာ Tesla ကားကို ယှဉ်ပြိုင်ဖို့ ဂျပန်ရဲ့ ဟွန်ဒါ နဲ့ နစ်ဆန်း ကားကုမ္ပဏီ တို့ တရားဝင် ပူးပေါင်းကြပါတယ်။ မစ်ဆူဘိရှိကုမ္ပဏီလည်းပါဝင်မယ်လို့ဆိုတယ်။
ကမ္ဘာ့လျှပ်စစ်ကားဈေးကွက်ကို ထိုးဖောက်နိုင်ဖို့အတွက် ဂျပန်နိုင်ငံရဲ့ နာမည်ကျော်ကားကုမ္ပဏီကြီးတွေဖြစ်ကြတဲ့ ဟွန်ဒါ Honda နဲ့ နစ်ဆန်း Nissan ကားကုမ္ပဏီနှစ်ခုပူးပေါင်းမယ်လို့ သတင်းထွက်နေတာ တစ်လနီးပါးရှိပါပြီ။ အခုမှ တရားဝင် သတင်းထုတ်ပြန်ကြတာဖြစ်တယ်။ လျှပ်စစ်ကားဈေးကွက်အတွက် ပိုမိုကောင်းမွန်ပြီး ခရီးရှည်မောင်းနိုင်၊ ဈေးလည်းသက်သာတဲ့ ဘက်ထရီအမျိုးအစားအသစ်ထုတ်နိုင်ရေးကို ဦးစားပေးလုပ်ကိုင်ကြမယ်။ သမရိုးကျဓာတ်ဆီအင်ဂျင်ကားတွေထုတ်လုပ်မှုလျှော့ချမယ်လို့ သိရတယ်။ နစ်ဆန်းကုမ္ပဏီ နဲ့အတူ ပူးပေါင်းထားပြီးဖြစ်တဲ့ မစ်ဆူဘီရှီ Mitsubishi ကုမ္ပဏီကလည်း ပါဝင်ပူးပေါင်းမှာဖြစ်လို့ လို့ ပူးပေါင်းမှုပြီးဆုံးတဲ့အခါ ကမ္ဘာ့တတိယမြောက်အများဆုံး ကားရောင်းချတဲ့ ကုမ္ပဏီအသစ်ဖြစ်လာမယ်။
ကမ္ဘာမှာ ကားအများဆုံး ရောင်းချနိုင်တဲ့ကုမ္ပဏီက ဂျပန်ရဲ့ နာမည်ကျော်တိုယိုတာ Toyota ကုမ္ပဏီဖြစ်ပြီး ဒုတိယ ကားကုမ္ပဏီကတော့ ဂျာမဏီက ဘောဗ်ဝက်ဂွန် Volkswagen ကုမ္ပဏီဖြစ်တယ်။
ကားထုတ်လုပ်ကြတဲ့ကုမ္ပဏီတွေ ပူးပေါင်းကြတာ အထူးအဆန်းတော့မဟုတ်ပါဘူး။ မာဆေးဒိ (မာစီဒီး) Mercedes ကားတွေထုတ်လုပ်တဲ့ ဂျာမန်က ဒိုင်မာ ဘန့်စ် Diamler-Benz နဲ့ ဂျိ (ဂျစ်) ကားထုတ်တဲ့ အမေရိကားက ခရိုင်စလာ Chrysler တို့ ပူးပေါင်းဖူးကြတယ်။ ဂျပန်တိုယိုတာ နဲ့ အမေရိကန် ဂျနယ်ရယ်မော်တာ General Motors ပူးပေါင်းဖူးကြတယ်။ နစ်ဆန်း ဆိုရင်လည်း ပြင်သစ်က ရနော့ (ရေနိုး) Renault ကားကုမ္ပဏီကြီးနဲ့ ပူးပေါင်းဖူးတယ်။ အဆင်မပြေကြတဲ့အခါ ကွဲကြတာပဲ။ ဒါကြောင့် ကားကုမ္ပဏီနာမည်တွေကတော့ အရင်အတိုင်းဆက်တည်ရှိနေမှာဖြစ်တယ်။
