လေးမျက်နှာမြို့နယ် ငဝန်တာအိကျခဲ့သည့်နေရာတွင် မီတာ ၁,၆၀၀ ရှည် သောင်တူးလုပ်ငန်း ဆောင်ရွက်နေ

ဧရာဝတီတိုင်းဒေသကြီး၊ လေးမျက်နှာမြို့နယ်ရှိ ငဝန်တာအိကျခဲ့သည့်နေရာတွင် နောင်နှစ်များ၌ တာအိကျမှုနှင့် ရေကြီးရေလျှံမှုများ ထပ်မံမဖြစ်ပွားစေရန် မြစ်ကြောင်းရှင်းလင်းရေး၊ သောင်တူးခြင်းနှင့် ကမ်းထိန်းလုပ်ငန်းများ ဆောင်ရွက်လျက်ရှိကြောင်း တိုင်းဒေသကြီးအစိုးရအဖွဲ့၏ အသိပေးချက်အရ သိရသည်။
ငဝန်တာအိကျခဲ့သည့်နေရာ၏ တစ်ဖက်ကမ်းရှိ သောင်ခုံကို ရှင်းလင်းဖယ်ရှားရန် အလျား မီတာ ၁,၆၀၀ နှင့် အကျယ် မီတာ ၇၀ ရှိသည့် သောင်တူးသဲဖို့လုပ်ငန်းကို သောင်တူးယာဉ်များဖြင့် ဆောင်ရွက်လျက်ရှိကြောင်း သိရသည်။
ထို့ပြင် အလျား မီတာ ၁,၀၀၀ ရှိ ဘိုးပိုင်အခြေပြု ကျောက်ပြားကပ်တမံ ကမ်းထိန်းလုပ်ငန်းကို ဆက်လက်ဆောင်ရွက်နိုင်ရန်လည်း ပြင်ဆင်မှုများ ပြုလုပ်ထားသည်။
ငဝန်တာ တာမိုင် ၂၅/၃ နေရာကို အခိုင်အမာ ပြန်လည်တည်ဆောက်နိုင်ရေးအတွက် မြေပြင်တိုင်းတာခြင်း၊ ဘူမိဗေဒစူးစမ်းလေ့လာခြင်း၊ တာအူကြောင်းရွေးချယ်ခြင်းနှင့် တာဖို့ရာတွင် အသုံးပြုမည့် မြေရရှိနိုင်သည့်နေရာများ ရှာဖွေခြင်းတို့ကို ဆောင်ရွက်သွားမည်ဖြစ်သည်။
အဆိုပါလုပ်ငန်းများမှ ရရှိလာမည့် အချက်အလက်များအပေါ် အခြေခံ၍ တာပြန်လည်တည်ဆောက်ရေးအတွက် ဒီဇိုင်းပုံစံများ ရေးဆွဲသွားမည်ဖြစ်ကြောင်း သိရသည်။
အဆိုပါ မြစ်ကြောင်းရှင်းလင်းရေး၊ သောင်တူးခြင်းနှင့် ကမ်းထိန်းလုပ်ငန်းများ ဆောင်ရွက်နေမှုကို တိုင်းဒေသကြီးဝန်ကြီးချုပ် ဦးအေးကျော်နှင့် တာဝန်ရှိသူများက အောက်တိုဘာ ၁၂ ရက် နံနက်ပိုင်းတွင် သွားရောက်ကြည့်ရှုစစ်ဆေးခဲ့ကြောင်း သိရသည်။