အယ်လ်နီညိုကြောင့် ရေပြတ်လပ်မှု မဖြစ်စေရေး အပူဒဏ်ခံသီးနှံများ စိုက်ပျိုးရန်နှင့် အပူရှောင်စခန်းများ ဖွင့်လှစ်ရန် စစ်ကိုင်းတိုင်းဝန်ကြီးချုပ် ညွှန်ကြား
စစ်ကိုင်းတိုင်းဒေသကြီးအတွင်း အယ်လ်နီညိုဖြစ်စဉ်ကြောင့် အပူချိန်မြင့်မားခြင်းနှင့် ရေအရင်းအမြစ် လျော့နည်းလာနိုင်သဖြင့် သောက်သုံးရေ ပြတ်လပ်မှုမဖြစ်ပေါ်စေရေး၊ အပူဒဏ်ခံနိုင်သည့် သီးနှံများ ပြောင်းလဲစိုက်ပျိုးရေးနှင့် အပူရှောင်စခန်းများ ကြိုတင်ဖွင့်လှစ်နိုင်ရေးအတွက် သက်ဆိုင်ရာဌာနများ ပူးပေါင်းဆောင်ရွက်ကြရန် စစ်ကိုင်းတိုင်းဒေသကြီး ဝန်ကြီးချုပ် ဦးကိုလေးက ညွှန်ကြားလိုက်သည်။
ယမန်နေ့(အောက်တိုဘာလ ၁၂ ရက် )နံနက်ပိုင်းက တိုင်းဒေသကြီး အစိုးရအဖွဲ့ရုံး အစည်းအဝေးခန်းမ၌ ကျင်းပသည့် အယ်လ်နီညိုဖြစ်စဉ်ကြောင့် ကြုံတွေ့လာနိုင်သည့် သဘာဝဘေးအန္တရာယ်များ ကြိုတင်ကာကွယ်ရေး လုပ်ငန်းညှိနှိုင်းအစည်းအဝေးတွင် တိုင်းဒေသကြီး ဝန်ကြီးချုပ်က ထိုသို့ ထည့်သွင်းပြောကြားခဲ့ခြင်း ဖြစ်သည်။
အယ်လ်နီညိုဖြစ်စဉ်ကြောင့် အပူချိန်မြင့်တက်ခြင်း၊ မိုးခေါင်ရေရှားမှုဖြစ်ပေါ်ခြင်း၊ ရုတ်တရက် မုန်တိုင်းတိုက်ခတ်ခြင်းနှင့် အချိန်အခါမဟုတ် မိုးရွာသွန်းခြင်းများ ဖြစ်ပေါ်လာနိုင်သဖြင့် ခရိုင်နှင့် မြို့နယ်များအလိုက် ဘေးအန္တရာယ်မျိုးစုံအတွက် ကြိုတင်ပြင်ဆင်ထားရန်လိုအပ်ကြောင်း ဝန်ကြီးချုပ်က ထောက်ပြခဲ့သည်။
"အပူချိန်မြင့်မားမှုကြောင့် မြစ်ချောင်းနဲ့ ဆည်တမံတွေထဲ ရေဝင်ရောက်မှု နည်းပါးလာပြီး သောက်သုံးရေနဲ့ စိုက်ပျိုးရေ အခက်အခဲတွေ၊ လျှပ်စစ်ဓာတ်အား ထုတ်လုပ်မှု လျော့ကျတာတွေ ကြုံတွေ့ရနိုင်ပါတယ်။ ဒါကြောင့် သောက်သုံးရေ ပြတ်လပ်မှုမဖြစ်အောင်၊ အပူဒဏ်ခံနိုင်တဲ့ သီးနှံတွေ ရွေးချယ်စိုက်ပျိုးဖို့နဲ့ အပူရှောင်စခန်းတွေ ဖွင့်လှစ်နိုင်ဖို့ ဌာနအချင်းချင်း ချိတ်ဆက်ဆောင်ရွက်ကြရပါမယ်" ဟု တိုင်းဒေသကြီး ဝန်ကြီးချုပ် ဦးကိုလေးက ပြောသည်။
ထို့အပြင် လျှပ်စစ်ဓာတ်အား လျှော့နည်းမှုကို တုံ့ပြန်နိုင်ရန် ဆိုလာလျှပ်စစ်မီးများ ကြိုတင်စီမံ ဆောင်ရွက်ရန်၊ ဆေးရုံ/ဆေးခန်းများတွင် ဆေးဝါးနှင့် ဆေးဝါးသုံးပစ္စည်းများ ဖြည့်တင်းထားရန်၊ ကျန်းမာရေး အသိပညာပေး ဟောပြောပွဲများ၊ကြေညာဆိုင်းဘုတ်များနှင့် လက်ကမ်းစာစောင်များ ဖြန့်ဝေပေးရန်လည်း မှာကြားခဲ့ပြီး တိုင်းဒေသကြီးအစိုးရအဖွဲ့ အနေဖြင့် လိုအပ်သည်များကို ချိတ်ဆက်ပံ့ပိုးပေးသွားမည်ဟု ဆိုသည်။
အဆိုပါ အစည်းအဝေးသို့ တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီးအဆင့် ဌာနဆိုင်ရာများနှင့် ခရိုင်/မြို့နယ် စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဋ္ဌများက ဗီဒီယိုကွန်ဖရင့်စနစ်ဖြင့် တက်ရောက်ခဲ့ကြသည်။ See
