ရေး-ထားဝယ် ရထားလမ်းသစ်ကို နှစ်လမ်းသွား ဖောက်လုပ်ရန် ဆောင်ရွက်နေဟု နိုင်ငံတော်သမ္မတ ပြောကြား
ရေး-ထားဝယ် ရထားလမ်းသစ်ကို ပင်လယ်ကမ်းရိုးတန်းတစ်လျှောက် နှစ်လမ်းသွားအဖြစ် ဖောက်လုပ်နိုင်ရန် ဆောင်ရွက်နေပြီး လမ်းပိုင်းပြီးစီးပါက ခရီးသွားလာမှုနှင့် ကုန်စည်သယ်ယူပို့ဆောင်မှုများ ပိုမိုတိုးတက်လာမည်ဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။
နိုင်ငံတော်သမ္မတသည် အောက်တိုဘာ ၁၃ ရက် နံနက်ပိုင်းက ထားဝယ်မြို့၌ တနင်္သာရီတိုင်းဒေသကြီးအတွင်းရှိ တိုင်း၊ ခရိုင်၊ မြို့နယ်အဆင့် တာဝန်ရှိသူများ၊ မြို့မိမြို့ဖများနှင့် အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင်များအား တွေ့ဆုံ၍ ဒေသဖွံ့ဖြိုးရေးဆိုင်ရာ ကိစ္စရပ်များ ဆွေးနွေးစဉ် ထည့်သွင်းပြောကြားခဲ့ခြင်းဖြစ်သည်။
တနင်္သာရီတိုင်းဒေသကြီးအတွင်း စီးပွားရေးနှင့် ခရီးသွားလုပ်ငန်းများ ဖွံ့ဖြိုးတိုးတက်လာစေရန် ထားဝယ်လေဆိပ်နှင့် လေယာဉ်ပြေးလမ်း အဆင့်မြှင့်တင်ရေးလုပ်ငန်းများကို ဆောင်ရွက်လျက်ရှိကြောင်း သိရသည်။
ထားဝယ်ရေနက်ဆိပ်ကမ်းစီမံကိန်း အကောင်အထည်ဖော်မှုနှင့်အတူ ခရီးသည်နှင့် လေကြောင်းခရီးစဉ်များ ပိုမိုများပြားလာနိုင်သဖြင့် လေဆိပ်အဆင့်မြှင့်တင်ရေးကို ဆောင်ရွက်နေခြင်းဖြစ်ကြောင်း နိုင်ငံတော်သမ္မတက ပြောကြားသည်။
ထို့ပြင် ထားဝယ်ရေနက်ဆိပ်ကမ်းစီမံကိန်း အကောင်အထည်ဖော်နိုင်ရေးအတွက်လည်း အစိုးရက ကြိုးပမ်းဆောင်ရွက်လျက်ရှိပြီး စီမံကိန်းအကောင်အထည်ပေါ်လာပါက ဒေသတွင်း အလုပ်အကိုင်အခွင့်အလမ်းများ တိုးပွားလာနိုင်မည်ဖြစ်ကြောင်း ပြောကြားသည်။
တနင်္သာရီတိုင်းဒေသကြီး၏ ခရီးသွားလုပ်ငန်းဖွံ့ဖြိုးရေးအတွက် သဘာဝအလှအပရှိသည့် ကမ်းခြေများ၊ ကျွန်းစုများနှင့် ခရီးသွားနေရာများကို အကျိုးရှိစွာ အသုံးချနိုင်ရေးအပြင် ဒေသသန့်ရှင်းသာယာလှပရေးကိုလည်း ဒေသခံများ ပူးပေါင်းဆောင်ရွက်ကြရန် နိုင်ငံတော်သမ္မတက တိုက်တွန်းပြောကြားခဲ့သည်
