တရုတ် EV များကို အခွန်တိုး‌ရေးEU အများစုထောက်ခံ
--------------------------
တရုတ်လုပ် လျှပ်စစ်ကားတွေ တင်သွင်းမှုအပေါ် အခွန် ၄၅ ရာခိုင်နှုန်းအထိ စည်းကြပ်ဖို့ အီးယူအဖွဲ့ဝင်တွေရဲ့ မဲခွဲဆုံးဖြတ်မှုမှာ လုံလောက်တဲ့ ထောက်ခံမှု ရရှိခဲ့တယ်လို့ ဥရောပကော်မရှင်က အောက်တိုဘာ ၄ ရက်မှာ ပြောဆိုလိုက်ပါတယ်။

EU ရဲ့ ကုန်သွယ်မှုမူဝါဒကို ကြီးကြပ်တဲ့ ကော်မရှင်ဟာ ထောက်ပံ့ကြေးဆန့်ကျင်ရေးကို တစ်နှစ်တာ စုံစမ်းစစ်ဆေးခဲ့ပြီးနောက် မမျှတတဲ့ ထောက်ပံ့ကြေးတွေနဲ့ ထုတ်လုပ်ထားတယ်လို့ ရှုမြင်တဲ့ တရုတ် EV တွေကို တန်ပြန်ဖို့ လာမယ့်ငါးနှစ်အတွက် စည်းကြပ်ခွန်ကို နောက်ဆုံး အဆိုပြုထားတာပါ။

သွင်းကုန်တွေကို အခွန်စည်းကြပ်တာမျိုး ဘယ်တော့မှ မလုပ်ချင်ပေမယ့် အခုကိစ္စမှာတော့ များပြားလွန်းတဲ့ ထောက်ပံ့မှုတွေကို ဖယ်ရှားပစ်ဖို့ စည်းကြပ်တာလို့ ကော်မရှင်ပြောရေးဆိုခွင့်ရှိသူ အိုလော့ဂီးလ်က ဘရပ်ဆဲလ်မှာ ပြောပါတယ်။

သောကြာနေ့က ပြုလုပ်တဲ့ မဲခွဲမှုမှာ EU အဖွဲ့ဝင် ၁၀ နိုင်ငံက သွင်းကုန်ခွန်ကို ထောက်ခံခဲ့ပြီး ၅ နိုင်ငံက ကန့်ကွက်ကာ ၁၂ နိုင်ငံက ကြားနေခဲ့တယ်လို့ EU သတင်းရင်းမြစ်တွေက ပြောပါတယ်။

အဆိုပြုချက်ကို ပိတ်ဆို့ဖို့ အီးယူလူဦးရေ ၆၅ ရာခိုင်နှုန်းကို ကိုယ်စားပြုဖို့ အရည်အချင်းပြည့်မီတဲ့ အီးယူအဖွဲ့ဝင် ၁၅ နိုင်ငံအနက် အများစုက ကန့်ကွက်ဖို့ လိုအပ်ပါတယ်။

ပြင်သစ်၊ ဂရိ၊ အီတလီနဲ့ ပိုလန်တို့က ထောက်ခံဖွယ်ရှိကြောင်း ရိုက်တာသတင်းဌာနက အောက်တိုဘာ ၂ ရက်မှာ ဖော်ပြခဲ့ပြီး ဖြစ်ပါတယ်။

ဒေသတွင်း အကြီးမားဆုံး စီးပွားရေးနဲ့ အဓိက ကားထုတ်လုပ်သူ ဂျာမနီက အဆိုပြုချက်ကို ကန့်ကွက်မဲ ပေးခဲ့တယ်လို့ သတင်းရင်းမြစ်တွေက ပြောပါတယ်။