M League-2 ပြိုင်ပွဲဝင် အသင်း (၁၀) သင်း မိတ်ဆက်ခြင်းအခမ်းအနား ယနေ့ပြုလုပ်မယ်

​မြန်မာနိုင်ငံဘောလုံးအဖွဲ့ချုပ် (MFF) မြန်မာလိဂ် (M League ) ကော်မတီဟာ ၂၀၂၆-၂၀၂၇ ရာသီ M League-2 ပြိုင်ပွဲဝင် အသင်း (၁၀) သင်းအား မိတ်ဆက်ခြင်းအခမ်းအနားကို ယနေ့(အောက်တိုဘာ ၁၂) တွင် ပြုလုပ်မှာဖြစ်ကြောင်း သိရပါတယ်။
M League-2 ပြိုင်ပွဲဝင် အသင်း (၁၀) သင်းအား မိတ်ဆက်ခြင်းအခမ်းအနားကို ယနေ့(အောက်တိုဘာ ၁၂) နေ့လယ် (၁) နာရီတွင် ရန်ကုန်မြို့ ကမ္ဘာအေးဘုရားလမ်းရှိ မာကျူရီဟိုတယ်မှာ ပြုလုပ်မှာဖြစ်ကြောင်း သိရပါတယ်။
ယင်းအခမ်းအနားကို မြန်မာနိုင်ငံဘောလုံးအဖွဲ့ချုပ် (MFF) မြန်မာလိဂ် (M League ) ကော်မတီမှ တာဝန်ရှိသူများ၊ M League-2 ပြိုင်ပွဲဝင် အသင်း (၁၀) သင်းမှ တာဝန်ရှိသူများ၊ စပွန်ဆာကုမ္ပဏီ များမှ တာဝန်ရှိသူများ တက်ရောက်ကြမှာ ဖြစ်ပြီး ပြိုင်ပွဲနဲ့ပတ်သက်တဲ့ ကိစ္စရပ်များကို တင်ပြကြမှာဖြစ်ကြောင်း သိရပါတယ်။
ယခု ၂၀၂၆-၂၀၂၇ ရာသီ M League-2 ပြိုင်ပွဲကို အသင်း (၁၀) သင်းဖြင့် ရန်ကုန်မြို့ရှိ ကွင်း ၃ ကွင်းတွင် လာမယ့်အောက်တိုဘာ ၁၅ ရက်မှစ၍ ကျင်းပပြုလုပ်သွားမှာဖြစ်ကြောင်း သိရပါတယ်။
M League ကော်မတီဟာ ယခု ၂၀၂၆- ၂၀၂၇ ရာသီ M League-2 ပြိုင်ပွဲကိုစက်တင်ဘာ (၁၉) ရက်က စတင်ကျင်းပရန် လျာထားခဲ့သော်လည်း အသင်းအရေအတွက် ပိုမိုတိုးလာရန် ဆောင်ရွက်ခဲ့သောကြောင့် ယခုကဲ့သို့ နောက်ဆုတ်ကျင်းပရခြင်းဖြစ်ကြောင်း သိရပါတယ်။
ပြီးခဲ့တဲ့ရာသီ MNL ပြိုင်ပွဲအပြီးတွင် အဆင့် (၁၁၊ ၁၂) ရ ရခိုင်ယူနိုက်တက်နဲ့ ရာမညယူနိုက်တက်အသင်းနှစ်သင်းမှာ MNL-2 သို့ တန်းဆင်းခဲ့ရပြီး MNL-2 မှ ပထမ၊ ဒုတိယရ ချင်းလန့်နဲ့ မြဝတီအသင်းတို့မှာ MNL သို့ တန်းတက်ခွင့် ရရှိခဲ့ပါတယ်။
M League ကော်မတီဟာ ယခု ၂၀၂၆-၂၀၂၇ ရာသီ M League-2 ပြိုင်ပွဲကို ရန်ကုန်မြို့ရှိ ပဒုမ္မာကွင်း၊ တက္ကသိုလ်ကွင်းနဲ့ တောင်ဒဂုံကွင်းတို့တွင် ကျင်းပပြုလုပ်သွားရန် စီစဉ်ထားကြောင်း သိရပါတယ်။
M League ကော်မတီဟာ ယခု ၂၀၂၆-၂၀၂၇ ရာသီ M League-2 ပြိုင်ပွဲကို ပြီးခဲ့တဲ့ရာသီ MNL ပြိုင်ပွဲမှ တန်းဆင်းလာတဲ့ ရခိုင်ယူနိုက်တက်နဲ့ ရာမညယူနိုက်တက်အသင်း အပါအဝင် တက္ကသိုလ်အသင်း၊ မနောအသင်း၊ Royal Dagon၊ Enjoy Brother၊ VUE နေပြည်တော်၊ Elite Kings၊ Asian Lion၊ Junior Lions အသင်း ၁၀ သင်းဖြင့် ကျင်းပပြုလုပ်သွားမှာဖြစ်ကြောင်း သိရပါတယ်။
ယင်းအသင်းများထဲတွင် Enjoy Brother၊ Elite Kings၊ Asian Lion၊များမှာ ပြီးခဲ့တဲ့ ၂၀၂၆ M League-2 တန်းတက်ခွင့်ပြိုင်ပွဲ (MNL-2 Promotion Amateur Club Tournament 2026) ဝင် အသင်းများဖြစ်ကြောင်း သိရပါတယ်။
၂၀၂၆ M League-2 တန်းတက်ခွင့်ပြိုင်ပွဲ (MNL-2 Promotion Amateur Club Tournament 2026)
ဗိုလ်လုပွဲတွင် Enjoy Brother အသင်းက Happy Friendship အသင်းကို (၃-၂) ဂိုးဖြင့် အနိုင်ရ ဗိုလ်စွဲထားခဲ့ကြောင်း သိရပါတယ်။
ထို့ကြောင့် ၂၀၂၆ M League-2 တန်းတက်ခွင့်ပြိုင်ပွဲ (MNL-2 Promotion Amateur Club Tournament 2026) ဗိုလ်လုပွဲရောက် Enjoy Brother နဲ့ Happy Friendship အသင်း နှစ်သင်းဟာ ယခုရာသီ M League-2 ပြိုင်ပွဲကို တက်ရောက်ကစားခွင့် ရရှိခဲ့ခြင်းဖြစ်ကြောင်း သိရပါတယ်။
ယခုအခါ Happy Friendship အသင်းမှာ VUE နေပြည်တော်၊ ကချင်ယူနိုက်တက်အသင်းမှာ မနော FC၊ Glory Goal အသင်းမှာ Royal Dagon အသင်းအမည်များနဲ့ ပြောင်းလဲပြီး ယခုရာသီ M League-2 ပြိုင်ပွဲကို ဝင်ရောက်ယှဥ်ပြိုင်ကြမှာဖြစ်ကြောင်း သိရပါတယ်။