ဒါပေမဲ့ ဒီတစ်ခါပူးပေါင်းမှုက ထူးပါတယ်။ ခေတ်စားလာတဲ့ လျှပ်စစ်ကားဈေးကွက်ကို တရုတ်လွှမ်းမိုးမှုလျှော့ချရေး၊ အမေရိကားရဲ့ တက်စလာနဲ့ ယှဉ်ပြိုင်ရေးဖြစ်တယ်။ ဒါကြောင့်
ဈေးသက်သာပြီး ခရီးရှည်မောင်းနိုင်တဲ့ ဘက်ထရီအသစ်ထုတ်လုပ်နိုင်ဖို့ ပူးပေါင်းတီထွင်ကြံဆကြမှာဖြစ်တယ်။ တိုယိုတာကလည်း မာဇဒါ Mazda ကုမ္ပဏီနဲ့ ပူးပေါင်းပြီး ဘက်ထရီအသစ်ထုတ်လုပ်ဖို့ ရှိနေတယ်လို့ဆိုကြတယ်။
အမေရိကားရဲ့ နာမည်ကျော်လျှပ်စစ်ကားကုမ္ပဏီဖြစ်တဲ့ တက်စလာကုမ္ပဏီကလည်း ခရီးရှည်မောင်းနိုင်မဲ့ ဘက်ထရီအသစ်ကို မကြာခင် မိတ်ဆက်မယ်လို့ ဆိုထားသလို ဈေးသက်သာမဲ့အပြင် အလိုအလျောက်မောင်းနှင်ပေးမဲ့ တက္ကစီလျှပ်စစ်ကားသစ်တွေ မကြာမီထုတ်လုပ်မယ်လို့ ကြော်ငြာထားတယ်။
ဆန်ဖရန်စစ္စကိုမြို့လို့ လမ်းကျဉ်းပြီး အတက်အဆင်းများ၊ ကားတွေလူတွေရှုပ်ထွေးတဲ့လမ်းတွေပေါ်မှာ လူမပါပဲ အလိုအလျောက်မောင်းနှင်နေတဲ့ ဂူဂဲလ် Google ပိုင် ဝေမို Waymo တက္ကစီကားတွေအများကြီးတွေ့နေရပါပြီ။ ခရီးသည်တွေကိုလည်း လက်ခံပို့ဆောင်ပေးနေပြီ။ ဒါကြောင့် မောင်းသူမဲ့ driverless နည်းပညာဆော့ဝဲလ် software က အဆင်သင့်ရှိနေပြီ။ ဘက်ထရီအားအပြည့်နဲ့ မိုင်သုံးရာလောက်ပဲ အခုအခါမှာ သွားနိုင်သေးပေမဲ့ မကြာခင်မှာ ခရီးမိုင်ရှည်မောင်းနိုင်မဲ့ ဘက်ထရီတွေပေါ်လာတော့မယ်။
အမေရိကား နဲ့ ဂျပန်ကားကုမ္ပဏီကြီးတွေရဲ့ အပြိုင်အဆိုင်ကြိုးစားမှုကြောင့် မကြာမီမှာ စျေးသက်သာပြီး ခရီးဝေးသုံးနိုင်တဲ့လျှပ်စစ်ကားတွေကို တွေ့လာရဖွယ်ရှိလာပါပြီ။ ပစ္စည်းအရည်အသွေးအာမခံချက်မသေချာလှသလို မိမိအတွက်လုံခြုံစိတ်ချရမှု privacy လည်း မသေချာတဲ့ တရုတ်လျှပ်စစ်ကားဈေးကွက်ကို ကျော်တက်သွားမှာ သေချာပါတယ်။
လျှပ်စစ်ကားအသစ်တွေ စီးပြီး ရန်ကုန်ကနေ မန်းလေးလောက်ခရီးကို ဇိမ်နဲ့သွားကြဖို့သာ ပြင်ထားကြပေတော့ မိတ်ဆွေတို့ရေ။ မောင်းသူမဲ့ ကားလေးစီးရင်း ဖုန်းလေးပွတ်ကြတာပေါ့။ မကြာတော့မဲ့ အနာဂတ်မှာ။
ချစ်တဲ့
မောင်လူပေ